Капліца Святых Пятра і Паўла (Шарашова)

Капліца
Капліца Святых апосталаў Пятра і Паўла
52°33′03″ пн. ш. 24°12′54″ у. д.HGЯO
Краіна	Беларусь
Гарадскі пасёлак	Шарашова
Канфесія	Праваслаўе
Епархія	Брэсцкая і Кобрынская епархія
Тып будынка	капліца
Архітэктурны стыль	класіцызм
Будаўніцтва	1820—1824 гады
Стан	дзейны
Глобус Беларусі	globustut.by/shereshevo/…
Медыяфайлы на Вікісховішчы

Царква́ Святы́х Апо́сталаў Пятра́ і Па́ўла — праваслаўны храм у Шарашове, збудаваны ў 1824 годзе. Помнік драўлянага дойлідства з рысамі архітэктуры класіцызму.

Калі ў 1760 годзе была пабудавана новая Прачысценская царква, стары будынак, 1700 года пабудовы, разабралі і перанеслі на могілкі на ўскрайку мястэчка. У 1820—1824 гадах гэтая царква была перабудавана і асвечаная ў гонар святых апосталаў Пятра і Паўла.

Ля ўсходняе (алтарнае) сцяны царквы знаходзіцца магіла заслужанага прафесара Віленскага ўніверсітэта Міхаіла Баброўскага, які быў настаяцелем у мясцовай парафіяльнай царкве.

Улетку 1995 года храм загарэўся ад удару маланкі ў суседняе дрэва, аднак агонь не паспеў нанесці значных пашкоджанняў. Пасля рамонту быў усталяваны новы прастол.

Царква дзейнічае, набажэнствы адбываюцца ў дзень святых Першавярхоўных апосталаў Пятра і Паўла, а таксама ў дні паміну спачылых.

Адназрубная пабудова з трохграннай алтарнай апсідай накрытая двухсхільным дахам з вальмамі над алтаром. Шэсць калон надаюць порціку падабенства да класіцыстычнага^[1]. Галоўны фасад з трохвугольным франтонам, на якім размешчаныя два рамбічныя акенцы, увенчаны двух'яруснай фігурнай вежачкай. Астатнія вокны прамавугольныя.

У аздабленні храма выкарыстаныя паліхромная афарбоўка, дэкаратыўная шалёўка, роспіса на рэлігійныя сюжэты.

Інтэр’ер зальны. Скляпенні плоскія.

• Архітэктура Беларусі: Энцыклапедычны даведнік / Беларус. Энцыкл.; Рэкал.: А. А. Воінаў і інш. — Мн.: БелЭн, 1993. — 620 с. — 10 000 экз. — ISBN 5-85700-078-5.
• Праваслаўныя храмы Беларусі : энцыклапедычны даведнік / А. М. Кулагін; [рэдакцыйны савет: Г. П. Пашкоў, Л. В. Календа]. — Мінск: Беларуская Энцыклапедыя, 2007. — 653 с. 2000 экз. ISBN 978-985-11-0389-4

	Капліца Святых Пятра і Паўла (Шарашова) на Вікісховішчы

• Капліца Святых Пятра і Паўла (Шарашова) на сайце Radzima.org
• Капліца Святых Пятра і Паўла (Шарашова) на сайце Глобус Беларусі (руск.)
• Праваслаўе. By Архівавана 7 сакавіка 2019. (руск.)