Афара-самалійскія сутыкненні

Арома-самалійскія сутыкненні
Асноўны канфлікт: Грамадзянскі канфлікт у Эфіопіі
Дата	з кастрычніка 2020
Месца	мяжа паміж эфіопскімі рэгіёнамі Афар і Самалі, эпізадычна Джыбуці
Прычына	тэрытарыяльная спрэчка
Статус	працягваецца
Праціўнікі
Афар Самалі
Камандуючыя
Авол Арба Ундэ Мустафа Мухумед Амар
Агульныя страты
звыш 445 забітых да 9 лістапада 2022[1][2][3]

Афара-самалійскія сутыкненні — тэрытарыяльны канфлікт паміж эфіопскімі штатамі Афар і Самалі.

У 2010-х гадах паміж штатамі паўсталі супярэчнасці адносна прыналежнасці трох вясковых абшчын (самыя дробныя адзінкі адміністрацыйнага падзела Эфіопіі, якія аб’ядноўваюць групы вёсак) населеных этнічнымі самалійцамі з клана Іса. Спрэчнымі сталі паселішчы Адайту (афар.: Qadaytu, самал.: Cadayto) абшчыны Міле, Кундуфо (афар.: Qundafaqo, самал.: Cundhufo), Геваі і Гедамайту (афар.: Gadamaytu, самал.: Garba-Ciise) абшчыны Амібара^[1][4].

У 2014 годзе федэральны ўрад на чале з Рэвалюцыйна-дэмакратычным фронтам эфіопскага народа перакраіў мяжу паміж двума рэгіёнамі. У выніку рэгіён Самалі саступіў Афару тры вёскі^[5].

Першыя сутыкненні адбыліся ў кастрычніку 2020 года, забраўшы з сабой жыцці 27 чалавек^[6].

Наступная буйная сутычка здарылася 2 красавіка 2021 года, калі былі забіты 100 пастухоў^[7].

24 ліпеня ўспыхнулі баі ў горадзе Гарбаіса, у выніку якіх загінулі 300 чалавек. Услед рушылі масавыя пратэсты ў самалійскім рэгіёне. Адзіная дарога, якая вядзе са спрэчнага паселішча, была заблакавана, а чыгуначная лінія, якая вядзе ў Джыбуці (па ёй праходзіць 95% марскога гандлю Эфіопіі), была часткова разбурана^[8].

1 жніўня канфлікт распаўсюдзіўся на Джыбуці, дзе адбыліся сутыкненні паміж афарцамі і самалійцамі ў прыгарадзе горада Джыбуці Бальбала^[9]. Пасольства ЗША паведамляла аб беспарадках таксама ў раёне Архіба^[10]. Сутычкі прывялі да гібелі двух чалавек^[9].

15 мая 2022 года рэгіёны Самалі і Афар пагадзіліся вывесці свае ўзброеныя апалчэнні са спрэчнай тэрыторыі і падтрымаць вяртанне перамешчаных асоб^[11]. Тым не менш, 9 лістапада таго ж года па меншай меры 18 чалавек былі забіты і каля 28 атрымалі раненні ў абшчыне Дхеймід, зона Сіты^[3].

27 сакавіка 2023 года пратэстоўцы ў Самалі заблакавалі чыгунку Эфіё—Джыбуці, мяркуючы, што сілы нацыянальнай абароны Эфіопіі «ўскосна падтрымліваюць» рэгіён Афар у памежнай спрэчцы. Мясцовыя ўлады пераканалі натоўп разблакаваць дарогу, але неўзабаве пасля гэтага вайскоўцы «раптам адкрылі агонь» і забілі траіх пратэстоўцаў, параніўшы яшчэ 6^[12]. Праз некалькі дзён, 30 сакавіка, з’явіліся паведамленні, што групы апалчэнцаў сутыкнуліся ў раёнах, прылеглых да чыгункі^[13].