ਅਜੰਥਾ ਮੈਂਡਿਸ
ਬਾਲਾਪੁਵਾਡੁਗ ਅਜੰਥਾ ਵਿੰਸਲੋ ਮੈਂਡਿਸ (ਜਨਮ 11 ਮਾਰਚ 1985 ਮੋਰਤੁਵਾ ਵਿਖੇ), ਜਿਸਨੂੰ ਕਿ ਅਜੰਥਾ ਮੈਂਡਿਸ ਦੇ ਨਾਮ ਨਾਲ ਜਾਣਿਆ ਜਾਂਦਾ ਹੈ, ਇਹ ਇੱਕ ਸ੍ਰੀ ਲੰਕਾ ਦਾ ਕ੍ਰਿਕਟ ਖਿਡਾਰੀ ਹੈ ਜੋ ਕਿ ਅੰਤਰਰਾਸ਼ਟਰੀ ਕ੍ਰਿਕਟ ਖੇਡਦਾ ਹੈ। ਅਜੰਥਾ ਸ੍ਰੀ ਲੰਕਾ ਕ੍ਰਿਕਟ ਟੀਮ ਵੱਲੋਂ ਇੱਕ ਦਿਨਾ ਅੰਤਰਰਾਸ਼ਟਰੀ, ਟੈਸਟ ਕ੍ਰਿਕਟ ਅਤੇ ਟਵੰਟੀ ਟਵੰਟੀ ਕ੍ਰਿਕਟ ਖੇਡਦਾ ਹੈ। ਉਸਨੂੰ ਜਾਦੂਈ ਸਪਿਨ ਖਿਡਾਰੀ ਵੀ ਕਿਹਾ ਜਾਂਦਾ ਹੈ ਕਿਉਂ ਕਿ ਉਸਦਾ ਗੇਂਦ ਸੁੱਟਣ ਦਾ ਤਰੀਕਾ ਬਹੁਤ ਹੀ ਵੱਖਰਾ ਹੈ ਅਤੇ ਵਿਸ਼ਵ ਕ੍ਰਿਕਟ ਵਿੱਚ ਉਸਨੂੰ ਖਾਸ ਤੌਰ 'ਤੇ ਟਵੰਟੀ20 ਕ੍ਰਿਕਟ ਲਈ ਜਾਣਿਆ ਜਾਂਦਾ ਹੈ। ਟਵੰਟੀ ਟਵੰਟੀ ਕ੍ਰਿਕਟ ਦਾ ਉਹ ਵਿਸ਼ਵ ਪੱਧਰੀ ਗੇਂਦਬਾਜ ਹੈ। ਬੱਲੇਬਾਜ ਵਜੋਂ ਵੀ ਉਸ ਵਿੱਚ ਕਾਫੀ ਯੋਗਤਾ ਹੈ ਅਤੇ ਉਹ ਹੇਠਲੇ ਕ੍ਰਮ ਦਾ ਬੱਲੇਬਾਜ ਹੈ। ਬੱਲੇਬਾਜੀ ਕਰਦੇ ਹੋਏ ਉਹ ਟੈਸਟ ਕ੍ਰਿਕਟ ਵਿੱਚ ਅਰਧ-ਸੈਂਕੜਾ ਵੀ ਲਗਾ ਚੁੱਕਾ ਹੈ। ਮੈਂਡਿਸ ਨੇ ਆਪਣਾ ਪਹਿਲਾ ਇੱਕ ਦਿਨਾ ਅੰਤਰਰਾਸ਼ਟਰੀ ਕ੍ਰਿਕਟ ਮੈਚ ਵੈਸਟ ਇੰਡੀਜ਼ ਦੀ ਕ੍ਰਿਕਟ ਟੀਮ ਖਿਲਾਫ਼ 2008 ਵਿੱਚ ਪੋਰਟ ਆਫ਼ ਸਪੇਨ ਵਿਖੇ ਖੇਡਿਆ ਸੀ ਅਤੇ ਉਸਨੇ ਇਸ ਮੁਕਾਬਲੇ ਵਿੱਚ 39 ਦੌੜਾਂ ਦੇ ਕੇ 3 ਵਿਕਟਾਂ ਹਾਸਿਲ ਕੀਤੀਆਂ ਸਨ। ਉਸਨੇ ਇੰਡੀਅਨ ਪ੍ਰੀਮੀਅਰ ਲੀਗ ਵਿੱਚ ਕੋਲਕਾਤਾ ਨਾਇਟ ਰਾਈਡੱਰਜ਼ ਟੀਮ ਵੱਲੋਂ ਕ੍ਰਿਕਟ ਖੇਡੀ ਹੈ। ਉਸਨੇ ਆਪਣੇ ਖੇਡ-ਜੀਵਨ ਦਾ ਪਹਿਲਾ ਟੈਸਟ ਕ੍ਰਿਕਟ ਮੈਚ ਭਾਰਤ ਵਿਰੁੱਧ ਰਾਜਧਾਨੀ ਕੋਲੰਬੋ ਵਿਖੇ 23 ਜੁਲਾਈ 2008 ਨੂੰ ਖੇਡਿਆ ਸੀ। ਇਸ ਮੁਕਾਬਲੇ ਵਿੱਚ ਉਸਨੇ 132 ਦੌੜਾਂ ਦੇ ਕੇ 8 ਵਿਕਟਾਂ ਲਈਆਂ ਸਨ ਅਤੇ ਉਹ ਪਹਿਲਾ ਸ੍ਰੀ ਲੰਕਾਈ ਖਿਡਾਰੀ ਬਣ ਗਿਆ ਸੀ ਜਿਸਨੇ ਆਪਣੇ ਪਹਿਲੇ ਹੀ ਟੈਸਟ ਕ੍ਰਿਕਟ ਮੈਚ ਵਿੱਚ ਅੱਠ ਵਿਕਟਾਂ ਹਾਸਿਲ ਕੀਤੀਆਂ ਹੋਣ। ਸਤੰਬਰ 2008 ਨੂੰ ਦੁਬਈ ਵਿੱਚ ਹੋਏ ਐੱਲਜੀ ਆਈਸੀਸੀ ਇਨਾਮ ਸਮਾਰੋਹ ਦੌਰਾਨ ਉਸਨੂੰ 'ਉਭਰਦਾ ਹੋਇਆ ਖਿਡਾਰੀ' ਇਨਾਮ ਦਿੱਤਾ ਗਿਆ ਸੀ। 3 ਮਾਰਚ 2009 ਨੂੰ ਇੱਕ ਬੱਸ ਸ੍ਰੀ ਲੰਕਾਈ ਖਿਡਾਰੀਆਂ ਨੂੰ ਗਦਾਫ਼ੀ ਸਟੇਡੀਅਮ ਤੋਂ ਪਾਕਿਸਤਾਨ ਕ੍ਰਿਕਟ ਟੀਮ ਵਿਰੁੱਧ ਲੜੀ ਦਾ ਦੂਸਰਾ ਟੈਸਟ (ਦਿਨ ਤੀਸਰਾ) ਖੇਡਣ ਲਈ ਲਿਜਾ ਰਹੀ ਸੀ ਤਾਂ ਅਚਾਨਕ ਇੱਕ ਢਕੇ ਹੋਏ ਮੂੰਹ ਵਾਲੇ ਬੰਦੂਕਧਾਰੀ ਆਦਮੀ ਨੇ ਬੱਸ ਉੱਪਰ ਗੋਲੀਆਂ ਚਲਾ ਦਿੱਤੀਆਂ ਸਨ। ਅਜੰਥਾ ਮੈਂਡਿਸ ਓਨ੍ਹਾਂ ਸੱਤ ਖਿਡਾਰੀਆਂ ਵਿੱਚੋਂ ਇੱਕ ਸੀ ਜਿਹਨਾਂ ਦੇ ਇਸ ਹਮਲੇ ਦੌਰਾਨ ਸੱਟਾਂ ਲੱਗੀਆਂ ਸਨ। ਉਸ ਬੰਦੂਕਧਾਰੀ ਆਦਮੀ ਨੇ ਇਸ ਹਮਲੇ ਵਿੱਚ ਪੰਜ ਸੁਰੱਖਿਅਕਾਂ ਨੂੰ ਮਾਰ ਦਿੱਤਾ ਸੀ, ਜੋ ਖਿਡਾਰੀਆਂ ਦੀ ਬੱਸ ਦੀ ਰਖਵਾਲੀ ਕਰਦੇ ਸਨ।[1] ਉਹ ਅਜਿਹਾ ਪਹਿਲਾ ਗੇਂਦਬਾਜ ਸੀ ਜਿਸਨੇ ਅੰਤਰਰਾਸ਼ਟਰੀ ਟਵੰਟੀ20 ਕ੍ਰਿਕਟ ਵਿੱਚ ਇੱਕ ਪਾਰੀ ਵਿੱਚ 6 ਵਿਕਟਾਂ ਲਈਆਂ ਹੋਣ। ਇਸ ਤੋਂ ਇਲਾਵਾ ਉਸ ਨੇ 18 ਸਤੰਬਰ 2012 ਨੂੰ ਜ਼ਿੰਬਾਬਵੇ ਖਿਲਾਫ ਟਵੰਟੀ20 ਮੈਚ ਵਿੱਚ 8 ਦੌੜਾਂ ਦੇ ਕੇ 6 ਵਿਕਟਾਂ ਹਾਸਿਲ ਕਰਨ ਦਾ ਕਾਰਨਾਮਾ ਕੀਤਾ ਸੀ। ਇਹ ਵਿਸ਼ਵ ਦੇ ਕਿਸੇ ਵੀ ਗੇਂਦਬਾਜ ਦਾ ਸਰਵੋਤਮ ਪਾਰੀ ਰਿਕਾਰਡ ਸੀ।[2] 26 ਅਕਤੂਬਰ 2012 ਨੂੰ ਅਜੰਥਾ ਮੈਂਡਿਸ ਨੂੰ ਸ੍ਰੀ ਲੰਕਾ ਦਾ ਸਭ ਤੋਂ ਉੱਚਾ ਸਨਮਾਨ ਦੇ ਕੇ ਨਿਵਾਜਿਆ ਗਿਆ ਸੀ। ਹਵਾਲੇ
ਬਾਹਰੀ ਕੜੀਆਂ
|
|||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
Portal di Ensiklopedia Dunia
