Змяшаная рэальнасць

Змяшаная рэальнасць (англ.: mixed reality, MR) або гібрыдная рэальнасць — тэхналогія, якая з дапамогай спецыялізаваных камп’ютарных прылад робіць магчымым зліццё рэальнага і віртуальнага светаў. Змяшаная рэальнасць дазваляе ствараць прынцыпова новыя ўмовы для візуалізацыі, калі фізічныя і лічбавыя аб’екты суіснуюць і ўзаемадзейнічаюць у рэальным часе.

Многія эксперты спрабуюць увесь час удакладняць значэнне тэрмінаў і вылучаць межы пераходу ад рэальнага да віртуальнага свету. Нягледзячы на тое, што нейкіх агульных стандартаў пакуль не існуе, умоўна можна выкарыстоўваць наступнае раздзяленне:

• Рэальны свет: чалавек успрымае самастойна, без дадатковых гаджэтаў і тэхналогій.
• Віртуальная рэальнасць (VR): цалкам адсякае чалавека ад рэальнага свету, для асобы існуе толькі малюнак, спраектаванае асяроддзе.
• Дапоўненая рэальнасць (AR): часткова замяняе рэальны свет, на існуючы свет (па-над ім) накладваецца віртуальны малюнак. Дапоўненая рэальнасць не дае адчування рэальнага размяшчэння і ўзаемадзеяння аб’ектаў з навакольным светам.
• Змяшаная рэальнасць (MR): працуе аналагічна дапоўненай рэальнасці, але, у адрозненне ад яе, дазваляе бачыць узаемадзеянне рэальных і віртуальных аб’ектаў. Напрыклад, чалавек можа ацаніць, дзе пярэдні, а дзе задні план, як аб’екты размешчаны адносна адзін аднаго, ёсць кропкі судакранання рэальных і віртуальных аб’ектаў.

Змяшаная рэальнасць выкарыстоўваецца ў мастацтве, індустрыі забаў і іншых галінах і сферах паўсядзённага жыцця. Напрыклад, у гандлі пры пераходзе статычных каталогаў тавараў да інтэрактыўных копій, для навучання вайскоўцаў (у тым ліку навучанне пілотаў самалетаў), у медыцыне (візуалізацыі пры аперацыях) і інш.

• Віртуальная рэальнасць

• De Souza e Silva A. Digital Cityscapes: merging digital and urban playspaces. — New York: Peter Lang Publishing.— 2009, ISBN 978-1433105326

	Змяшаная рэальнасць на Вікісховішчы