Васіль Фёдаравіч Чарвакоў

Васіль Фёдаравіч Чарвакоў
Васіль Фёдаравіч Чарвакоў
	руск.: Черваков Василий Фёдорович
Дата нараджэння	4 (16) красавіка 1894
Месца нараджэння	Канабеева[d], Шацкі павет[d], Тамбоўская губерня, Расійская імперыя;
Дата смерці	3 студзеня 1976 (81 год)
Месца смерці	Масква, РСФСР, СССР;
Месца пахавання	Масква;
Грамадзянства	Расійская імперыя, СССР
Род дзейнасці	навуковец
Навуковая сфера	судова-медыцынская экспертыза
Месца працы	БДУ; БДМУ; Смаленскі дзяржаўны ўніверсітэт; Беларускі дзяржаўны інстытут крыміналогіі, крыміналістыкі і судовай экспертызы[d]; Першы маскоўскі дзяржаўны медыцынскі ўніверсітэт імя І. М. Сечанава[d]; Смаленскі дзяржаўны медыцынскі ўніверсітэт[d];
Навуковая ступень	доктар медыцынскіх навук
Навуковае званне	прафесар
Альма-матар	медыцынскі факультэт Маскоўскага ўніверсітэта[d] (1917);
Навуковы кіраўнік	Іван Трафімавіч Цітоў
Узнагароды	;

Васіль Фёдаравіч Чарвако́ў^[1] (руск.: Черваков Василий Фёдорович; 4 (16) красавіка 1894 — 3 студзеня 1976) — вучоны ў галіне судова-медыцынскай экспертызы, доктар медыцынскіх навук (1935), прафесар (1936). Заслужаны дзеяч навукі РСФСР (1955).

Біяграфія

Нарадзіўся ў сяле Канабеева Шацкага павета Разанскай губерні (зараз у Разанскай вобласці Расіі). У 1917 годзе скончыў медыцынскі факультэт Маскоўскага ўніверсітэта. У 1917—1924 гг. у Чырвонай Арміі, ваенны ўрач на Заходнім фронце. У 1924—1928 гг. працаваў празектарам кафедраў паталагічнай анатоміі і судовай медыцыны ў Беларускім дзяржаўным універсітэце, у 1928—1930 гг. на пасадзе дацэнта, у 1930—1939 гг. — загадчыка кафедрай^[2]. Таксама працаваў у Смаленскім універсітэце^[3]. У 1934 годзе абараніў доктарскую дысертацыю, прысвечаную «паталогіі вінтоўкі» ў адносінах да судова-медыцынскай экспертызы і крыміналістыкі^[2]. З 1936 года — прафесар кафедры. У 1933 годзе пад кіраўніцтвам В, Ф. Чарвакова быў створаны Беларускі навукова-даследчы інстытут судовай медыцыны і крыміналістыкі Народнага камісарыята юстыцыі БССР. Адначасова займаў пасады загадчыка і галоўнага судова-медыцынскага эксперта Цэнтральнай судова-медыцынскай лабараторыі Народнага камісарыята аховы здароўя БССР^[2].

У 1938^[3] годзе В. Ф. Чарвакоў пераехаў у Маскву, дзе ў 1939—1962 гг. займаў пасаду загадчыка, у 1962—1976 гг. кансультанта кафедры судовай медыцыны Першага Маскоўскага медыцынскага інстытута.

У 1945 годзе ўваходзіў у склад Надзвычайнай дзяржаўнай камісіі па выяўленні і расследаванні злачынстваў нямецка-фашысцкіх захопнікаў і іх саўдзельнікаў і прычыненых імі страт на тэрыторыі Беларусі.

Памёр і пахаваны ў Маскве^[2].

Навуковая дзейнасць

В. Ф. Чарвакову належаць навуковыя працы па судовай балістыцы, судова-медыцынскай гельмінталогіі і дэанталогіі. Таксама займаўся пытаннямі цяжкасці цялесных пашкоджанняў, раптоўнай смерці, таксікалогіі, гісторыі судовай медыцыны ў СССР і за мяжой.

Аўтар больш за 100 навуковых прац, апублікаваных у СССР і за мяжой, у тым ліку першай айчыннай манаграфіі «Судебная баллистика» (1937), манаграфіі «Судебно-медицинская деонтология» (1957). Падрыхтаваў 5 дактароў і 30 кандыдатаў навук^[2]. Уваходзіў у склад прэзідыума Усесаюзнага навуковага таварыства судовых медыкаў і рэдакцыйнай калегіі часопіса «Судебно-медицинская экспертиза»^[2].

Сярод апублікаванага:

Пытанні патагенезу і паталогіі аскарыдозу па даных эксперыменту (1928);
Слуцкія муміі (1932);
Да крыміналістычнага вывучэння зброі тэрарыстычных актаў (1932);
К вопросу о криминалистической экспертизе выстрелов, оружия и боеприпасов по делам об убийствах и ранениях огнестрельным оружием (1938);
Судебная медицина. 3 изд. — М., 1963. (разам з У. М. Смальянінавым і К. І. Таціевым);
Інструкцыя «О даче заключения врачами-экспертами» (у сааўтарстве).

Узнагароды і званні

Ордэн Леніна (1955),
значок «Выдатніку аховы здароўя» Міністэрства аховы здароўя СССР,
Заслужаны дзеяч навукі РСФСР (1955),
медалі.

Зноскі

↑ Беларуская энцыклапедыя: У 18 т. Т. 17: Хвінявічы — Шчытні / Рэдкал.: Г. П. Пашкоў і інш. — Мн. : БелЭн, 2003. — Т. 17.
↑ ^а ^б ^в ^г ^д ^е Червяков Василий Федорович (04(16).04.1894-03.01.1976) Архівавана 17 лістапада 2019. (руск.) // Сайт БДМУ
↑ ^а ^б Черваков Василий Федорович // Кто есть Кто в судебной медицине. (руск.)

Літаратура

Чарвакоў Васіль Фёдаравіч // Беларуская энцыклапедыя: У 18 т. Т. 17: Хвінявічы — Шчытні / Рэдкал.: Г. П. Пашкоў і інш. — Мн. : БелЭн, 2003. — Т. 17. — С. 223. — 10 000 экз. — ISBN 985-11-0035-8. — ISBN 985-11-0279-2 (т. 17).