Іван нарадзіўся ў Мінску 10 чэрвеня 1989 года. Маці — Людміла Краўцова, беларуская спявачка[4], бацька — Яўген Іванавіч Краўцоў (1964—2012[5]) — саўладальнік і старшыня камерцыйнага банка «Мінсккомплексбанк», далучанага да Беларусбанка ў 2005 годзе[6]. Бабуля — Галіна Іванаўна Краўцова, прафесар эканомікі БДЭУ[7][8].
Кар’ера
Да ўдзелу ў выбарчай кампаніі
Іван з’яўляўся заснавальнікам і арт-дырэктарам Архітэктурнага бюро 35 у Мінску[9]. Да мая 2019 года Іван Краўцоў працаваў галоўным стратэгічным дырэктарам Мінскага гадзіннікавага завода «Луч»[10].
У маі 2020 года Іван Краўцоў далучыўся да перадвыбарчай каманды беларускага банкіра Віктара Бабарыкі як выканаўчы менеджар па публічных адносінах[11]. 28 ліпеня 2020 года разам з Марыяй Калеснікавай і іншымі членамі каманды Віктара Бабарыкі ён падаваў хадайніцтва ў КДБ Беларусі пра змену Віктару меры ўтрымання[3].
Пасля выбараў, 18 жніўня 2020 года, палітычныя і грамадскія актывісты абвясцілі пра стварэнне Каардынацыйнай рады. Сябры каардынацыйнай рады ставілі за мэту правядзенне перамоў з беларускімі ўладамі пра яе мірную перадачу[12]. Іван увайшоў у склад Каардынацыйнай рады ў якасці яе выканаўчага сакратара.
1 верасня 2020 года Краўцоў быў выкліканы на допыт у Следчы камітэт Рэспублікі Беларусь. Ён быў апытаны ў якасці сведкі ў рамках расследавання па крымінальнай справе па артыкуле 361 Крымінальнага кодэкса Беларусі (стварэнне экстрэмісцкага фарміравання)[1].
Выкраданне Марыі Калеснікавай і крымінальнае абвінавачанне
7 верасня 2020 года ў СМІ з’явілася інфармацыя, што знікла каардынатар каманды Віктара Бабарыкі Марыя Калеснікава. Яна прапала разам з Іванам Краўцовым і прэс-сакратаром Каардынацыйнай рады Антонам Раднянковым[13][14].
Як высветлілася пазней, Краўцова адвезлі ў Дэпартамент фінансавых расследаванняў[be-tarask]Камітэта дзяржаўнага кантролю Рэспублікі Беларусь, дзе невядомыя сілавікі пагражалі яму 12-гадовым зняволеннем. Яны патрабавалі ад Краўцова вывезці Калеснікаву з краіны на асабістым аўтамабілі. На думку сілавікоў, аперацыя мусіла дапамагчы «дээскалацыі» палітычнай сітуацыі ў Беларусі, а праўладныя ЗМІ павінны былі абвясціць, што «лідары расчараваліся ў пратэсце»[15][16][17][18].
У той жа дзень у кватэры Краўцова адбыўся ператрус[19]. Нягледзячы на тое, што супрацоўнікі КДБ пагражалі Марыі Калеснікавай турмой або забойствам, яна здолела застацца, наўмысна парваўшы пашпарт на беларуска-ўкраінскай мяжы[20][21][22][23]. Краўцоў і Раднянкоў здолелі перасячы ўкраінскую мяжу, нягледзячы на тое, што Аляксандр Лукашэнка абвясціў пра просьбу экстрадыцыі абодвух[24].
У жніўні 2020 года Віктар Бабарыка і Марыя Калеснікава ў відэазвароце заявілі пра стварэнне палітычнай партыі «Разам». Гаворка вялася пра тое, што неўзабаве каманда падасць дакументы на рэгістрацыю партыі ў адпаведныя органы[27][28]. Аднак неўзабаве Марыя Калеснікава і іншыя сябры каманды Бабарыкі былі арыштаваны. Стварэнне палітычнай партыі аднавілася ў канцы сакавіка 2021 года. Разам з іншымі членамі каманды і актывістамі ў аргкамітэт партыі ўвайшоў таксама і Іван Краўцоў[29][30].
23 студзеня 2024 года Следчы камітэт Рэспублікі Беларусь распачаў спецыяльную (завочную) вытворчасць у дачыненні да Краўцова па чатырох артыкулах Крымінальнага кодэкса. 16 траўня таго ж года Мінскі гарадскі суд завочна асудзіў яго да 11 гадоў калоніі ўзмоцненага рэжыму[33].
