Дробная пластыка

Дробная пла́стыка — галіна скульптуры малых формаў^[1], адзін з самых распаўсюджаных і асабліва папулярных відаў скульптурнага мастацтва^[2]. Вылучаецца невялікімі памерамі, дэталёвай прапрацоўкай формы і ярка выяўленымі дэкаратыўнымі якасцямі^[2].

Дробная пластыка шырэйшая за іншыя віды скульптуры і выкарыстоўваецца з найстаражытнейшых часоў у паўсядзённым жыцці чалавека. Да яе належаць фігуркі людзей і жывёл (у тым ліку рытуальнага прызначэння), творы карапластыкі, гліптыкі, медальернага мастацтва, медальёны, плакеткі, амулеты, японскія нецке, часткова — цацкі і іншыя вырабы^[1].

Дробная пластыка ўзнікла яшчэ на самым раннім этапе развіцця чалавечай цывілізацыі. Яе ўзоры выяўлены падчас археалагічных раскопак старажытных паселішчаў. Гэта, у першую чаргу, вырабы з абпаленай гліны, а таксама разьба па дрэве, косці і камені, якія адрозніваюцца мініяцюрнасцю і выразнай дэкаратыўнасцю^[2].

У сучасным выяўленчым мастацтве дробная пластыка можа прадстаўляць сабой статуэтку, жанрава-побытавую кампазіцыю, настольны партрэтны бюст, выяву жывёльнага свету або спецыяльна выкананую мадэль помніка ў маштабе (у тым ліку як сувенір)^[2].

Асаблівасці

Дробная пластыка выкарыстоўвае ўвесь спектр матэрыялаў, уласцівых скульптурнаму мастацтву: гліна (у тым ліку тэракота і кераміка), дрэва, камень, косць, металы і іх сплавы (напрыклад, бронза, чыгун і інш.), шкло і многае іншае^[1]. Яна ахоплівае надзвычай шырокі спектр вырабаў па функцыянальным прызначэнні, што вызначае вялікую разнастайнасць мастацкіх тэхналогій і матэрыялаў. Маленькія памеры скульптур уплываюць на спецыфіку іх выяўленчай мовы^[2].

Камерныя памеры і магчымасць шматбаковага ўспрымання з блізкай адлегласці набліжаюць дробную пластыку да станковага мастацтва, а дакладная прапрацоўка дэталяў і дэкаратыўнае выкарыстанне колеру і фактуры — да дэкаратыўна-прыкладнога і ювелірнага мастацтва^[1].

Творы гэтага віду пластычнага мастацтва могуць размяшчацца ў любым асяроддзі і пры розным асвятленні — напрыклад, фарфор ці народныя цацкі часта стала прысутнічаюць у дэкаратыўным афармленні выставачных прастораў, сярод рэчаў дамашняй абстаноўкі і г. д^[2].