க. வே. நடராசா

க. வே. நடராசா (Kanthapillai Velupillai Nadarajah, 6 சூலை 1905 – அக்டோபர் 2000) இலங்கைத் தமிழ் வழக்கறிஞரும், நாடாளுமன்ற உறுப்பினரும் ஆவார்.

நடராசா 1905 சூலை 6 இல்,^[1] கே. வேலுப்பிள்ளை, ஆச்சிக்குட்டி ஆகியோருக்குப் பிறந்தார்.^[1] யாழ்ப்பாணம் மத்திய கல்லூரி, பரமேசுவரா கல்லூரி ஆகியவற்றில் கல்வி கற்றார்.^[1] பாடசாலைக் கல்வியை முடித்துக் கொண்டு இலங்கை பல்கலைக்கழகக் கல்லூரியில் சேர்ந்தார்.^[1] பின்னர் இலங்கை சட்டக் கல்லூரியில் கற்று வழக்கறிஞரானார். இவர் பி. எஸ். இளையதம்பி என்பவரின் மகள் ஞானமணியைத் திருமணம் புரிந்தார்.^[1]

நடராசா இலங்கையின் மலையகத்தில் பதுளையில் 1930 இல் சட்டத் தொழிலை ஆரம்பித்தார்.^[1] ஊவா மாகாணத்தில் 54 ஆண்டுகள் வழக்கறிஞராகப் பணியாற்றினார்.^[1]

நடராசா பதுளை நகரசபை உறுப்பினராக 10 ஆண்டுகள் இருந்தார்.^[1] 1947 நாடாளுமன்றத் தேர்தலில் பண்டாரவளை தேர்தல் தொகுதியில் சுயேச்சை உறுப்பினராகப் போட்டியிட்டு வெற்றி பெற்று நாடாளுமன்றம் சென்றார்.^[2][3]

நடராசா பதுளை சைவ பரிபாலன சங்கத்தின் தலைவராகவும், பதுளை கதிர்வேலாயுத சுவாமி கோவிலின் அறங்காவலராகவும் இருந்து சேவையாற்றினார்.^[1] ஊவா மாகாணத்தின் முதலாவது தமிழ்ப் பாடசாலையை நிறுவினார். பதுளை சரசுவதி மகா வித்தியாலயத்தின் முகாமையாளராக 30 ஆண்டுகள் இருந்துள்ளார்.^[1]

1983-இல் தமிழருக்கு எதிரான கறுப்பு யூலை வன்முறைகளின் போது பிங்காரவையில் இருந்த இவரது வீடு வன்முறையாளர்களினால் தீக்கிரையாக்கப்பட்டது.^[3] பதுளையின் முன்னாள் நாடாளுமன்ற உறுப்பினர் ஜே. சி. டி. கொத்தலாவலையின் உதவியுடன் கொழும்பு சென்றார்.^[3] பின்னர் அவர் குடும்பத்துடன் அமெரிக்காவுக்குப் புலம்பெயர்ந்து வாசிங்டனில் வாழ்ந்து வந்தார்.^[3]

• The Plea That Went Unheeded, Tamil Nation