Хімічная раўнавага

Хімі́чная раўнава́га — тэрмадынамічная раўнавага ў сістэме, у якой адбываюцца толькі абарачальныя рэакцыі.

Макраскапічныя параметры стану сістэмы (тэмпература, ціск, канцэнтрацыя рэчываў) пры хімічнай раўнавазе не залежаць ад часу.

Хімічная раўнавага ўстанаўліваецца, калі скорасці прамой і адваротнай рэакцый становяцца роўнымі (гл. закон дзейных мас).

Умова раўнавагі любой хімічнай рэакцыі паказваецца суадносінамі

${\displaystyle \sum _{i}\nu _{i}\mu _{i}=0}$

(дзе μ_i — хімічны патэнцыял рэчываў, якія ўдзельнічаюць у рэакцыі, ν_i — стэхіяметрычныя каэфіцыенты — дадатныя для зыходных рэчываў і адмоўныя для прадуктаў) і выводзіцца з любой умовы тэрмадынамічнай раўнавагі.

Суадносіны паміж канцэнтрацыямі рэчываў у сістэме пры хімічнай раўнавазе вызначаюцца канстантай раўнавагі, якая залежыць ад прыроды рэагуючых рэчываў і ад тэмпературы. Якасная залежнасць хімічнай раўнавагі ад знешніх умоў апісваецца прынцыпам Ле Шатэлье — Браўна.

• Хімічная тэрмадынаміка

• Раўнавага хімічная // Беларуская энцыклапедыя: У 18 т. Т. 13: Праміле — Рэлаксін / Рэдкал.: Г. П. Пашкоў і інш. — Мн. : БелЭн, 2001. — Т. 13. С. 376.