Алесь Дубровіч

Алесь Дубровіч
Асабістыя звесткі
Дата нараджэння	1910
Месца нараджэння	Галубічы, Дзісенскі павет, Віленская губерня, Расійская імперыя
Дата смерці	7 лістапада 1942(1942-11-07)
Месца смерці	Галубічы, Галубіцкі сельсавет, Пліскі раён, Вілейская вобласць, Беларуская ССР, СССР
Грамадзянства	БНР  Польская Рэспубліка Беларуская ССР
Месца працы	Чырвоны сцяг
Прафесійная дзейнасць
Род дзейнасці	паэт, журналіст
Мова твораў	беларуская
Творы ў Вікікрыніцах

Алесь Дубровіч, сапр. Аляксей Рыгоравіч Рэдзька (1910, в. Галубічы Дзісенскага павета Віленскай губерні, цяпер в. Каралевічы, Глыбоцкі раён, Віцебская вобласць — 7 лістапада 1942, Глыбоччына) — беларускі паэт.

Друкавацца пачаў у 1928 годзе (карэспандэнцыі ў газеце «Доля працы»). У 1933 годзе апублікаваны яго першы верш «Беларусь». Удзельнік 1-га нелегальнага з’езда заходнебеларускіх пісьменнікаў (Вільня, 1933). Арыштаваны польскімі ўладамі ў 1934 годзе за падпісанне і публікацыю «Дэкларацыі групы паэтаў да ўсіх пісьменнікаў Заходняй Беларусі». Два з паловай гады без суда правёў у віленскай турме на Лукішках. Палітвязні выдавалі рукапісны часопіс «Краты», дзе ён змяшчаў свае творы пад псеўданімамі Макар і Мікіта. Пасля вызвалення ў 1936 годзе ўзяў псеўданім «Алесь Дубровіч». Актыўна друкаваўся ў заходнебеларускіх перыядычных выданнях («Беларускі летапіс», «Калоссе»).

У кастрычніку 1939 года быў дэлегатам Народнага сходу ў Беластоку. У 1940 годзе пасля з’яднання Заходняй Беларусі з БССР працаваў карэспандэнтам газеты «Вілейская праўда».

У гады вайны ў антыфашысцкім падполлі. Быў арыштаваны ў канцы лістапада 1942 года акупацыйнымі ўладамі; расстраляны.

Памяць ушанаваная на помніку каля в. Галубічы Глыбоцкага раёна, на месцы расстрэлу^[1].

Дзед вядомага дудара, музыканта і майстра народных інструментаў Дзмітрыя Дзёміна.

• У кн.: Сцягі і паходні. Мн., 1965;
• Крывёю сэрца. Мн., 1967;
• Радзіме — радок і жыццё. Мн., 1986.

• Помнік на месцы расстрэлу патрыётаў, непадалёк ад вёскі Галубічы.
• Адна з вуліц горада Глыбокае носіць імя Алеся Дубровіча.
• У 2012 годзе ў Глыбокім была адкрыта Алея гонару, на якой устаноўлены бюст паэта^[2].

• Рэпрэсаваныя літаратары, навукоўцы, работнікі асветы, грамадскія і культурныя дзеячы Беларусі. Энцыклапедычны даведнік у 10 тамах (15 кнігах). Т. 1. Абрамовіч—Кушаль. / Укладальнік Л. У. Маракоў. — Смаленск, 2003. — 480 с. — ISBN 985-6374-04-9.