Уладзімір Іванавіч Сытчанка

Уладзімір Іванавіч Сытчанка (5 жніўня 1951, Маладзечна — 27 кастрычніка 2021) — беларускі мастак, Дацэнт Беларускай дзяржаўнай акадэміі мастацтваў.

Скончыў Беларускі тэатральна-мастацкі інстытут (1975). Вучыўся ў В. Шаранговіча, П. Любамудрава. Удзельнік мастацкіх выставак з 1975 года. Працаваў у розных жанрах станковай і кніжнай графікі, а таксама ў жывапісе і плакаце. Палотны знаходзяцца ў Нацыянальным мастацкім музеі Беларусі, фондах грамадскага аб’яднання «Беларускі саюз мастакоў».

Быў кніжным ілюстратарам, аздабляў такія кнігі, як «Прыгоды Электроніка і яго сяброў», «Кар’ер» Васіля Быкава, кнігі Анатоля Вярцінскага. У яго афармленні выдадзена больш за 400 кніг розных жанраў.

У 1979—1983 гадах працаваў на Мінскім мастацкім камбінаце^[2]. Выкладаў у Беларускай дзяржаўнай акадэміі мастацтваў (з 2000). Аўтар вучэбна-метадычнага дапаможніка «Роля сістэмнасці ў арганізацыі працоўнага месца ў навучальным працэсе на ФД і ДПМ». Удзельнік шматлікіх міжнародных і рэспубліканскіх выставак. Член грамадскага аб’яднання «Беларускі саюз мастакоў» з 1988 года. Выкладаў малюнак на факультэце дызайну і дэкаратыўна-ўжытковага мастацтва БДАМ.

Памёр ад Covid-19 27 кастрычніка 2021 года^[3].

• Афармленне кнігі: Паэзія заходніх беларускіх паэтаў «Ростані волі» 1990, В. Быкаў «У тумане» 1990, В. Адамчык «Голас крыві брата твайго» 1991, А. Вярцінскі «Хлопчык глядзіць» 1992, Г. Ферры «Лясны бадзяга» 1993, А. Аўруцін «Па другую старану дыхання» 1997, К. Камейша «Крыгагром» 2001, Беларускія народныя казкі «Ванячка і ведзьма» 2002, Т. Мушынская «Свята печанай бульбы» 2004, П. Прыходзька «Бярозавы Лісток» 2004.
• Станкавая графіка. Лінарыты: «Нядзелька» 1981, «Натурморт з люстэркам» 1981, «Джогер» 1984, «Вуліца Камсамольская» 1984. «Партрэт Ул. Дубавецкага» 1991, «Стары» 1993, «Надзея» 1994, «Князь Вячка» 1995,
• Гравюры на аргаліце: «Ростані волі», «Паўстанцы», «Пагоня», «Ф. Скарына», «Цяжкая доля» 1990.
• Акварэлі. «Нацюрморт з лялькай» 1978, «Аўтапартрэт» 1979, «Нацюрморт з макамі» 1986, «Партрэт Т. Мурзіной» 2002.
• Малюнкі: «Акраіна Мінска» 1999, «Тацьцяна» 1999, «Маці» 1987, «Натурморт з нажніцамі» 2002, «Усе сабраліся» 2006, «Цішыня» 2007,
• Серыя агітплакатаў: «Усе на ўдарную вахту», «Новых перамог у новым годзе»…… 1978—1986.

• Дыпломы за ўдзел у беларускіх рэспубліканскіх конкурсах
• Лаўрэат прэміі часопіса «Вяселка» 1994 года
• Грамата за добрасумленную працу ў Беларускай дзяржаўнай акадэміі мастацтваў 2009 г.

• Чэбан І. Л. Сы́тчанка Уладзімір Іванавіч // Беларуская энцыклапедыя: У 18 т. Т. 15: Следавікі — Трыо / Рэдкал.: Г. П. Пашкоў і інш. — Мн. : БелЭн, 2002. — Т. 15. — С. 324. — 10 000 экз. — ISBN 985-11-0035-8. — ISBN 985-11-0251-2 (т. 15).
• Беларускі саюз мастакоў, 1938—1998 = Belarussian union of artists, 1938—1998 : Энцыкл. давед. / Аўт.-склад.: Б. А. Крэпак і інш.. — Мн.: ВТАА «Кавалер Паблішэрс», 1998. — 663 с. — 3 000 экз. — ISBN 985-6427-09-6. — С. 520.

• Сытчанка У. І. на сайце Беларускі плакат Архівавана 27 кастрычніка 2021.
• Лидия Пересыпкина Сотри случайные черты… Архівавана 29 мая 2024. (руск.) // Газета «Звязда», 19.03.2018.