Анатоль Васільевіч Прохараў

Анатоль Васільевіч Прохараў (нар. 21 ліпеня 1949, вёска Рудкаўшчына, Горацкі раён, Магілёўская вобласць, БССР) — беларускі паэт, сябра Саюза пісьменнікаў Беларусі.

Нарадзіўся ў сям’і калгаснікаў. Скончыў у Рудкаўшчыне школу-васьмігодку. Потым ГПТВ № 18 горада Маркса Саратаўскай вобласці. Атэстат аб заканчэнні сярэдняй школы атрымаў завочна ў Горацкай СШ № 1. Служыў у Савецкай Арміі ў ракетных войсках.

Пасля арміі працаваў будаўніком-электрыкам на будаўніцтве газаправода Таржок — Мінск — Івацэвічы. На працы атрымаў цяжкую траўму і быў надоўга прыкаваны да бальнічнага ложка — год быў паралізаваны, шэсць месяцаў нічога не бачыў. У гэта час яму вельмі дапамог народны паэт Беларусі Рыгор Барадулін.

Зараз на пенсіі па інваліднасці другой групы. Жыве ў Оршы.

Літаратурны дэбют адбыўся ў 1980 годзе, першы верш быў надрукаваны ў Горацкай раённай газеце «Ленінскі шлях».

У 1983 годзе ў выдавецтве «Юнацтва» выйшла першая кніжка паэта «Буркаток», а ў 1988 годзе, калі была адкрыта новая серыя «Дэбют», надрукаваў зборнік вершаў «Птушыны гарадок» (1988).

Потым былі кнігі: «Чарадзейка» (1994), «Вясёлы карагод» (2005).

Удзельнік 9 калектыўных зборнікаў і альманахаў. У розны час ягоныя вершы ўключаліся ў падручнікі для малодшых класаў па беларускай мове.

Друкуецца ў рэспубліканскіх, абласных і раённых СМІ. Падборкі вершаў для дзяцей дашкольнага і малодшага школьнага ўзросту ўвайшлі ў абласныя літаратурныя альманахі «Дзвіна» — 2009 і 2017 гг., часопіс «Вожык» і інш. Сябра літаратурнага народнага аб’яднання «Роднае слова», што працуе пры Горацкім гісторыка-этнаграфічным музеі.

Ягоныя вершы прыцягваюць да сябе ўвагу дарослых і маленькіх чытачоў, кранаюць сваёй непасрэднасцю светаўспрымання, лёгкасцю і дакладнасцю рыфмаванага слова, удалым гумарам і пластыкай вобразаў.

• Сябра Саюза пісьменнікаў Беларусі (2007).

• Буркаток — Мн.: 1983.
• Птушыны гарадок — Мн.:1988.
• Чарадзейка — Мн.: 1994.
• Вясёлы карагод — Мн.:2005.

• Ганаровая грамата Саюза пісьменнікаў Беларусі (2009).
• Дыпламант рэспубліканскіх фестываляў творчасці інвалідаў «Шлях — сябе» і «Глядзі на мяне, як на роўню».

• Дзеружкова, Людміла. Сустрэча са славутым земляком / Л. Дзеружкова // Горацкі веснік. — 2016. 16 жніўня. С. 5.
• Дзетліковіч, П. На паэтычнай хвалі Анатоль Прохараў / П. Дзетліковіч // Ленінскі шлях (Горкі).1994. 10 верасня.
• Дзетліковіч, П. Сэрца закаханага звонкая струна… / П. Дзетліковіч // Ленінскі шлях (Горкі). 1991. 25 верасня.
• Прохараў Анатоль Васільевіч // Памяць: гісторыка-дакументальная хроніка Горацкага раёна. — Мінск: 1996. С. 557.
• Ліўшыц, Уладзімір. «Тут першы крок зрабіў я ў жыцці»/ У. Ліўшыц // У кн. Раскопкі вакол Горацкага Парнаса- Горкі: 2001. С.217-219.