Анатоль Міхайлавіч Кашталапаў

Анатоль Міхайлавіч Кашталапаў
альтэрн.: Анатоль Міхайлавіч Кашталапаў
Дата нараджэння	20 ліпеня 1948(1948-07-20)
Месца нараджэння	Магілёў, Магілёўская вобласць, Беларуская ССР, СССР
Дата смерці	25 снежня 2018(2018-12-25) (70 гадоў)
Краіна	СССР  Беларусь
Альма-матар	Магілёўскае вучылішча культуры імя Н. К. Крупскай
Месца працы	Народны хор імя Г. І. Цітовіча Харошкі
Музычная дзейнасць
Прафесіі	мульціінструменталіст, танцор
Інструменты	баян[d], гармонік[d], дудка, акарына, флейта і жалейка
Грамадская дзейнасць
Член у	Беларускі саюз кампазітараў
Узнагароды	Нагрудны знак «За ўклад у развіццё культуры Беларусі» (2003) ганаровая грамата Нацыянальнага сходу Рэспублікі Беларусь (2011) Ганаровая грамата Мінскага гарадскога выканаўчага камітэта[d] (2017)

Анато́ль Міха́йлавіч Каштала́паў (20 ліпеня 1948, Магілёў, БССР — 25 снежня 2018) — беларускі танцоўшчык і музыкант, мастацкі кіраўнік беларускага дзяржаўнага ансамблю народнай музыкі «Свята». Заслужаны артыст Беларусі.

Бацька — родам з Сібіры, каваль; маці — з Магілёўшчыны^[1]. Анатоль займаўся ігрой на баяне ў Доме піянераў, хадзіў у харэаграфічны гурток пры Магілёўскім металургічным заводзе^[2]. Пасля навучаўся ў Магілёўскай культпрасветвучылішча імя Крупскай на танцавальным аддзяленні.

Вайсковую службу праходзіў у музычнай роце ў Асіповічах, дзе навучаўся ігры на флейце, граў у зводным аркестры Беларускай ваеннай акругі. Пасля працаваў у саўгасе «Вейна» мастацкім кіраўніком самадзейнасці^[2].

У 1970 годзе пераехаў у Мінск на запрашэнне Белдзяржфілармоніі, дзе трапіў у трупу балету Дзяржаўнага народнага хору Беларусі пад кіраўніцтвам Генадзя Цітовіча^[3].

Пасля заснавання ў 1974 годзе ўвайшоў у склад ансамблю «Харошкі» пад кіраўніцтвам Валянціны Гаявой; акрамя танцаў і ігры на музычных інструментаў, захапіўся збіраннем фальклору. У ансамблі пазнаёміўся з сваёй будучай жонкай Святланай^[4].

З 1988 года — артыст балету ў ансамблі «Свята», з 2001 і да скону — яго мастацкі кіраўнік. Пасля сыходу з «Харошак» першы шлюб, у якім з Святланай мелі дачку, распаўся^[4]. Другая жонка — Ганна Пухнарэвіч.

Член Саюза кампазітараў Беларусі.

Разнапланавы музыка-мультыінструменталіст. Валодаў майстэрствам грання на акарыне, баяне, гармоніку, дудках, жалейцы, флейце. Ад Вячаслава Пратасевіча пераняў уменне грання на саломінцы.

За 48 гадоў творчай дзейнасці здзейсніў мноства фальклорных экспедыцый. На аснове сабранага ў розных рэгіёнах Беларусі і апрацаванага ім фальклору стварыў музычна-харэаграфічную («Музыкі граюць») і песенна-музычную («Застольная») кампазіцыі, танцы і інш^[5].

• Заслужаны артыст Беларусі (1983)
• Нагрудны знак Міністэрства культуры Рэспублікі Беларусь (2003)
• Ганаровая грамата Нацыянальнага сходу Рэспублікі Беларусь (2011)
• Ганаровая грамата Мінскага гарадскога выканаўчага камітэта (2017)

Правобраз маладога Анатоля Кашталапава намаляваны ў мазаічных пано на фасадзе дамоў насупраць Нацыянальнай бібліятэкі Беларусі^[5].

• Кашталапаў Анатоль Міхайлавіч // Беларуская энцыклапедыя: У 18 т. Т. 8: Канто — Кулі / Рэдкал.: Г. П. Пашкоў і інш. — Мн. : БелЭн, 1999. — Т. 8. — 576 с. — 10 000 экз. — ISBN 985-11-0035-8. — ISBN 985-11-0144-3 (т. 8).
• Кашталапаў Анатоль Міхайлавіч // Культура Беларусі: энцыклапедыя / рэдкал.: У. Ю. Аляксандраў (гал. рэд.) [і інш.]. — Мн.: Беларус. Энцыкл. імя П. Броўкі, 2013. — Т. 4. — 661 с. — 3 000 экз. — ISBN 978-985-11-0746-5.
• Республика Беларусь: Энциклопедия в 7 т. Т. 4.: Картография — Миноговые / редкол. Г. П. Пашков и др. — Минск: БелЭн, 2007. — 768 с. — ISBN 978-985-11-0385-6

• Майстры і куміры. Заслужаны артыст Рэспублікі Беларусь Анатоль Кашталапаў на YouTube // Беларусь 3
• Анатоль Міхайлавіч Кашталапаў на сайце анлайн-энцыклапедыі «Беларусь у асобах і падзеях»
• Вольная энцыклапедыя Магілёва (руск.)