Сядзібна-паркавы ансамбль Аўраамавых (Хойнікі)

Сядзіба
Сядзібна-паркавы ансамбль Аўраамавых
51°53′01,76″ пн. ш. 29°57′49,3″ у. д.HGЯO
Краіна	Беларусь
Горад	Хойнікі
Архітэктурны стыль	Эклектыка
Статус	Гісторыка-культурная каштоўнасць Беларусі, шыфр 313Г000786шыфр 313Г000786
Глобус Беларусі	globustut.by/hojniki/ind…

Сядзібна-паркавы ансамбль Аўраамавых — комплекс будынкаў у Хойніках, які знаходзіцца ў гарадскім парку культуры і адпачынку па адрасе вул. Карла Маркса, 19.

Ён знаходзіцца ў гарадскім парку культуры і адпачынку, з’яўляецца помнікам архітэктуры і занесены ў Дзяржаўны спіс гісторыка-культурных каштоўнасцей Рэспублікі Беларусь як аб’ект гісторыка-культурнай спадчыны рэгіянальнага значэння.

Сядзібны комплекс пабудаваны ў канцы XIX — пачатку XX стагоддзяў^[1] абшарнікам Андрэем Абрагамавым (Абрамавым).

У комплексе змяшчаўся дзіцячы дом^[2]. З 5 верасня 2010 года будынак сядзібнага дома перададзены гарадскому краязнаўчаму музею.

Галоўным будынкам з’яўляецца двухпавярховы прамавугольны ў плане сядзібны дом, пабудаваны ў эклектычным стылі ў 1912 годзе. Ён асіметрычнай формы, доўгі, мураваны, з двухпавярховым правым аб’ёмам^[3]. Галоўны ўваход вырашаны тамбурам і тэрасай. На фасадзе вылучаюцца дэталі архітэктурнага дэкору (ліштвы, карнізы, руст і іншыя)^[3]. У пластыцы фасадаў выкарыстаны утрыраваныя формы класіцызму (франтоны, калонкі, сухарыкі), рэнесансу (арачныя нішы з ракавінамі), матывы сярэдневяковай замкавай архітэктуры (зубчастыя парапеты, байніцы). Планіроўка калідорная з вылучэннем параднай групы памяшканняў^[3]. Міжпаверхавая лесвіца знаходзіцца ў цэнтральным квадратным у плане вестыбюлі^[3].

Сярод іншых будынкаў сядзібы можна згадаць мельніцу, спіртзавод, пякарню (цяпер тэрыторыя цэха гідрапрывада)^[2].

Таксама захавалася парадная чатырохпілонная^[3] брама^[4].

Рэгулярны парк з элементамі пейзажнага стылю вакол сядзібнага дома закладзены ў 1910—1915 гадах на роўнай плоскай тэрыторыі^[2]. У плане разам з садам мае форму прамавугольніка плошчай прыкладна 10 га^[2]. У аснову кампазіцыі закладзены прынцып невялікіх квадратаў, якія пераважна маюць плошчу 0,1 га і ўтвораны сеткай алей, што перасякаюцца адна з адной. Алеі ўтвораны відамі і гібрыдамі таполі (адзіны выпадак у Беларусі)^[2].

На газоне змяшчаўся вялікі фантан дыяметрам 8 метраў^[2].

Побач з сядзібным домам у парку ўсталяваны помнік раману «Людзі на балоце» Івана Мележа.

Сярод відаў, якія сустракаюцца ў парку, можна згадаць таполю белую (Populus alba), канадскую марыландскую (Populus ×canadensis), кітайскую (Populus simonii), Populus suaveolens, Populus ×woobstii, ліпу драбналістую (Tilia cordata), Larix kaempferi і лістоўніцу еўрапейскую (Larix decidua), Opulaster opulifolius, елкі, дубы, клёны, конскі каштан, бэз і іншыя^[2].

Музей быў адкрыты 25 лістапада 1982 года ў адпаведнасці з рашэннем раённага выканаўчага камітэта. Ініцыятарам стварэння музея і яго кіраўніком быў ветэран вайны, вялікі энтузіяст, краязнавец Аляксандр Максімавіч Зелянкоўскі.

У сядзібным доме музей размясціўся пасля правядзення рэспубліканскага Дня беларускага пісьменства ў 2010 годзе.

Аб’ект Дзяржаўнага спіса гісторыка-культурных каштоўнасцей Рэспублікі Беларусь, шыфр 313Г000786

• Сядзібна-паркавы ансамбль Аўраамавых (Хойнікі) на сайце Radzima.org
• Сядзібна-паркавы ансамбль Аўраамавых (Хойнікі) на сайце Глобус Беларусі (руск.)