Вуліца 40 год БССР (Гомель)

40 год БССР Гомель
Агульная інфармацыя
Краіна	Беларусь
Рэгіён	Гомельская вобласць
Горад	Гомель
Раён	Чыгуначны раён
Гістарычны раён	Прудок
Паштовы індэкс	246015
Медыяфайлы на Вікісховішчы

Вуліца 40 год БССР — вуліца ў Чыгуначным раёне горада Гомеля. Адносіцца да жылога масіву Прудок. Праходзіць ад вуліцы Каменшчыкава да вуліцы Свірыдава. Перасякаецца з безназоўным правулкам^[1]. Складаецца з індывідуальнай забудовы пераважна сядзібнага тыпу.

Сфарміравалася ў канцы 1950-х гадоў праз уразанне прысядзібных участкаў жыхароў Юнацкай вуліцы і вуліцы Мічурына. Назву атрымала ў гонар саракавой гадавіны ўтварэння Беларускай ССР, якая адзначалася ў 1959 годзе. Засялялася пераважна не прудкоўцамі, а перасяленцамі з іншых раёнаў. Па ўспамінах старажылаў, у 1966 годзе пацярпела ад паводкі^[2].

У сектары між канцавымі адрэзкамі вуліцы 40 год БССР і вуліцы Мічурына знаходзіцца зона адпачынку з сажалкай.

У студзені 2023 г. Гомельскі гарадскі аддзел па надзвычайных сітуацыях паведамляў аб падтапленні талымі водамі аднаго з домаўладанняў вуліцы 40 год БССР^[3][4].