ပျောက်ဆုံးသောဒင်္ဂါးပြား ပုံဥပမာ

ပျောက်ဆုံးသောဒင်္ဂါးပြား ပုံဥပမာ (အင်္ဂလိပ်: Parable of the Lost Coin) သည် ယေရှုခရစ် မိန့်ကြားခဲ့သည့် ထင်ရှားသော ပုံဥပမာတစ်ခုဖြစ်ပြီး လုကာခရစ်ဝင်ကျမ်း အခန်းကြီး ၁၅၊ အငယ် ၈ မှ ၁၀ တွင် မှတ်တမ်းတင်ထားသည်။ ဤပုံဥပမာသည် ပျောက်ဆုံးသောသိုး၏ ပုံဥပမာ နှင့် ပျောက်ဆုံးသောသား၏ ပုံဥပမာ တို့နှင့်အတူ လုကာခရစ်ဝင်ကျမ်း၏ "ပျောက်ဆုံးခြင်းနှင့် ပြန်လည်တွေ့ရှိခြင်း" ဆိုင်ရာ ပုံဥပမာသုံးခုထဲမှ တစ်ခုဖြစ်သည်။

ပုံဥပမာတွင် ငွေဒင်္ဂါးဆယ်ပြားရှိသည့် မိန်းမတစ်ဦးအကြောင်းကို ဖော်ပြထားသည်။ ထိုမိန်းမသည် ၎င်း၏ငွေဒင်္ဂါးများထဲမှ တစ်ပြားပျောက်ဆုံးသွားသောအခါ ဆီမီးထွန်းညှိ၍ တစ်အိမ်လုံးကို သေချာစွာ လှည်းကျင်းရှာဖွေခဲ့သည်။ ပျောက်ဆုံးသွားသော ဒင်္ဂါးပြားကို ပြန်လည်တွေ့ရှိသောအခါ သူငယ်ချင်းများနှင့် အိမ်နီးချင်းများကို ခေါ်ယူပြီး မိမိနှင့်အတူ ဝမ်းမြောက်ကြရန် ပြောဆိုခဲ့သည်။

ဤပုံဥပမာ၏ အဓိက သွန်သင်ချက်မှာ ဘုရားသခင်သည် အပြစ်သားတစ်ဦး နောင်တရသည့်အခါ သို့မဟုတ် ပျောက်ဆုံးသူတစ်ဦး ဘုရားသခင်ထံ ပြန်လာသည့်အခါ ကောင်းကင်ဘုံတွင် များစွာ ဝမ်းမြောက်ကြောင်းကို ဖော်ပြခြင်းဖြစ်သည်။ ယေရှုက "ဘုရားသခင်၏ ကောင်းကင်တမန်တို့သည် နောင်တရသော လူဆိုးတယောက်၌ ဝမ်းမြောက်ခြင်းရှိကြသည်" ဟု နိဂုံးချုပ် မိန့်တော်မူခဲ့သည်။ ၎င်းသည် ဘုရားသခင်၏ ချစ်ခြင်းမေတ္တာ၊ ခွင့်လွှတ်ခြင်းနှင့် ပျောက်ဆုံးသူများကို ပြန်လည် ရှာဖွေလိုသော ဆန္ဒ ပြင်းပြမှုကို ပုံဆောင်ပြသခဲ့သည်။

၈ တနည်းကား၊ “တစုံတယောက်သောမိန်းမ၌ ငွေဆယ်ပြားရှိ၍ တပြားပျောက်လျှင်၊ ဆီမီးကိုထွန်း၍ မတွေ့မှီတိုင်အောင် တအိမ်လုံးကိုလှည်း၍ စေ့စေ့မရှာဘဲ နေမည်လော။ ၉ တွေ့ပြီးလျှင် အဆွေခင်ပွန်းအိမ်နီးချင်းများကိုခေါ်၍၊ 'ပျောက်သောငွေကို ငါတွေ့ပြီ။ ငါနှင့်အတူ ဝမ်းမြောက်ကြလော့' ဟု ဆိုတတ်သည် မဟုတ်လော။ ၁၀ ထိုနည်းတူ ငါဆိုသည်ကား၊ ဘုရားသခင်၏ ကောင်းကင်တမန်တို့သည် နောင်တရသောလူဆိုးတယောက်၌ ဝမ်းမြောက်ခြင်းရှိကြသည်” ဟု မိန့်တော်မူ၏။

— ရှင်လုကာခရစ်ဝင်ကျမ်း ၁၅း ၈-၁၀, သမ္မာကျမ်းစာ

-

ဝီကီမီဒီယာ ကွန်မွန်းစ်တွင် ပျောက်ဆုံးသောဒင်္ဂါးပြား ပုံဥပမာ နှင့် ပတ်သက်သော မီဒီယာ ရှိသည်။