Ігар Шчорс

Ігар Шчорс
Ігар Шчорс
Род дзейнасці	грамадскі і ваенны дзеяч
Дата нараджэння	25 жніўня 1918
Месца нараджэння	Новы Свержань, Мінскі павет, Мінская губерня;
Дата смерці	12 кастрычніка 1992 (74 гады)
Месца смерці	Саўт-Рывер, акруга Мідлсекс, Нью-Джэрсі, ЗША;
Бацька	Васіль Шчорс
Маці	Сафія Шчорс
Партыя	Беларуская незалежніцкая партыя;
Член у	Беларуская краёвая абарона; Беларускі кангрэсавы камітэт Амерыкі;

Ігар Шчорс (25 жніўня 1918 — 12 кастрычніка 1992) — беларускі грамадскі і ваенны дзеяч. Афіцэр БКА, сябра БНП і БККА. Брат Мікалая і Барыса Шчорсаў^[1].

Біяграфія

Нарадзіўся 25 жніўня 1918 г. у в. Новы Свержань Мінскага павета ў Расійскай імперыі (сёння — Стаўбцоўскі раён Мінскай вобласці) у сям’і Васіля і Сафіі Шчорсаў. Меў братоў — Мікалая і Барыса.

У Другую сусветную вайну падчас нямецкай акупацыі спачатку працаваў у аддзеле дакументаў гарадской управы ў Мінску, а потым стаў начальнікам мінскай крымінальнай паліцыі. Грамадскі дзеяч Антон Шукелойць згадваў, што быў сведкам, як Ігар Шчорс выпісваў дакументы і пропускі яўрэйскім дзецям на выезд з Мінска, каб яны маглі ўратавацца.

У 1944 г. — камандзір 27-га батальёна Беларускай краёвай абароны. Летам таго ж года выехаў у Германію. З восені 1944 г. усе Шчорсы разам з жонкамі апынуліся ў Берліне. Сябра Замежнага Сектару Цэнтральнага Камітэту Беларускай незалежніцкай партыі, мянушка «Палын».

Пасля вайны жыў у лагеры ў Міхельсдорфе, камендантам якога быў ягоны брат Барыс, належаў да тэатральнай трупы «Жыве Беларусь!» Вячаслава Селях-Качанскага. У Міхельсдорфе памёр бацька Васіль Шчорс (жонка Сафія перажыла яго на 34 гады).

У 1948 г. выходзіць пастанова амерыканскіх акупацыйных уладаў, што праца лагераў паступова павінна была згортвацца, а іх насельнікі паступова рыхтавацца да выезду ў іншыя краіны. У 1949 г. выехаў у ЗША. Жыў у Саўт-Рыверы. Маці Сафія Шчорс арганізавала ў Саўт-Рыверы нефармальны беларускі дзіцячы сад. Браў актыўны ўдзел у жыцці парафіі і грамадска-культурных арганізацый. Належаў да БККА. Узяў удзел у апошнім Пленуме БЦР у 1988 г.

Памёр 12 кастрычніка 1992 г. у Саўт-Рыверы ў ЗША.