Людміла Іванаўна Трапашка

Людміла Іванаўна Трапа́шка^[4] (14 лютага 1946 — 15 верасня 2021^[5][6][7]) — беларускі вучоны ў галіне аховы раслін, доктар біялагічных навук (1999), прафесар (2006)^[7].

Нарадзілася ў вёсцы Капусціна (Валожынскі раён Мінскай вобласці Беларусі). У 1972 годзе скончыла Ленінградскі сельскагаспадарчы інстытут па спецыяльнасці «Вучоны-аграном па ахове раслін». З 1972 года працавала ў Навукова-даследчым інстытуце аховы раслін (сучасны Інстытут аховы раслін НАН Беларусі), дзе ў 1999—2021 гадах займала пасаду загадчыка лабараторыі энтамалогіі^[5].

Л. І. Трапашка аўтар навуковых прац па праблемах прагназавання феналогіі развіцця збожжавых культур, разліку эколага-эканамічных парогаў шкоднасці асноўных фітафагаў. Займалася даследаваннямі па біялагічным абгрунтаванні сістэмы абароны насенных пасеваў шматгадовых злакавых траў на меліяраваных глебах Беларускага Палесся^[5]. Прапанавала канцэпцыю, методыку і інтэгральныя паказчыкі экалагічнай бяспекі тэхналогій аховы раслін. Пад яе кіраўніцтвам выконваліся сумесныя фундаментальныя даследаванні з Каліфарнійскім універсітэтам у Дэйвісе, Інстытутам кукурузы Сербіі і Чарнагорыі, Літоўскім інстытутам земляробства, Польскім інстытутам біялогіі і аховы навакольнага асяроддзя^[5].

Займала пасады старшыні камісій па абароне дысертацый пры Інстытуце мікрабіялогіі НАН Беларусі, віцэ-старшыні Энтамалагічнага таварыства Беларусі, была членам экспертнага савета Беларускага рэспубліканскага фонду фундаментальных даследаванняў у галіне аграрных навук, галоўным рэдактарам зборніка навуковых прац «Охрана растений», членам рэдакцыйнай калегіі часопіса «Земледелие и охрана растений»^[5].

Л. І. Трапашка з’яўляецца аўтарам 152 навуковых прац, у тым ліку 2 манаграфій^[5]. 21 праца на замежных мовах апублікавана за мяжой у рэфератыўных часопісах^[5].

Сярод апублікаванага:

• Защита сельскохозяйственных растений при интенсивной технологии возделывания — Мн.: Ураджай, 1989. — 238, [2] c.;
• Краткосрочный прогноз фенологии растений, численности и вредоносности фитофагов на яровых зерновых культурах — Мн., 1999;
• Трепашко Л. И., Быковская А. В. Защита кукурузы от стеблевого мотылька при изменении вредоносности и расширении его ареала на территории Беларуси // Земледелие и защита растений, № 3, 2019;
• Справочник вредителей запасов / Институт защиты растений, Лаборатория энтомологии; [под ред. Е. В. Бречко, Л. И. Трепашко] — Минск : Журнал «Белорусское сельское хозяйство», 2021. — 37 с. — цв. ил.

• Трапа́шка Людміла Іванаўна // Беларуская энцыклапедыя: У 18 т. Т. 15: Следавікі — Трыо / Рэдкал.: Г. П. Пашкоў і інш. — Мн. : БелЭн, 2002. — Т. 15. — С. 515. — 10 000 экз. — ISBN 985-11-0035-8. — ISBN 985-11-0251-2 (т. 15).
• Республика Беларусь: Энциклопедия в 7 т. Т. 7: Снегирь ― Ящерицын / редкол.: Г. П. Пашков и др. — Минск: БелЭн, 2008. — 744 с.: ил. — ISBN 978-985-11-0421-1.  — С. 261—262.

• Трепашко Людмила Ивановна (04.02.1946 — 15.09.2021) (руск.) // Інстытут аховы раслін НАН Беларусі
• Памяти Людмилы Ивановны Трепашко // Вестник защиты растений, 2021, 104(3), с. 171—172. (руск.)
• Светлой памяти Трепашко Людмилы Ивановны // Земледелие и растениеводство. 2021;(5):52. (руск.)
• Трепашко Людмила Ивановна // База патентов Беларуси (руск.)