ISO 639-6

ISO 639-6 (Кодови за претставување на имињата на јазиците — Дел 6: алфа-4 код за сеопшт опфат на јазичните варијанти) — предложен меѓународен стандард во низата ISO 639, разработен од ISO/TC 37/SC 2 (Меѓународна организација за стандардизација, Техничка комисија 37, Поткомисија 2: Терминографски и лексикографски методи на работа). Содржи четирибуквени кодови што означуваат варијанти на јазичните семејства. Со ова се овозможува правење разлика помеѓу, на пр. историскиот (glvx) наспроти обновениот (rvmx) мански јазик, додека во ISO 639-3 манскиот е застапен само со glv.

Податоците во прилог на ISO 639-6 се истражени и составени од службата GeoLang на организацијата. ISO 639-6 е објавен во 2009 г. но повлечен во 2014 г.^[1] Базата дава врска помеѓу секое јазично семејство и неговото потекло (предци), овозможувајќи му на корисникот да ја следи класификацијата на разни јазици. На пример, еве ги кодовите за предците на англискиот јазик:

Код	Јазик
eng	англиски
emen	раносовремен англиски јазик
emse	ран мидлендски и југоисточен средноанглиски јазик
meng	средноанглиски јазик
ango	англосаксонски
angl	англофризиски
nsea	северноморски
gmcw	западногермански
grmc	германски
ineu	индоевропски
wrld	свет

Базата ги разликува разните писма што ги користи еден ист јазик. На пример, во Османлиското Царство се користеле повеќе писма, поради што османскиот турски јазик е категоризиран на следниов начин:

Код	Јазик
ota	турски, османски (1500–1928)
otaa	турски, османски (1500–1928) ерменска азбука
otah	турски, османски (1500–1928) грчка азбука
otap	турски, османски (1500–1928) персиска азбука