Никита Токарликов

Никита Токарликов
Никита Токарликов
Туу датасы	1918 ел
Туу урыны	Уфа губернасы Минзәлә өязе, Кәләй авылы
Үлем датасы	18 август 1944
Үлем урыны	Литва ССР
Гаскәр төре	артиллерия
Дәрәҗә	Сержант
Җитәкчелек иткән	орудие башлыгы
Бүләкләр һәм премияләр

Никита Токарликов (Никита Евдоким улы Токарликов) — Советлар Берлеге Каһарманы, орудие командиры, сержант.

Тәрҗемәи хәле

1918 елда Уфа губернасы Минзәлә өязе (хәзерге Әлмәт районы) Кәләй авылында туган. Татар. Җидееллык мәктәпне тәмамлагач, Сарманда хисапчылар хәзерләү курсларында укый. 1939 елга кадәр күмәк хуҗалыкта хисапчы булып эшли. 1939 елда Эшче-крестьян Кызыл Гаскәре сафына алына, Ерак Көнчыгышта хезмәт итә.

Бөек Ватан сугышында

Кәләй авылыннан 283 кеше фронтка китә. 100 е исән-сау әйләнеп кайта, 183 е яуда ятып кала, шулар эчендә Н.Е. Токарликов.^[1] 1944 елның июнь аеннан фронтта. I Балтик буе фронтының 1971- артиллерия полкында (45- артиллерия бригадасы, 51- армия) орудие командиры була. Тарту шәһәре юнәлешендә һөҗүм итүдә катнаша.

Батырлыгы

1944 елның 18 августында Литва ССР Шяуляй шәһәре тирәсендә орудие уты белән дошманның 6 хәрби техникасын һәм күп санда фашистларны юк итә. Үзе дә шушы сугышта һәлак була.^[2]

Литваның Мартинишкяй өязе Жагар (Ауце) шәһәрендә җирләнгән.

Бүләкләре, мактаулы исемнәре

Ленин ордены.
Советлар Берлеге Каһарманы (һәлак булганнан соң, 1945 елның 24 мартында)

Хәтер

Әлмәт шәһәрендә, Кәләй авылында урамнарга исеме бирелгән.
Кәләй мәдәният йорты биләмәсендә Н.Е. Токарликовның мемориаль комплексы ачылган.
Әлмәт районы «Кичуй» совхозы Н.Е. Токарликов исемендәге совхоз (хәзер Токарликов исемендәге ААҖ) итеп үзгәртелгән (1985).^[3]

Чыганаклар

Сарман районы энциклопедиясе. 2- китап (төзүче Дамир Гарифуллин). Чаллы, 2006.
Батырлар китабы - Книга Героев. Казан, 2000.
Советлар Союзы Геройлары – якташларыбыз: Әдәби-документаль очерклар hәм язмалар. Казан, 1990.
Татарская энциклопедия. В 6 т. Т.5 (Р-Т). Казан, 2010.(рус.)