Віктар Кірылавіч Барабанцаў

Віктар Кірылавіч Барабанцаў (нар. 28 верасня 1947, г. Гомель) — беларускі жывапісец, педагог.

Нарадзіўся 28 верасня 1947 года ў Гомелі. Скончыў у 1968 годзе Мінскае мастацкае вучылішча, у 1978 годзе Беларускі тэатральна-мастацкі інстытут. Вучыўся ў М. Залознага, Г. Вашчанкі, У. Стальмашонка. Удзельнік мастацкіх выставак з 1976 года^[1].

Член Беларускага саюза мастакоў з 1983 года. Жыве ў г. Мінску^[1].

Працуе ў галіне станковага і манументальна-дэкаратыўнага жывапісу. Асноўныя творы: партрэты Л. Давідовіч, В. Елізар’ева, Н. Шчаснай, «Маці», Ц. Пархуты, Н. Пяюна; карціны «М. Гусоўскі», «Абуджэнне» (К. Каліноўскі, В. Урублеўскі), «Выклік кінуты» (С. Будны), «Кірыла Тураўскі»; «Тут была вёска», «Эвакуацыя», «Пакінуты двор», «Трывожны крык»; трыпціх «Зона»; фрэскі «Сынам зямлі беларускай», мазаіка «Партрэты асветнікаў», вітражы «Помнікі гісторыі і культуры Беларусі», энкаўстыка «На Купалле»^[1].

Творы знаходзяцца ў Нацыянальным мастацкім музеі Беларусі, фондах БСМ і Музеі сучаснага выяўленчага мастацтва ў Мінску, Літаратурным музеі М. Багдановіча, музеі К. Чорнага ў Цімкавічах, Магілёўскім абласным мастацкім музеі імя П. Масленікава, карціннай галерэі г.п. Брагіна, Дзяржаўным музеі гісторыі беларускай літаратуры^[1].

Заслужаны дзеяч мастацтваў Беларусі. Лаўрэат прэміі Федэрацыі прафсаюзаў Беларусі (1991), прэміі Прэзідэнта Рэспублікі Беларусь «За духоўнае адраджэнне» (2001)^[2].

• Барабанцаў Віктар Кірылавіч // Беларускі саюз мастакоў, 1938—1998 = Belarussian union of artists, 1938—1998 : Энцыкл. давед. / Аўт.-склад.: Б. А. Крэпак і інш.. — Мн.: ВТАА «Кавалер Паблішэрс», 1998. — 663 с. — 3 000 экз. — ISBN 985-6427-09-6.

• Віктар Кірылавіч Барабанцаў на сайце анлайн-энцыклапедыі «Беларусь у асобах і падзеях»