Краіна Вымярэнія

Краіна Вымярэнія
Жанр	Адукацыйная казка
Аўтар	Алег Грушэцкі
Дата першай публікацыі	2019
Выдавецтва	Кнігазбор
Колькасць старонак	26[1]
Ілюстратар	Віктар Козел
Электронная версія
ISBN	978-985-7227-01-3

«Краіна Вымярэнія» — адукацыйна-дыдактычная^[2] казка пра спосабы і адзінкі вымярэння. Аўтар кнігі — Алег Грушэцкі, ілюстратар — Віктар Козел^[3]. Выдавецтва «Кнігазбор», 2019 год. Для дзяцей дашкольнага і малодшага школьнага ўзросту^[4][5].

Вонкавыя відэафайлы
	Буктрэйлер кнігі

Кніга была выдадзена ў 2019 годзе і падрыхтавана адмыслова да пачатку навучальнага года з мэтай дапамагчы маленькiм школьнiкам хутчэй i не сумна засвоiць адзiнкi вымярэння^[6]. Для беларускага кніжнага рынка кніга стала па свойму унікальнай^[7].

Прэзентацыя кнігі адбылася 10 лістапада 2019 года на курсах беларускай мовы «Мова Нанова Дзеткам»^[8].

У 2023 годзе кніга была прафесійна агучана аўдыёпраектам «Кніжны воз»^[9].

Праз казачныя гісторыі ў займальнай і даступнай форме^[10] дзеці маюць магчымасць даведацца пра спосабы і адзінкі вымярэння (даўжыня, шырыня, вышыня), вагі і аб’ёму (кілаграмы, літры), адзінкі вымярэння часу (гадзіны, хвіліны), а дзякуючы беларускім прымаўкам і прыказкам спазнаюць і лепш запомняць, чым адрозніваюцца месяцы і поры года^[11].

Веды ў кнізе пададзены праз казачныя апавяданні, дзе галоўныя героі — насельнікі казачнага лесу (мядзведзь, вожык, зайка, ліска, лось, вавёркі і інш.). Кожнае апавяданне сканчаецца лагічным пераходам у наступную тэму, утвараючы такім чынам адзінае арганічнае цэлае, дзе ўсе гісторыі паміж сабою лагічна злучаны^[12].

Яскравыя пазнавальныя ілюстрацыі дапамагаюць дзецям лепш засвоіць веды, якія спатрэбяцца ў дарослым жыцці^[5][6]. З дапамогай дадзенай кнігі дзецям лягчэй і цікавей засвойваць адзiнкi вымярэння^[13].

1. Даўжыня.
2. Шырыня і вышыня.
3. Вага.
4. Літр, вымярэнне аб’ёму.
5. Час.
6. Каляндар^[5].

Вонкавыя відэафайлы
	Як запісвалася аўдыёкніга «Краіна Вымярэнія»

У 2023 годзе кніга «Краіна Вымярэнія» была прафесійна агучана аўдыёпраектам «Кніжны воз». 7 верасня 2023 года аўдыёкніга «Краіна Вымярэнія» з'явілася ў вольным доступе на старонцы праекта^[9]. Голас Вожыка, аднаго з герояй кнігі, увайшоў у «Залатую калекцыю галасоў» праекта «Кніжны воз». Агучыла кнігу актрыса тэатра і кіно Крысціна Дробыш, аўтар музыкі — Алег Удалееў^[14][15].

• 2019 год — кніга ўвайшла ў ТОП-10 лепшых кніг для дзяцей на беларускай мове (па версіі TUT.BY)^[16].
• 2020 год — кніга ўвайшла ў лонг-ліст «Прэміі Цёткі—2019» у намінацыях «Найлепшая кніга для дзяцей і падлеткаў» і «Найлепшае мастацкае афармленне»^[17].
• 2020 год — кніга ўвайшла ў ТОП-12 найлепшых беларускіх дзіцячых выданняў^[18][19].
• 2022 год — кніга ўвайшла ў рэкамендаваны беларускім дзіцячым часопісам «Жэўжык» спіс кніг да чытання для дзяцей 6—9 гадоў^[20].
• 2023 год — аўтар рубрыкі «Кніжная паліца» пісьменніца Алена Масла ўнесла кнігу ў спіс «Навагоднія зборнікі беларускіх пісьменнікаў, якія варта пачытаць»^[13].
• 2023 год — ІІ месца праслухоўванняў на аўдыёпраекце «Кніжны воз», увайшла ў ТОП-10 кніг лідараў праслухоўванняў па выніках на канец 2023 года^[21].

• Рублеўская, Л. І. Измерение вечной дороги (Алег Грушэцкі. Краіна Вымярэнія) // СБ. Беларусь сегодня : газета. — 6 верасня 2019. — В. 25807. — № 169.
• Будовіч, Я. Краіна, адмераная тройчы // Літаратура і мастацтва : газета. — Мн.: РВУ «Звязда», 13 верасня 2019. — В. 5042. — № 36. — С. 7.
• Рублеўская, Л. І. Якую кнігу пакласці дзіцяці пад ёлачку? Топ-12 беларускіх дзіцячых выданняў — 2020 (Алег Грушэцкі. «Краіна Вымярэнія») // Звязда : газета. — Мн.: РВУ «Звязда», 30 снежня 2020. — В. 29368. — № 254. — С. 5.

• «Краіна Вымярэнія»: сакавітай беларускай мовай дзеткам — пра спосабы і адзінкі вымярэння (нявызн.). Будзьма беларусамі! (19 верасня 2019). Праверана 11 лістапада 2019.