Проект „Агроекспедиции“ — проект на здружението на граѓани „Споделено знаење“ и Википедија на македонски јазик. Проектот има за цел да помогне во подобрување на постоечките и создавање на нови статии за земјоделството на македонски јазик од страна на активните корисници и уредувачи, како и самите членови на здружението. Агроекспедициите се спроведуваат преку организирани посети на земјоделски подрачја заради обезбедување на информации и фотографии, создавање на нови статии и подобрување на постоечките за земјоделски растенија и култури и добиток кои се одгледуваат, земјоделски работи, дејности и земјоделски циклуси (орање, сеидба, жетва, берба, гроздобер, цутење, зреење, стриг), земјоделска механизација, машини и алати/орудија, земјоделски преработки и видови на готови преработени домашни и индустриски прехранбени производи.
Критериуми за избор на област
Областите што се опфатени со проектот се избрани врз основа на два критериума:
број на статии на Википедија на македонски јазик на теми поврзани со областа;
број на различни фотографии на Ризницата на теми поврзани со областа.
