கு. செல்வப்பெருந்தகை

கு. செல்வப்பெருந்தகை (K. Selvaperunthagai) ஓர் இந்திய அரசியல்வாதியும், தமிழ்நாடு காங்கிரஸ் கமிட்டியின் மாநில தலைவராக உள்ளார்.^[1]

இவர் தனது அரசியல் வாழ்க்கையை பூவை மூர்த்தி தலைமையிலான புரட்சி பாரதம் கட்சியில் தொடங்கினர். பின்பு அதில் இருந்து விலகி கிருஷ்ணசாமி தலைமையிலான புதிய தமிழகம் கட்சியில் இணைந்தார். ^[2] அதன் பின்பு தொல். திருமாவளவன் தலைமையிலான விடுதலைச் சிறுத்தைகள் கட்சியில் இணைந்து, அக்கட்சி சார்பாக 2006 ஆம் ஆண்டு தமிழக சட்டசபைக்கான தேர்தலில் மங்களூர் தொகுதியிலிருந்து போட்டியிட்டு, தமிழக சட்டமன்றத்திற்குத் தேர்ந்தெடுக்கப்பட்டார். அதன் பின்பு திருமாவளவன் உடன் ஏற்பட்ட கருத்து வேறுபாடு காரணமாக விடுதலைச் சிறுத்தைகள் கட்சியில் இருந்து விலகினார். அதன் பிறகு 2008 ஆம் ஆண்டு பகுஜன் சமாஜ் கட்சியில் இணைந்து, அக்கட்சியின் மாநில தலைவரானர். பின்பு அக்கட்சியில் இருந்து விலகி 2010 ஆம் ஆண்டு தமிழ்நாடு காங்கிரஸ் கட்சியில் இணைந்தார்.^[3] அதன் பிறகு 2011 ஆம் ஆண்டு செங்கம் சட்டமன்றத் தொகுதியிலும்,2016 ஆம் ஆண்டு திருபெரும்புதூர் சட்டமன்றத் தொகுதியிலும் போட்டியிட்டு தோல்வியடைந்தார். அதனைத் தொடர்ந்து 2021 ஆம் ஆண்டு நடைபெற்ற, தமிழ்நாடு சட்டமன்ற தேர்தலில் மீண்டும் திருப்பெரும்புதூர் சட்டமன்றத் தொகுதியில், இந்திய தேசிய காங்கிரஸ் கட்சியின் சார்பில் மீண்டும் போட்டியிட்டு வெற்றி பெற்று காங்கிரஸ் கட்சியின் சட்டமன்றக் குழு தலைவராகவும் தேர்ந்தெடுக்கப்பட்டார்.^[4] 2024 பெப்ரவரி 17 அன்று தமிழ்நாடு காங்கிரசு கமிட்டி தலைவராக செல்வப்பெருந்தகை நியமிக்கப்பட்டார்.