Вуліца Каменшчыкава (Гомель)

Каменшчыкава Гомель
Агульная інфармацыя
Краіна	Беларусь
Рэгіён	Гомельская вобласць
Горад	Гомель
Раён	Чыгуначны раён
Гістарычны раён	Прудок, Валатава
Працягласць	2 260 м
Тралейбусныя маршруты	15, 15а, 17, 21, 23, 24
Аўтобусныя маршруты	3а, 20, 34, 44
Ранейшыя назвы	3-я Праезджая
Паштовы індэкс	246015 і 246045
Медыяфайлы на Вікісховішчы

Вуліца Каменшчыкава — вуліца ў Чыгуначным і Цэнтральным раёнах горада Гомеля. Пачынаецца ў жылым масіве Прудок, праходзіць па паўднёвых ускраінах мікрараёнаў Валатава і Клёнкаўскі. Праходзіць ад вуліцы Крупскай да Чачэрскай вуліцы і Усходняга абыходу. Перасякаецца з вуліцамі Мічурына, 7-я Навасёлкавая, 8-я Навасёлкавая. На яе выходзяць вуліцы Ягаўкіна, Юнацкая, 40 год БССР, Верхняя, 10-я Навасёлкавая, 1-я Навасёлкавая, Агарэнкі, Петруся Броўкі і Макаёнка (з поўначы), 2-я Светлая, 1-я Светлая, 2-я Навасёлкавая, 3-я Навасёлкавая, 6-я Навасёлкавая, 9-я Навасёлкавая, Мазурава (з поўдня)^[1]. На прудкоўскім адрэзку пераважае індывідуальная забудова сядзібнага тыпу сумежных вуліц, на валатаўскім адрэзку жылая забудова складаецца з трох шматпавярховых дамоў, на клёнкаўскім адрэзку жылой забудовы, якая б непасрэдна адносілася да вуліцы Каменшчыкава, няма.

Фарміраванне трасы вуліцы пачалося яшчэ да 2-й сусветнай вайны. На нямецкіх аэрафотаздымках 1941 года зафіксавана дарога паміж вуліцай Леніна (будучая Крупскай) і вуліцай Камсамольскай (будучая Юнацкая)^[2]. Вуліца склалася ў пасляваенны час. Да 1975 года называлася 3-й Праезджай. Цяперашнюю назву атрымала ў гонар У. Р. Каменшчыкава — савецкага ваеннага лётчыка, Героя Савецкага Саюза, удзельніка баявых дзеянняў 1941—1943 гадоў^[3][4]. Інфармацыйны стэнд з партрэтам і біяграфічнымі звесткамі Каменшчыкава ў канцы 1980-х — пачатку 1990-х гадоў быў на фасадзе дома па 9-й Навасёлкавай вуліцы, які выходзіць на вуліцу Каменшчыкава.

На вуліцы знаходзяцца:

• харчовая міні-крама;
• аўтарская майстэрня «Кузніца» (продаж каваных вырабаў і металаканструкцый; здача гандлёвых памяшканняў у арэнду);
• рынкавы комплекс «Прудкоўскі» (займае 4,2 га.);
• шматфункцыянальны комплекс з піцэрыяй, стаматалагічнай клінікай, крамай вопраткі;
• крама кветак;
• фітнес-клуб;
• майстэрня па рамонце мабільных тэлефонаў, бытавой тэхнікі;
• турыстычнае агенцтва;
• праваслаўны храм Праабражэння Гасподняга;
• аўтамабільная паркоўка (каля 0,3 га).

У перспектыве плануюць пашырыць вуліцу Каменшчыкава на адрэзку ад вуліцы Крупской да Прудкоўскага рынку.^[5]