Грамавы ўдар (карная аперацыя)

Аперацыя «Грамавы ўдар»
Асноўны канфлікт: Другая сусветная вайна, Вялікая Айчынная вайна
Дата	21—27 сакавіка; 28 сакавіка — 2 красавіка 1943
Прычына	Прысутнасць узброеных савецкіх партызанскіх падраздзяленняў у тыле групы армій «Цэнтр»
Статус	аперацыя завершана
Праціўнікі
Трэці рэйх: 201-я ахоўная дывізія 4 ахоўныя батальёны танкавыя ўзводы «Блюхер» і «Вернер» артылерыйскія і сапёрныя падраздзяленні  СССР: 3-я Беларуская партызанская брыгада 4-я Беларуская партызанская брыгада Партызанская брыгада імя С. М. Кароткіна Партызанская брыгада «За Савецкую Беларусь»
Медыяфайлы на Вікісховішчы

Аперацыя «Грамавы́ ўдар» (ням.: Unternehmen «Donnerkeil») — кодавая назва карнай аперацыі нямецкіх акупацыйных улад у Другой сусветнай вайны супраць партызан і насельніцтва на тэрыторыі Віцебскага, Гарадоцкага, Мехаўскага, Полацкага і Сіроцінскага раёнаў у трохвугольніку Віцебск — Полацк — Невель на захад ад ракі Обаль у сакавіку—красавіку 1943 г. З’яўлялася працягам карнай аперацыі «Шаравая маланка» (ням.: «Kugelblitz») і праводзілася ў 2 этапы: 21 — 27 сакавіка і 28 сакавіка — 2 красавіка 1943 г.

Аперацыю праводзілі 201-я ахоўная дывізія, 4 ахоўныя батальёны, батальён палка «Брандэнбург», танкавыя ўзводы «Блюхер» і «Вернер», артылерыйскія і сапёрныя падраздзяленні. Кіраўніцтва аперацыяй ажыццяўляў камандзір 201-й ахоўнай дывізіі генерал-маёр Якабі.

Асноўныя сілы партызан (партызанскія брыгады 3-я і 4-я Беларускія, імя С. М. Кароткіна, брыгада «За Савецкую Беларусь») здолелі з баямі выйсці з-пад удараў карнікаў. Карнікі загубілі 542 чалавек, 345 чалавек вывезлі на прымусовыя работы ў Германію, захапілі маёмасць і прадукты харчавання.

Былі спалены вёскі Вярэчча (загублена 30 чал.), Фралова (загублена 12 чал.) Гарадоцкага раёна, Шалкова Полацкага раёна, вёскі Дражнікі, Заазер’е, Задобрыя, Зуева, Лапаткова, Чытавухі, Шчамілаўка, Ямішча.

• Беларусь у Вялікай Айчыннай вайне, 1941-1945: Энцыклапедыя / Рэдкал.: І. П. Шамякін (гал. рэд.) і інш. — Мн.: БелСЭ, 1990. — С. 633. — 680 с. — 20 000 экз. — ISBN 5-85700-012-2.