တပ်မတော် (ကြည်း) ဗိုလ်သင်တန်းကျောင်း (ဗထူး)

တပ်မတော်(ကြည်း)ဗိုလ်သင်တန်းကျောင်း (ဗထူး)
တည်နေရာ
ဗထူးတပ်မြို့၊ ရှမ်းပြည်နယ်  မြန်မာ
သတင်းအချက်အလက်
အမျိုးအစား	ဗိုလ်သင်တန်းကျောင်း
ဆောင်ပုဒ်	နောင်တစ်ခေတ်၏ စစ်ခေါင်းဆောင်
တည်ထောင်	၁၉၄၈; ၇၇ နှစ် အကြာက (၁၉၄၈)
အာဏာပိုင်	ကာကွယ်ရေးဝန်ကြီးဌာန၊ တပ်မတော်လေ့ကျင့်ရေးအရာရှိချုပ်ရုံး
ကျောင်းအုပ်ကြီး	ဗိုလ်မှူးချုပ် မျိုးဇော်ဝင်း
ဘာသာစကား	မြန်မာဘာသာ
Affiliation	တပ်မတော်

တပ်မတော် (ကြည်း) ဗိုလ်သင်တန်းကျောင်း (ဗထူး) (အင်္ဂလိပ်: Army Officers Training School, Bahtoo) သည် မြန်မာနိုင်ငံ၊ ရှမ်းပြည်နယ်၊ ဗထူးတပ်မြို့တွင် တည်ရှိသော တပ်မတော် (ကြည်း)၏ အရာရှိ သင်တန်းကျောင်း ဖြစ်သည်။ လက်ရှိကျောင်းအုပ်ကြီးမှာ ဗိုလ်မှူးချုပ် မျိုးဇော်ဝင်း (ကြည်း - ၂၇၀၈၁) (စတသ-၃၇) ဖြစ်သည်။ သင်တန်းကျောင်းသည် တပ်မတော်၏ အရာခံဗိုလ်များနှင့် အကြပ်ကြီးများကို လေ့ကျင့်ပေးပြီး၊ စစ်တက္ကသိုလ် (DSA) နှင့်အတူ နိုင်ငံ၏ အဓိက တပ်မတော်အရာရှိ လေ့ကျင့်ရေးဌာနများထဲမှ တစ်ခုဖြစ်သည်။^[၁][၂] သင်တန်းကျောင်းတွင် သင်တန်းကာလသည် ပုံမှန်အားဖြင့် ကိုးလကြာမြင့်ပြီး၊ သင်တန်းဆင်း ဗိုလ်လောင်းများသည် တပ်မတော် အရာရှိပြန်တမ်းဝင်အဖြစ် ခန့်အပ်ခံရသည်။^[၂] သင်တန်းကျောင်းမှ ဗိုလ်လောင်းများသည် အခြားတက္ကသိုလ်များမှ ဗိုလ်လောင်းများထက် အရပ်ဘက်ဘဝ အတွေ့အကြုံပိုမို ရှိတတ်ကြသည်။^[၃]

ဗိုလ်သင်တန်းကျောင်း၏ မူလအစကို ၁၉၄၂ ခုနှစ်၊ ဩဂုတ်လ ၂၀ ရက်နေ့တွင် ရန်ကုန်မြို့၊ မင်္ဂလာဒုံမြို့နယ်၌ ဂျပန်တော်ဝင်တပ်မတော်မှ စတင်တည်ထောင်ခဲ့ပြီး မြန်မာနိုင်ငံ၏ ပထမဆုံးသော စစ်ဘက်ဆိုင်ရာ လေ့ကျင့်ရေးကျောင်း ဖြစ်လာခဲ့သည်။^[၄] ဗိုလ်သင်တန်းကျောင်းအား ၁၉၄၆ ခုနှစ် ဇန်နဝါရီလ ၁ ရက်တွင် ပြင်ဦးလွင်မြို့၌ စတင်ဖွင့်လှစ်ခဲ့ပြီး ဗိုလ်လောင်းသင်တန်း အမှတ်စဉ် (၁)မှ(၁၆)ထိ နှင့် အရာရှိငယ်သင်တန်းအမှတ်စဉ်(၁)မှ(၁၁)ထိ ဖွင့်လှစ်ခဲ့သည်။ ၁၉၅၇ ခုနှစ် ဇွန်လ တွင် ဗထူးတပ်မြို့သို့ ပြောင်းရွှေ့ခဲပြီး ဗိုလ်လောင်းသင်တန်း(၁၇)မှ (၂၈)ထိ၊ အရာရှိငယ်သင်တန်းအမှတ်စဉ်(၁၂)မှ (၂၀)ထိ ဖွင့်လှစ်ခဲ့သည်။ ၁၉၆၃ ခုနှစ်၊ အောက်တိုဘာလ ၁ ရက်နေ့တွင် မှော်ဘီမြို့သို့ ပြောင်းရွှေ့ခဲ့ပြီး ဗိုလ်လောင်းသင်တန်း အမှတ်စဉ်(၂၉)မှ (၈၂)ထိ၊ အရာရှိငယ်သင်တန်းအမှတ်စဉ်(၂၁)မှ (၃၉)ထိ၊ အလုပ်သင်ဗိုလ်လောင်းအမှတ်စဉ် (၁)မှ (၁၉)ထိ ဖွင့်လှစ်သင်ကြားခဲ့သည်။ ၁၉၉၁ ခုနှစ်၊ ဩဂုတ်လ ၁၅ ရက်တွင် ဗထူးတပ်မြို့သို့ပြောင်းရွှေ့ခဲ့ပြီး ဗိုလ်လောင်းသင်တန်းအမှတ်စဉ် (၈၃)မှ (၁၂၄)ထိ ဖွင့်လှစ်သင်ကြားပေးခဲ့သည်။ ၂၀၁၄ ခုနှစ် မတ်လ ၁၂ရက်တွင် တပ်မတော် (ကြည်း) ဗိုလ်သင်တန်းကျောင်း (ဗထူး)ဟု အမည်ပြောင်းလဲသတ်မှတ်ခဲ့သည်။

နိုင်ငံရေးလေ့လာသူများက ဗိုလ်သင်တန်းကျောင်း နှင့် စစ်တက္ကသိုလ် (DSA) အကြား ကာလရှည်ကြာ အာဏာလွန်ဆွဲမှုများ ရှိခဲ့ကြောင်း မှတ်ချက်ပြုကြသည်။^[၅] ၂၀၁၆ ခုနှစ်တွင် မြန်မာနိုင်ငံ၏ အမျိုးသားဥပဒေပြုလွှတ်တော်၏ အထက်လွှတ်တော်ဖြစ်သော အမျိုးသားလွှတ်တော်တွင် တပ်မတော်မှ ခန့်အပ်သော ကိုယ်စားလှယ်များ၏ ၇% (၄ ဦး) မှာ ဗိုလ်သင်တန်းကျောင်းဘွဲ့ရများဖြစ်ကြပြီး၊ အောက်လွှတ်တော်ဖြစ်သော ပြည်သူ့လွှတ်တော်တွင်မူ ဗိုလ်သင်တန်းကျောင်းဘွဲ့ရ ကိုယ်စားလှယ်များ တစ်ဦးမျှ မပါဝင်ခဲ့သည်ကို တွေ့ရသည်။^[၃]

• ဗိုလ်မှူးကြီးကြည်မောင်၊ အပတ်စဉ် ၁^[၄]
• ဗိုလ်ချုပ်ကြီးတင်ဦး၊ အပတ်စဉ် ၃^[၄]
• ဗိုလ်ချုပ်မှူးကြီးသန်းရွှေ၊ အပတ်စဉ် ၉^[၆][၂]
• ဗိုလ်ချုပ်ကြီးခင်ညွန့်၊ အပတ်စဉ် ၂၅^[၇][၂]
• ဗိုလ်ကြီးအုန်းကျော်မြင့်၊ အပတ်စဉ် ၂၉
• ဒုတိယဗိုလ်ချုပ်ကြီးစိန်ဝင်း (ဝန်ကြီး)၊ အပတ်စဉ် ၅၄^[၈]
• ဗိုလ်ချုပ်ကြီးရဲဝင်းဦး၊ အပတ်စဉ် ၇၇^[၉]
• ဗိုလ်ချုပ်တိုးရီ၊ အပတ်စဉ် ၇၇^[၁၀]