Аляксандр Сяргеевіч Лук’янаў

Аляксандр Сяргеевіч Лук’янаў
руск.: Александр Сергеевич Лукьянов
Род дзейнасці	функцыянер, прапагандыст
Дата нараджэння	10 чэрвеня 1989(1989-06-10) (36 гадоў)
Месца нараджэння	Магілёў, Магілёўская вобласць, Беларуская ССР, СССР
Грамадзянства	СССР  Беларусь
Месца працы	Міністэрства па надзвычайных сітуацыях Рэспублікі Беларусь БРСМ
Партыя	Белая Русь
Член у	БРСМ Савет Рэспублікі

Аляксандр Сяргеевіч Лук’янаў (руск.: Александр Сергеевич Лукьянов; нар. 10 чэрвеня 1989, Магілёў) — дзеяч рэжыму Лукашэнкі ў Беларусі, кіраўнік Беларускага рэспубліканскага саюза моладзі (з 13 жніўня 2021). Член Савета Рэспублікі 8-га склікання^[1]. Уключаны ў Чорны спіс Еўрасаюза за незаконныя дэпартацыі і перавыхаванне ўкраінскіх дзяцей у часе ўварвання Расіі ва Украіну^[2].

Маці была намесніцай дырэктара кампаніі «Пажспецсэрвіс», якая ажыццяўляе праектаванне сістэм пажарнай сігналізацыі. Бацька — дырэктар гэтай арганізацыі і пенсіянер МНС^[3].

У 2007—2021 гадах служыў у органах і падраздзяленнях МНС, пайшоў у запас у званні маёра запасу^[3]. У 2011 годзе скончыў Камандна-інжынерны інстытут МНС па спецыяльнасці «Прадухіленне і ліквідацыя надзвычайных сітуацый». Пазней атрымаў ступені магістра і кандыдата тэхнічных навук у тым самым універсітэце.

Член БРСМ. З 2018 года прадстаўляў БРСМ у Моладзевай палаце пры Парламенцкім сходзе Беларусі і Расіі. 13 жніўня 2021 года абраны першым сакратаром ЦК БРСМ^[4]. У 2022 годзе разам з прарасійскімі актывістамі ўдзельнічаў у закрыцці бара «Каліноўскі» ў Мінску, што было часткай кампаніі па змаганні з асобай Кастуся Каліноўскага^[5].

У 2023 годзе разам з прапагандыстам Рыгорам Азаронкам наведваў акупаваныя Расіяй украінскія тэрыторыі Херсонскай і Запарожскай абласцей.

З 2024 года член Савета Рэспублікі 8-га склікання, працуе ў Пастаяннай камісіі Савета Рэспублікі Нацыянальнага сходу Рэспублікі Беларусь па міжнародных справах і нацыянальнай бяспецы^[1]. Член партыі «Белая Русь»^[6].

Разам з фондам Аляксея Талая ўдзельнічаў у незаконных дэпартацыях і перавыхаванні ўкраінскіх дзяцей у часе ўварвання Расіі ва Украіну, за што ў чэрвені 2024 года ўнесены ў Чорны спіс Еўрасаюза^[2]. У ліпені 2024 года да гэтых санкцый далучыліся таксама Швейцарыя^[7], Албанія, Боснія і Герцагавіна, Ісландыя, Ліхтэнштэйн, Малдова, Нарвегія, Паўночная Македонія, Украіна, Чарнагорыя^[8]. У лютым 2025 года Аўстралія далучылася да санкцый супраць Лук’янава^[9].

Жонка — Маргарыта Лук’янава, займаецца арганізацыяй дзіцячых свят ва ўласным клубе Danakids, ёсць дачка Мілана^[3].

Сябруе з Дзмітрыем Баскавым, хакейным функцыянерам і асобай, набліжанай да Аляксандра Лукашэнкі^[3].

Развівае культ асобы Аляксандра Лукашэнкі, паводле яго «Лукашэнка — нацыянальны лідар і герой, асоба гістарычнага маштабу! Гарант міру не толькі ў нашай краіне, але і ва ўсім рэгіёне»^[3].

Заклікае працягваць палітычныя рэпрэсіі супраць апанентаў Лукашэнкі: «Тэрарыстаў, экстрэмістаў, змагарскае паскуддзе, здраднікаў і ворагаў народа будзем выпальваць жалезам»^[3].