Міхаіл Самуілавіч Басалыга

Міхаіл Самуілавіч Басалыга
Міхаіл Самуілавіч Басалыга
Дата нараджэння	1 мая 1942 (83 гады)
Месца нараджэння	Слуцк, Слуцкі раён, Мінская вобласць, БССР, СССР;
Грамадзянства	Беларусь;
Род дзейнасці	мастак, экслібрысіст
Месца працы	Беларускі філіял УНДІТЭ; Мінскі дзяржаўны мастацкі каледж імя А. К. Глебава;
Жанр	графіка і кніжная графіка
Вучоба	Школа № 10 імя С. Ф. Рубанава; Мінскае мастацкае вучылішча (1963); Беларускі дзяржаўны тэатральна-мастацкі інстытут (1970);
Уплыў	Алег Вікенцьевіч Луцэвіч, Пётр Серапіёнавіч Крохалеў і Уладзімір Кірылавіч Гоманаў
Член у	Беларускі саюз мастакоў;
Узнагароды	; Мастацтва кнігі[d]

Міхаіл Самуілавіч Басалыга (1 мая 1942, Слуцк, Беларусь) — беларускі савецкі графік^[1]. Брат Уладзіміра Басалыгі.

Біяграфія

Нарадзіўся 1 мая 1942 года ў Слуцку. У 1963 годзе скончыў Мінскае мастацкае вучылішча, у 1970 годзе — Беларускі дзяржаўны тэатральна-мастацкі інстытут. Вучыўся ў А. Луцэвіча, П. Крохалева, У. Гоманава^[2].

У 1965—1975 гадах працаваў у Беларускім філіяле Усесаюзнага інстытута тэхнічнай эстэтыкі, з 1993 года дырэктар Мінскага мастацкага вучылішча^[2].

Член Беларускага саюза мастакоў з 1971 года. Жыве ў г. Мінску^[2].

Творчасць

Працуе ў кніжнай і станковай графіцы. Удзельнік мастацкіх выставак з 1963 года^[2]. Асноўныя творы: альбом «Гравюры Францыска Скарыны» (1972, сумесна з У. С. Басалыгам)^[1], ілюстрацыі да кніг «Вершы і паэмы» і «Курган»^[2], верша «Хлопчык і лётчык»^[3]^[4]^[5] і іншых твораў Я. Купалы, да кніг «Дзень добры, мама» (1977)^[2], «Ключ жураўліны» і «Ave Maria» (1980, усё ў тэхніцы малюнка тушшу^[2]) М. Танка, «Хай будзе святло» і «Напісанае застаецца» (1982, афорт^[1]) А. Петрашкевіча^[2], «Вершы пяці кніг» Г. Бураўкіна (1976)^[1], трылогіі «На ростанях» (2006) Я. Коласа^[6]^[7]; серыя аўталітаграфій «Айчыну сваю баронячы», літаграфскія лісты «Леў Сапега», «Рагнеда», «Юрый Алеша», «Сафія Аленька», «Давід Гродзенскі», «Мірскі замак».

Творы знаходзяцца ў Нацыянальным мастацкім музеі Беларусі, фондах БСМ, Музеі сучаснага выяўленчага мастацтва ў Мінску, літаратурных музеях Я. Купалы і Я. Коласа, Слуцкім краязнаўчым музеі, Магілёўскім абласным мастацкім музеі імя П. Масленікава, Траццякоўскай галерэі ў Маскве^[2].

Узнагароды

Узнагароджаны рэспубліканскімі і замежнымі дыпломамі і граматамі за мастацкае афармленне кніг^[2]. Узнагароджаны дыпломам імя Ф. Скарыны на рэспубліканскім конкурсе «Мастацтва кнігі» і дыплом III ступені на ўсесаюзным конкурсе 1972 года за афармленне альбом «Гравюры Францыска Скарыны»^[1]. Сярэбраны медаль ВДНГ СССР (1985)^[2].

Узнагароджаны медалём 100 гадоў БНР Рады Беларускай Народнай Рэспублікі^[8].

Крыніцы

↑ ^а ^б ^в ^г ^д Басалыга Михаил Самуилович // Биографический справочник. — Мн.: «Белорусская советская энциклопедия» имени Петруся Бровки, 1982. — Т. 5. — С. 43. — 737 с.
↑ ^а ^б ^в ^г ^д ^е ^ё ^ж ^з ^і ^к Басалыга Міхаіл Самуілавіч // Беларускі саюз мастакоў, 1938—1998 = Belarussian union of artists, 1938—1998 : Энцыкл. давед. / Аўт.-склад.: Б. А. Крэпак і інш.. — Мн.: ВТАА «Кавалер Паблішэрс», 1998. — 663 с. — 3 000 экз. — ISBN 985-6427-09-6.
↑ М. С. Басалыга. «Курган»
↑ ВЫСТАВКА «ЯНКА КУПАЛА И ЯКУБ КОЛАС — БЕЛОРУССКИЕ ПЕСНЯРЫ»(недаступная спасылка)
↑ Басалыга Міхаіл Самуілавіч Архівавана 21 ліпеня 2012.
↑ Вокладка кнігі Архівавана 6 сакавіка 2016.
↑ Ілюстрацыя М. С. Басалыгі(недаступная спасылка)
↑ Алексіевіч, Пазьняк, Вольскі, Эрыксан, Белавус. Хто яшчэ ўзнагароджаны мэдалём у гонар БНР-100

Літаратура

Басалыга Міхаіл Самуілавіч // Беларускі саюз мастакоў, 1938—1998 = Belarussian union of artists, 1938—1998 : Энцыкл. давед. / Аўт.-склад.: Б. А. Крэпак і інш.. — Мн.: ВТАА «Кавалер Паблішэрс», 1998. — 663 с. — 3 000 экз. — ISBN 985-6427-09-6.