வில்லியம் ஆர்தர் லூயிஸ்

சர் வில்லியம் ஆர்தர் லூயிஸ் (Sir William Arthur Lewis) (23 சனவரி 1915 - 15 சூன் 1991) இவர் ஓர் பொருளாதார நிபுணரும் பிரின்ஸ்டன் பல்கலைக்கழகத்தில் அரசியல் பொருளாதாரத்தின் பேராசிரியருமாவார்.^[2] பொருளாதார வளர்ச்சித் துறையில்இவர் தனது பங்களிப்புகளுக்கு நன்கு அறியப்பட்டவர். 1979 ஆம் ஆண்டில் இவருக்கு பொருளாதார அறிவியலுக்கான நோபல் நினைவு பரிசு வழங்கப்பட்டது. இவருக்கு செயிண்ட் லூசியா மற்றும் ஐக்கிய இராச்சியம் என்ற இரட்டைக் குடியுரிமை இருந்தது.

ஆர்தர் லூயிஸ் செயின்ட் லூசியாவின் காஸ்ட்ரீஸில் ஜார்ஜ் மற்றும் ஐடா லூயிஸ் என்பவர்களின் ஐந்து குழந்தைகளில் நான்காவது குழந்தையாக பிறந்தார்.இது பிரித்தன் விண்ட்வார்ட் தீவுகள் கூட்டாட்சி காலனியின் ஒரு பகுதியாக இருந்தது. இவரது பெற்றோர் நூற்றாண்டின் தொடக்கத்திற்குப் பிறகு ஆன்டிகுவாவிலிருந்து குடிபெயர்ந்தனர்.^[3] ஆர்தருக்கு ஏழு வயதாக இருந்தபோது இவரது தந்தை ஜார்ஜ் லூயிஸ் இறந்தார். இவரது தாய் ஐந்து குழந்தைகளையும் தனியாக வளர்த்தார். ஆர்தர் ஒரு திறமையான மாணவராக இருந்தார். மேலும் தனது வயதை விட இரண்டு வகுப்புகள் உயர்த்தப்பட்டார்.^[4] 14 வயதில் பள்ளி முடிந்ததும், ஒரு எழுத்தராக பணிபுரிந்தார். அதே நேரத்தில் தனது பல்கலைக்கழக நுழைவுத் தேர்விற்காகக் காத்திருந்தார். இந்த நேரத்தில் இவர் டிரினிடாட் மற்றும் டொபாகோவின் எதிர்கால முதல் பிரதம மந்திரி எரிக் வில்லியம்சுடன் நட்பு கொண்டார். பின்னர், இருவரும் வாழ்நாள் முழுவதும் நண்பர்களாக இருந்தனர்.^[5]

பட்டம் பெற்ற பிறகு, பொறியியலாளராக வேண்டும் என்பது இவரது விருப்பமாக இருந்தது. மேற்கிந்தியத் தீவுகளின் செயிண்ட் லூசியா போன்ற அரசாங்கங்களும் நிறுவனங்களும் கறுப்பர்களை வேலைக்கு அமர்த்த மறுத்ததால் இவர் இறுதியில் பொருளாதாரத்திற்கு மாறினார். 18 வயதில், இலண்டன் பொருளாதாரப் பள்ளியில் சேர உதவித்தொகை பெற்றார். இவருக்கு உலகின் மிக மதிப்புமிக்க பொருளாதார பல்கலைக்கழகத்தில் படிக்க இது ஒரு வாய்ப்பாக இருந்தது மட்டுமல்லாமல்,இலண்டன் பொருளாதாரப் பள்ளியில் ஏற்றுக்கொள்ளப்பட்ட முதல் கறுப்பின நபராகவும் இந்தார். இவரது கல்வி மேன்மை தனது சகாக்கள் மற்றும் பேராசிரியர்களால் கவனிக்கப்பட்டு போற்றப்பட்டது. அங்கே இருந்தபோது, லூயிஸ் ஜான் ஹிக்ஸ், அர்னால்ட் பிளான்ட், லியோனல் ராபின்ஸ், மற்றும் ப்ரீட்ரிக் ஹயக் ஆகியோரின் கீழ் படிக்க வாய்ப்பு கிடைத்தது. 1937 இல் தனது இளங்கலை அறிவியல் பட்டமும், 1940 ஆம் ஆண்டில் அர்னால்ட் ஆலையின் மேற்பார்வையின் கீழ் இலண்டன் பொருளியல் பள்ளியில் முனைவர் பட்டமும் பெற்றார், இவர் 1948 வரை இலண்டன் பொருளாதாரப் பள்ளியில் பணியாற்றினார். 1947 ஆம் ஆண்டில், இவர் கிளாடிஸ் ஜேக்கப் என்பவரை மணந்தார். இவர்களுக்கு இரண்டு மகள்கள் இருந்தனர்.

அந்த ஆண்டு இவர் மான்செஸ்டர் பல்கலைக்கழகத்தில் விரிவுரையாளராகத் தேர்ந்தெடுக்கப்பட்டா. பின்னர், தனது குடும்பத்தினருடன் அங்கு சென்றார். இவர் 1957 வரை மான்செஸ்டரில் கற்பித்தார். இந்த காலகட்டத்தில், வளரும் நாடுகளில் மூலதனத்தின் வடிவங்கள் மற்றும் ஊதியங்கள் குறித்து இவர் தனது மிக முக்கியமான சில கருத்துக்களை உருவாக்கினார். முன்னாள் காலனிகள் ஐரோப்பிய நாடுகளிடமிருந்து சுதந்திரம் பெறத் தொடங்கியதால், அபிவிருத்தி பொருளாதாரத்தில் இவர் செய்த பங்களிப்புகளுக்கு மிகவும் பிரபலமானார்.

இவர் நைஜீரியா, கானா, டிரினிடாட் மற்றும் டொபாகோ, ஜமைக்கா மற்றும் பார்படாஸ் போன்ற ஏராளமான ஆப்பிரிக்க மற்றும் கரீபிய அரசாங்கங்களுக்கு பொருளாதார ஆலோசகராக பணியாற்றினார்.

1957 இல் கானா சுதந்திரம் பெற்றபோது, அதன் அரசாங்கம் இவரை அவர்களின் முதல் பொருளாதார ஆலோசகராக நியமித்தது. அதன் முதல் ஐந்தாண்டு மேம்பாட்டுத் திட்டத்தை (1959-63) உருவாக்க இவர் உதவினார்.^[6]

மேற்கிந்திய தீவுகள் பல்கலைக்கழகத்தின் துணைவேந்தராக நியமிக்கப்பட்டபோது 1959 இல் இவர் கரீபியன் பகுதிக்கு திரும்பினார். 1963 ஆம் ஆண்டில் பொருளாதாரத்தில் இவர் செய்த பங்களிப்புகளுக்காக இவர் நைட் ஆனார் .

அந்த ஆண்டுஇவர் பிரின்ஸ்டன் பல்கலைக்கழகத்தில் பல்கலைக்கழக பேராசிரியராக நியமிக்கப்பட்டு அமெரிக்காவிற்கு சென்றார். அடுத்த இரண்டு தசாப்தங்களாக பிரின்ஸ்டனில் பணிபுரிந்தார். 1983 இல் ஓய்வு பெறும் வரை தலைமுறை மாணவர்களுக்கு கற்பித்தார். 1970 ஆம் ஆண்டில் கரீபியன் மேம்பாட்டு வங்கியின் முதல் தலைவராக தேர்ந்தெடுக்கப்பட்டார். 1973 வரை அந்தத் திறனில் பணியாற்றினார்.^[7]

இவர்,1979 ஆம் ஆண்டில் பொருளாதாரத்தில் நோபல் பரிசைப் பெற்றார், அதை தியாடர் சுலட்ஸுடன் பகிர்ந்து கொண்டார்.^[3]

• இவரது நினைவாக செயின்ட் லூசியாவில் ஒரு கல்லூரிக்கு ஆர்தர் லூயிஸ் சமுதாயக் கல்லூரி எனப் பெயரிடப்பட்டது.
• இவர் அரசாங்க பதவிகளில் நுழைவதற்கு முன்பு பல ஆண்டுகளாக அங்கு விரிவுரை செய்த காரணத்தால் மான்செஸ்டர் பல்கலைக்கழகத்தின் ஒரு கட்டிடத்திற்கு (2007 இல் திறக்கப்பட்டது) இவரது பெயரிடப்பட்டது.
• மேற்கிந்திய தீவுகள் பல்கலைக்கழகத்தில் சர் ஆர்தர் லூயிஸ் சமூக மற்றும் பொருளாதார ஆய்வுகள் நிறுவனம் தொடங்கப்பட்டது.
• சர் ஆர்தர் லூயிஸின் உருவப்படம் கிழக்கு கரீபியனின் 100 டாலர் நாணயத்தில் இடம் பெற்றது.
• பிரின்ஸ்டன் பல்கலைக்கழகத்தின் உட்ரோ வில்சன் பொது மற்றும் சர்வதேச விவகார பள்ளியின் ராபர்ட்சன் அரங்கத்தில் பிரதான அரங்கத்திற்கு ஆர்தர் லூயிஸ் அரங்கம் எனப் பெயரிடப்பட்டது.
• 2020 திசம்பர் 10 அன்று, கூகுள் மறைந்த சர் ஆர்தர் லூயிஸை கூகிள் டூடுல் மூலம் கொண்டாடியது.^[8][9][10]

இவர் 1991 சூன் 15 அன்று பார்படோஸின் பிரிட்ஜ்டவுனில் இறந்தார். புனித லூசியன் சமுதாயக் கல்லூரியின் மைதானத்தில் அடக்கம் செய்யப்பட்டார்.

"பொருளாதார மேம்பாடு வரம்பற்ற தொழிலாளர் வழங்கல்" (மான்செஸ்டர் பள்ளி) என்ற தனது மிகவும் செல்வாக்குமிக்க வளர்ச்சி பொருளாதாரக் கட்டுரையை லூயிஸ் 1954 இல் வெளியிட்டார்.^[11] இந்த வெளியீட்டில், இவர் இரட்டை துறை மாதிரி அல்லது "லூயிஸ் மாதிரி" என்று அழைக்கப்பட்டதை அறிமுகப்படுத்தினார்.^[12]

லூயிஸ் 1955 ஆம் ஆண்டில் பொருளாதார வளர்ச்சியின் கோட்பாட்டை வெளியிட்டார். அதில் இவர் "ஆர்வத்தையும் நடைமுறைத் தேவையையும்" இணைத்து "பொருளாதார வளர்ச்சியைப் படிப்பதற்கான பொருத்தமான கட்டமைப்பை வழங்க" முயன்றார்.^[13]

விக்கிமேற்கோள் பகுதியில், இது தொடர்புடையவைகளைக் காண்க: வில்லியம் ஆர்தர் லூயிஸ்

• Arthur Lewis Papers at the Seeley G. Mudd Manuscript Library, Princeton University
• Saint Lucian Nobel Laureates பரணிடப்பட்டது 2018-08-30 at the வந்தவழி இயந்திரம்
• Biography available in Nobel Laureates of Saint Lucia
• Sir Arthur Lewis Community College, Saint Lucia
• Sir Arthur Lewis – Nobel Prize Lecture
• IDEAS/RePEc
• "W. Arthur Lewis". JSTOR.
• The Lewisian Turning Point and Its Implications to Labor Protection (The Institute of Population and Labor Economics, Chinese Academy of Social Sciences)
• "W. Arthur Lewis (1915–1991)". The Concise Encyclopedia of Economics (2nd). (2008). Liberty Fund.