மியான்மர் உள்நாட்டுப் போர் (2021-தற்போது வரை)

மியான்மர் உள்நாட்டுப் போர் (Myanmar Civil War), மியான்மர் நாட்டை 2021 மியான்மர் இராணுவப் புரட்சி மூலம் ஆளும் சர்வாதிகார இராணுவ ஆட்சிக் குழுவிற்கு எதிராக மியான்மர் மக்களின் பல ஆயுதக் குழுக்கள் மே 2021 முதல் நடத்துகின்ற போர் ஆகும். 5 டிசம்பர் 2024 முடிய உள்நாட்டுப் போரில் 73,069+ பொதுமக்கள் கொல்லப்பட்டுள்ளனர்.^[1] 1 மே 2024 முடிய 4,961 பொதுமக்கள் மற்றும் 26,601 போராளிகள் கைது செய்யப்பட்டுள்ளனர்.^[2] 27,17,500 முதல் 3,0,00,000 வரை வெளிநாடுகளில் புலம் பெயர்ந்துள்ளனர். மேலும் 1,13,700 மக்கள் உள்நாட்டில் புலம்பெயர்ந்துள்ளனர்.

பின்னணி

2020 மியான்மர் நாடாளுமன்ற பொதுத் தேர்தலில் ஆங் சான் சூச்சி தலைமையிலான ஆளும் தேசிய ஜனநாயகக் கட்சி மிகப்பெரும்பான்மையான (83%) தொகுதிகளில் வெற்றி பெற்றது. இந்த தேர்தலில் முறைகேடுகள் செய்து ஆங் சான் சூச்சி தலைமையிலான ஆளும் தேசிய ஜனநாய முன்னணி கட்சி வெற்றி பெற்றது செல்லாது என மியான்மர் இராணுவம் குற்றம் சாட்டியதுடன், 1 பிப்ரவரி 2021 அன்று இராணுவப் புரட்சி மூலம்^[3]^[4]^[5]நாட்டில் நெருக்கடி நிலையை நடைமுறைப்படுத்தியும், நாடாளுமன்றத்தை முடக்கியும், ஆங் சான் சூச்சியை வீட்டுக் காவலில் வைத்தனர். இதனால் நாடு முழுவதும் மியான்மர் இராணுவ ஆட்சிக்கு எதிராக போராட்டங்களும், வன்முறைகளும் எழுச்சி பெற்றது.^[6]^[7]

இராணுவ ஆட்சிக்கு எதிரான போராட்டங்களால் மார்ச் 2023 முடிய எல்லைப்புற மாநிலங்களில் வாழும் 17.5 மில்லியன் மக்களுக்கு மனிதாபிமான உதவிகள் தேவை என்றும், 1.6 மில்லியன் பொதுமக்கள் புலம்பெயர்ந்துள்ளனர் என்றும்; 55,000 குடியிருப்புகள் குண்டு வீச்சுகளால் அழிந்துள்ளது என ஐ. நா. மதிப்பீடு செய்துள்ளது.^[8] மியான்மரிலிருந்து 40,000 பேர் அண்டை நாடுகளான வங்காளதேசம், இந்தியா, தாய்லாந்து போன்ற அண்டை நாடுகளில் மக்கள் அடைக்கலம் அடைந்துள்ளனர்.^[9]

அக்டோபர் 2023 முடிய மியான்மரின் 40% நிலம் அரசு தரைப்படை கட்டுப்பாட்டில் உள்ளது. மேலும் மூன்றில் இரண்டு பங்கு உள்ளாட்சிகள் (330 உள்ளாட்சிகள்) அரசின் கட்டுப்பாட்டில் உள்ளது. ^[10]^[11]