வெ. ப. சுப்பிரமணிய முதலியார்

வெள்ளக்கால் ப. சுப்பிரமணிய முதலியார்
வெ. ப. சுப்பிரமணிய முதலியார்
பிறப்பு	(1857-08-14)14 ஆகத்து 1857 ஆழ்வார்குறிச்சி, பழைய திருநெல்வேலி மாவட்டம், மதராசு தலைமாகாணம், பிரித்தானிய இந்தியா (தற்போது தென்காசி மாவட்டம், தமிழ்நாடு, இந்தியா)
இறப்பு	12 அக்டோபர் 1946(1946-10-12) (அகவை 89)
கல்வி	சென்னை கிறித்துவக் கல்லூரி, சைதாப்பேட்டை அரசு வேளாண்மைக் கல்லூரி
பணி	கால்நடை மருத்துவர்
அறியப்படுவது	தமிழ்ப் புலவர்
பட்டம்	ராவ் பகதூர்
பெற்றோர்	பழனியப்ப முதலியார்

வெள்ளக்கால் பழனியப்ப சுப்பிரமணிய முதலியார் (வெ.ப.சு, ஆகத்து 14,^[1] 1857 - அக்டோபர் 12, 1946) கால்நடை மருத்துவர். அம்மருத்துவ நூல்களைத் தமிழில் முதன்முறையாக மொழிபெயர்த்த தமிழ்ப் புலவர் என்ற சிறப்பு இவருக்கு உண்டு.^[2]

வெ. ப. சுப்பிரமணிய முதலியார் 1857 ஆகத்து 14 ஆம் நாள் இன்றைய தென்காசி மாவட்டம் கடையத்தை அடுத்த ஆழ்வார்குறிச்சி எனும் ஊரில் வெள்ளக்கால் பழனியப்ப முதலியாருக்கு மகனாகப் பிறந்தார்.^[3]

வெ. ப. சுப்பிரமணிய முதலியார் திருநெல்வேலி தெற்குப் புதுத்தெருவில் இருந்த கணபதி வாத்தியாரின் திண்ணைப் பள்ளியில் தொடக்கக் கல்வியைப் பெற்றார். பின்னர் நெல்லை அரசரடி கிறித்துவ மிஷன் பள்ளியில் இடைநிலைக் கல்வியைப் பெற்றார். நெல்லையில் உள்ள ம. தி. தா. இந்து கல்லூரியில் பயின்று மெட்ரிக்குலேஷன் தேறினார். பின்னர் சென்னை கிறித்துவக் கல்லூரியில் பயின்றார். பிறகு சைதாப்பேட்டையில் இருந்த அரசு வேளாண்மைக் கல்லூரியில் பயின்று 1884 ஆம் ஆண்டில் ஜி. எம். ஏ. சி. என்னும் வேளாண்மையில் பட்டம் பெற்றார்.^[4]

1895 ஆம் ஆண்டில் முதுநிலை கால்நடை மருத்துவ உதவியாளராகவும் 1911 ஆம் ஆண்டில் துணைக் கண்காணிப்பாளராகவும் பணியாற்றினார்.^[4]

பின்வரும் நூல்களை இவர் இயற்றியுள்ளார்.^[5]

• அகலிகை வெண்பா (246 வெண்பாக்கள்)
• இராமாயண உள்ளுறைப் பொருளும் தென்னிந்திய சாதி வரலாறும்
• நெல்லைச் சிலேடை வெண்பா
• தனிக்கவித்திரட்டு (இத்தொகுப்பு மடக்கு, யமகம், திரிபு, சிலேடை முதலிய சொல்லணிகளும் பொருளணிகளும் கொண்டு எழுதப்பட்டது).^[6]
• கம்பராமாயண சாரம் (செந்தமிழ் இதழில் உரையும் கதைத் தொடர்ச்சியுமாக இதனை வெளியிட்டு வந்தார். 864 பாடல்களின் தொகுப்பு)^[6]
• கம்பராமாயணத்தையும் இராமாயணத்தையும் எரிக்கும் முயற்சி^[3]
• பகவத் கீதை (கும்மி)^[3]

• சுவர்க்க நீக்கம்^[2] முதற்காண்டம் (1895) - ஆங்கிலேயக் கவிஞர் ஜான் மில்டன் எழுதிய பாரடைஸ் லாஸ்ட் (Paradise Lost; 1667) என்னும் ஆங்கிலப் பெருங்காப்பியத்தின் முதல் நூலின் செய்யுள் மொழிபெயர்ப்பு - விரிவுரை ; மில்ட்டனார் சரித்திரத்துடன்^[7][5][8]
• கோம்பி விருத்தம் (1897)^[9] - ஜேம்ஸ் மெர்ரிக் (James Merrick; 1720–1769) எனும் ஆங்கிலேயக் கவிஞர், கிரேக்க மொழியிலிருந்து ஆங்கிலத்துக்கு மொழிமாற்றிய The Chameleon^[10] எனும் செய்யுளின் தழுவல் மொழிபெயர்ப்பும் விளக்கமும்^[7] (இதன்பின் அந்த ஆங்கிலச் செய்யுளை ம. கோபாலகிருஷ்ண ஐயர் தமிழாக்கம் செய்து அரும்பொருட்டிரட்டு (1915) எனும் தன் மொழிபெயர்ப்புக் கவிதைத் தொகுப்பில் வெளியிட்டார்).^[11]
• கல்வி விளக்கம் (1899) – எர்பெர்ட் இஸ்பென்சர் (Herbert Spencer) எழுதிய 'கல்வி' (Education: Intellectual, Moral, and Physical ; 1866-?)^[5] எனும் நூலின் மொழிபெயர்ப்பு
• சருவ சன செபம் (1939) - சைன சமய அறிஞர் சம்பத்து ராய சைனர் (Champat Rai Jain) எழுதிய "எதிரிடைகள் இசைவுறுதல்" (Confluence Of Opposites; 1921) என்ற நூலின் இறுதிப்பகுதியைத் தழுவி எழுதப்பட்டது. உலகத்தோருக்குத் தேவையான பொது அறத்தை 137 அடிகளில் கூறுகிறது.)^[6]
• கால்நடைக்காரர்^[5]
• இந்திய கால்நடைகளுக்கு ஏற்படும் நோய்கள்^[5]
• இந்து தேசத்துக் கால்நடைக்காரர் புஸ்தகம்
• இந்தியாவில் கால்நடைகளுக்குக் காணுகிற அதிக பிராணாபாயமான வியாதிகள்

• ஆறுமுக நாவலர் சரித்திரம் (சிவகாசி அருணாசலக் கவிராயர் எழுதிய செய்யுள் நூல் பரிசோதிப்பு, 1898)^[3][7]

வெ. ப. சுப்பிரமணிய முதலியார் 1916 ஆம் ஆண்டில் திருநெல்வேலி வட்டாட்சிக் கழகத்தில் உறுப்பினரானார். 1919 ஆம் ஆண்டில் அதன் துணைத்தலைவர் ஆனார். 1920 ஆம் ஆண்டில் அதன் தலைவராக ஆனார். 1922ஆம் ஆண்டில் தென்காசி நீதிமன்ற இருக்கையின் தலைவராக நியமிக்கப்பட்டார்.

ஆங்கிலேய அரசிடம் ராவ் பகதூர் சாகிப் என்னும் பட்டத்தை 1926ஆம் ஆண்டு பெற்றார்.^[5]

இவர் 1946 அக்டோபர் 12 ஆம் நாள் மறைந்தார்.^[3][5]