Віктар Іванавіч Цярэшчанка

Віктар Іванавіч Цярэшчанка
Віктар Іванавіч Цярэшчанка
Род дзейнасці	эканаміст, палітык, механік, інжынер
Дата нараджэння	30 студзеня 1950 (75 гадоў)
Месца нараджэння	Дубраўка, Палужскі сельсавет, Краснапольскі раён, Магілёўская вобласць, Беларуская ССР, СССР;
Грамадзянства	Беларусь;
Альма-матар	эканамічны факультэт ГДУ імя Ф. Скарыны (1975); Міжнародны інстытут менеджменту[d]; Дэлавэрскі дзяржаўны ўніверсітэт;
Партыя	Беларуская народная партыя (1999);

Віктар Іванавіч Цярэшчанка (нар. 30 студзеня 1950(1950-01-30), Дубраўка, Магілёўская вобласць) — беларускі палітык, кандыдат эканамічных навук^[1], кандыдат на пасаду прэзідэнта Рэспублікі Беларусь на выбарах 2010 года.

Біяграфія

Нарадзіўся 30 студзеня 1950 года ў вёсцы Дубраўка Краснапольскага раёна Магілёўскай вобласці ў сялянскай сям’і. Беларус.

У 1975 годзе скончыў эканамічны факультэт Гомельскага дзяржаўнага ўніверсітэта. Навучаўся ў Міжнародным інстытуце менеджменту (Кіеў, Украіна), Дэлавэрскім універсітэце (ЗША). У 1990 годзе атрымаў навуковую ступень МВА — Master of Business Administration in International Business Activities. Працаваў слесарам, фрэзэроўшчыкам, інжынерам.

У 1992—2004 гадах — генеральны дырэктар СТАА «Міжнародны інстытут менеджменту «МІМ-Беларусь»».

У 1993—2004 гадах — старшыня Беларускага грамадскага аб’яднання «Народная дыпламатыя».

У 1994—2000 гадах — старшыня Беларускай народнай партыі.

На выбарах Прэзідэнта Рэспублікі Беларусь 1994 года была зарэгістравана ініцыятыўная група па зборы подпісаў за Цярэшчанку, аднак у Цэнтральную камісію Рэспублікі Беларусь па выбарах і правядзенні рэспубліканскіх рэферэндумаў подпісы не былі здадзены і ён не быў вылучаны ў якасці кандыдата.

Са жніўня па верасень 1994 года — начальнік упраўлення па справах тэрыторый Адміністрацыі Прэзідэнта Рэспублікі Беларусь.

Дэпутат Вярхоўнага Савета Рэспублікі Беларусь 13-га склікання^[2].

На выбарах Прэзідэнта Рэспублікі Беларусь 2001 года ізноў была зарэгістравана ініцыятыўная група па зборы подпісаў за Цярэшчанку, аднак колькасць зданых подпісаў была недастатковай і яму было адмоўлена ў рэгістрацыі кандыдатам.

У 2004—2005 гадах — кіраўнік прадстаўніцтва аўтаномнай некамерцыйнай міжнароднай арганізацыі «Выканкам Рады славянскіх народаў Беларусі, Расіі, Украіны» ў Рэспубліцы Беларусь.

На выбарах Прэзідэнта Рэспублікі Беларусь 2010 года ініцыятыўная група па зборы подпісаў за Цярэшчанку сабрала дастатковую колькасць подпісаў і ён быў зарэгістраваны кандыдатам, аднак на выбарах набраў толькі 1,19 % галасоў.

Працуе старшынёй Савета Асацыяцыі малога і сярэдняга прадпрымальніцтва.

Аўтар больш за 70 навуковых і іншых работ па праблеме развіцця Беларусі^[2]. Удзельнік ліквідацыі наступстваў аварыі на Чарнобыльскай АЭС.

Жанаты, мае трох дачок.