மேற்கு ஐரோப்பிய நேரம்

மேற்கு ஐரோப்பிய நேரம் (மே.ஐ.நே) (ஆங்கில மொழி: Western European Time - WET, ஒ.ச.நே±00:00) என்பது மேற்கு ஐரோப்பாவில் புழக்கத்தில் உள்ள நேர வலயம் ஆகும். இது கிரீன்விச் இடைநிலை நேரம் எனவும் அழைக்கப்படுகிறது.^[1][2] ஐரோப்பிய ஒன்றியத்தில் புழக்கத்தில் உள்ள மூன்று நேர வலயங்களில் இதுவும் ஒன்றாகும். ஏனையவை: மத்திய ஐரோப்பிய நேரம், கிழக்கு ஐரோப்பிய நேரம் ஆகியவை ஆகும்.^[2][3]

பின்வரும் மேற்கு ஐரோப்பிய நாடுகளும் பிராந்தியங்களும் ஒசநே±00:00 நேரவலயத்தை குளிர்கால மாதங்களில் பயன்படுத்துகின்றன:

• போர்த்துகல், 1912 முதல் (அசோரசு தவிர்த்து, ஒ.ச.நே - 01:00)^[4]
• ஐக்கிய இராச்சியம், (1847 முதல் இங்கிலாந்து, இசுக்கொட்லாந்து, வேல்ஸ், கால்வாய் தீவுகள், மாண் தீவு), (1916 முதல் வட அயர்லாந்து^[5][6][7]
• அயர்லாந்து, 1916 முதல்,^[8] (1968 முதல் 1971 வரை தவிர்த்து)^[9][10]
• கேனரி தீவுகள், 1946 முதல் (எசுப்பானியாவின் ஏனைய பகுதிகளில் மஐநே, ஒசநே+01:00)^[11]
• பரோயே தீவுகள், 1908 முதல்^[12]
• மதீரா தீவுகள், 1912 முதல்^[4]
• வடகிழக்கு கிறீன்லாந்து^[13]
• ஐசுலாந்து, 1968 முதல் (ஆண்டு முழுவதும்)^[14]

ஐசுலாந்து தவிர்ந்த மேற்குறிப்பிட்ட அனைத்து நாடுகளும்^[15] கோடைகாலத்தில் பகலொளி சேமிப்பு நேரத்தைக் கடைப்பிடிக்கின்றன. மார்ச் மாதத்தின் இறுதி ஞாயிறு முதல் அக்டோபர் மாதத்தின் கடைசி ஞாயிறு வரை இந்நாடுகளில் நேரம் மேற்கு ஐரோப்பிய நேரத்தில் இருந்து 1 மணி நேரம் முன்னோக்கி நகர்த்தப்படுகின்றன. இது மேற்கு ஐரோப்பிய கோடை நேரம் (WEST, ஒசநே+01:00) என அழைக்கப்படுகின்றது.^[16] ஐக்கிய இராச்சியத்தில் இது பிரித்தானிய கோடை நேரம் எனவும், அயர்லாந்தில் ஐரிய சீர் நேரம் எனவும் அழைக்கப்படுகிரது.