Час мяняць лысую гуму!

«Час мяняць лысую гуму!» (руск.: «Пора менять лысую резину!») — беларускі палітычны лозунг. Быў прыдуманы ў 2010 годзе і актыўна выкарыстоўваўся на акцыях пратэсту 2010, 2020 і 2021 гадоў. Лозунг выкарыстоўвае метафару, у якім «лысая гума» параўноўваецца з галавой Аляксандра Лукашэнкі.

Лозунг быў прыдуманы кандыдатам на пасаду прэзідэнта Беларусі Андрэем Саннікавым у 2010 годзе^[1][2]. Ён стаў адным з асноўных слоганаў на «Плошчы 2010» ў Мінску^[3]. Заклікі «мяняць лысую гуму» гучалі на акцыях пратэсту ў 2015 годзе^[4]. Ізноў лозунг з’явіўся на маніфестацыях 2020 і 2021 года^[5][6][7]. Слоган таксама скандаваўся на акцыях салідарнасці беларускай дыяспары ў Кіеве і Варшаве ў 2021 годзе^[8].

У лозунгу выкарыстоўваецца моўная гульня, іронія і метафара. У ім «лысая гума» параўноўваецца да галавы Аляксандра Лукашэнкі. Таксама лозунгам ствараецца супрацьпастаўленне «варты — няварты», дзе новы прэзідэнт з’яўляецца больш годным, чым папярэдні. Слоган уздзейнічае шляхам ускоснага зварота, паколькі прамая форма можа ўспрымацца агрэсіўна^[9].

Партал UDF.BY назваў слоган самым яскравым і вобразным з усіх дзесяці пасланняў, з якімі кандыдаты ў прэзідэнты звярталіся да электарату на выбарах у Беларусі 2010 года^[10].

• Ekaterina Palekha, Ilsoyar Sadykova, Evgenia Zhuravleva Linguistics of indirect influence as a language game in socio-political discourse(англ.) // Herald NAMSCA. — 2018. — № 3.
• Żanna Sładkiewicz Эстетика и прагматика коммуникации в протестном дискурсе (интерсемиотический анализ белорусских кейсов 2020–2021 гг.)(руск.) // Przegląd Rusycystyczny. — 2022. — № 4. — ISSN 0137-298X.