ഉബുണ്ടു ഫോണ്ട്

ഇംഗ്ലീഷ് വിലാസം

https://ml.wikipedia.org/wiki/Ubuntu_(typeface)

ഉബുണ്ടു ഫോണ്ട് ഫാമിലി

വർഗ്ഗം	സാൻസ്-സെരിഫ്
വർഗ്ഗീകരണം	ഹ്യുമാനിസ്റ്റ് സാൻസ്-സെരിഫ്
നിർമ്മാണശാല	ഡാൾട്ടൺ മാഗ്
അനുമതി	ഉബുണ്ടു ഫോണ്ട് അനുമതിപത്രം

ഒരു ഹ്യുമാനിസ്റ്റ് സ്റ്റൈൽ^[1] ഓപ്പൺടൈപ്പ് ഫോണ്ടാണ് ഉബുണ്ടു ഫോണ്ട് ഫാമിലി. കാനോനിക്കൽ ലിമിറ്റഡിന്റെ സഹായത്തോടെ ലണ്ടനിലെ മുദ്രാക്ഷരനിർമ്മാണശാലയായ ഡാൾട്ടൺ മാഗാണ് ഈ ഫോണ്ട് നിർമ്മിച്ചിരിക്കുന്നത്. ഒമ്പത് മാസത്തോളം വികസിപ്പിച്ച ശേഷം ഉബുണ്ടു 10.10ലാണ് ഈ ഫോണ്ട് ഔദ്യോഗികമായി പുറത്തിറങ്ങിയത്.^[2][3] ഉബുണ്ടു ഫോണ്ട് അനുമതിപത്രത്തിനു കീഴിലാണ് ഈ ഫോണ്ട് പുറത്തിറക്കിയിരിക്കുന്നത്.^[4]

2010ൽ ഉബുണ്ടു 10.10നോടൊപ്പമാണ് ആദ്യമായി ഉബുണ്ടു ഫോണ്ട് പ്രത്യക്ഷപ്പെടുന്നത്. ആ സമയത്ത് നാലു വകഭേദങ്ങളാണ് ഉബുണ്ടു ഫോണ്ടിനുണ്ടായിരുന്നത് - റെഗുലർ, ഇറ്റാലിക്, ബോൾഡ്, ബോൾഡ് ഇറ്റാലിക് എന്നിവ. ഇംഗ്ലിഷ് ആയിരുന്നു അടിസ്ഥാന ഭാഷ. പിന്നീട് 2011 ഏപ്രിലിൽ കൂടുതൽ രൂപങ്ങളും കൂടുതൽ ഭാഷകൾക്കുള്ള പിന്തുണയും ഉൾപ്പെടുത്തി. ഉബുണ്ടു 11.04നോടൊപ്പമായിരുന്നു ഈ മാറ്റങ്ങളുള്ള ഉബുണ്ടു ഫോണ്ട് പുറത്തിറങ്ങിയത്.^[5][6] നിലവിൽ മൊത്തം 13 തരത്തിൽ ഉബുണ്ടു ഫോണ്ട് ലഭ്യമാണ്.

• ഉബുണ്ടു - റെഗുലർ, ഇറ്റാലിക്, ബോൾഡ്, ബോൾഡ് ഇറ്റാലിക്.^[5][6]
• ഉബുണ്ടു മോണോസ്പേസ് - റെഗുലർ, ഇറ്റാലിക്, ബോൾഡ്, ബോൾഡ് ഇറ്റാലിക്.^[5][6]
• ഉബുണ്ടു ലൈറ്റ് - റെഗുലർ, ഇറ്റാലിക്.^[5][6]
• ഉബുണ്ടു മീഡിയം - റെഗുലർ, ഇറ്റാലിക്.^[5][6]
• ഉബുണ്ടു കണ്ടെൻസ്ഡ് - റെഗുലർ.^[5][6]

ഉബുണ്ടു ഫോണ്ട് ഫാമിലിക്കായി രൂപകൽപ്പന ചെയ്യപ്പെട്ട അനുമതിപത്രമാണ് ഉബുണ്ടു ഫോണ്ട് അനുമതിപത്രം. പതിപ്പ് 0.68 മുതലാണ് ഈ അനുമതിപത്രം ഉപയോഗിച്ച് തുടങ്ങിയത്.^[4] എസ്ഐഎൽ ഓപൺ ഫോണ്ട് അനുമതിപത്രത്തിനെ അടിസ്ഥാനമാക്കിയാണ് ഉബുണ്ടു ഫോണ്ട് അനുമതിപത്രം രചിക്കപ്പെട്ടിട്ടുള്ളത്.^[8]

ഉബുണ്ടു ഫോണ്ട് അനുമതിപത്രം ഉപയോക്താവിന് നിബന്ധനകളോടെ പഠിക്കാനും, ഉപയോഗിക്കാനും, മാറ്റം വരുത്താനും, വിതരണം ചെയ്യാനുമുള്ള സ്വാതന്ത്യങ്ങൾ നൽകുന്നു. ഇതൊരു പകർപ്പ് ഉപേക്ഷാ അനുമതിപത്രമാണ്. ആയതുകൊണ്ട് ഇതിന്റെ വ്യുൽപ്പന്നങ്ങളും പകർപ്പ് ഉപേക്ഷാ നിയമത്തിനു കീഴിലായിരിക്കണം എന്നു ഈ അനുമതിപത്രം അനുശാസിക്കുന്നു. എന്നാൽ അത് ഉബുണ്ടു ഫോണ്ട് അനുമതിപത്രത്തിന് കീഴിലായിരിക്കണം എന്നില്ല.^[9]

• ഉബുണ്ടു ഫോണ്ട് ഫാമിലി ഔദ്യോഗിക താൾ
• ഉബുണ്ടു ഫോണ്ട് ഫാമിലി ഉബുണ്ടു വിക്കിയിൽ