Агееўка

Вёска Агееўка Краіна Беларусь Вобласць Магілёўская Раён Магілёўскі Сельсавет Мастоцкі Каардынаты 53°57′33″ пн. ш. 30°29′03″ у. д.HGЯO Насельніцтва ▼44 чал. (2009) Часавы пояс UTC+3 Тэлефонны код +375 222 Паштовыя індэксы 213114 Аўтамабільны код 6 СААТА 7244828001 Агееўка на карце Беларусі ±

Аге́еўка^[1] (трансліт.: Ahiejeŭka, руск.: Агеевка) — вёска ў Магілёўскім раёне Магілёўскай вобласці. Уваходзіць у склад Мастоцкага сельсавета. Размешчана за 14 км на поўнач ад Магілёва, 20 км ад чыгуначнай станцыі Лупалава на лініі Магілёў — Крычаў. Рэльеф раўнінны, на ўсход мяжуе з лесам. Транспартныя сувязі па шашы Санкт-Пецярбург — Адэса, якая праходзіць каля вёскі.

Вядома ў Вялікім Княстве Літоўскім з пачатку 17 ст. У 1604 годзе сяло (48 двароў) у Брылёўскім войтаўстве Магілёўскага староства-эканоміі Аршанскага павета Віцебскага ваяводства, дзяржаўная ўласнасць, меўся млын. Згадваецца ў 1611 годзе як вёска Агееўшчына ў складзе Брылёўскага войтаўства Магілёўскай воласці ў Аршанскім павеце ВКЛ^[2]. У 1635 годзе сяло Агееўшчына налічвала 60 двароў, у 1742 годзе — 20 двароў, мелася карчма.

У выніку першага падзелу Рэчы Паспалітай у 1772 годзе апынулася ў складзе Расійскай імперыі. У 1777 годзе сяло ў Магілёўскім павеце.

У 1847 годзе ў складзе маёнтка Палыкавічы, уласнасць памешчыка. У 1909 годзе ў Палыкавіцкай воласці Магілёўскага павета.

25 сакавіка 1918 года згодна з Трэцяй Устаўной граматай вёска абвяшчалася часткай Беларускай Народнай Рэспублікі. 1 студзеня 1919 года згодна з пастановай I з’езда КП(б) Беларусі ўвайшла ў склад Беларускай ССР, аднак 16 студзеня адышла разам з іншымі этнічна беларускімі тэрыторыямі ў склад РСФСР. У сакавіку 1924 года вёску вярнулі БССР, з 20 жніўня 1924 года ў Мастоцкім сельсавеце Лупалаўскага раёна Магілёўскай акругі (да 26 ліпеня 1930), з 2 сакавіка 1931 года Магілёўскага раёна, з 20 лютага 1938 года ў Магілёўскай вобласці. У 1931 годзе арганізаваны калгас імя Молатава. Дзейнічала пачатковая школа.

У Вялікую Айчынную вайну з ліпеня 1941 года да 27 чэрвеня 1944 года акупіравана нямецка-фашысцкімі захопнікамі.

У 1990 годзе ў складзе калгаса імя Заслонава (цэнтр — в. Масток). Размяшчаліся вытворчая брыгада, фермы буйной рагатай жывёлы і свінагадоўчая, працаваў фельчарска-акушэрскі пункт. У 2007 годзе працаваў фельчарска-акушэрскі пункт.

Планіровачна складаецца з 2 прамалінейных вуліц, арыентаваных з паўднёвага захаду на паўночны ўсход і злучаных на поўдні кароткай просталінейнай вуліцай. Забудавана двухбакова, шчыльна традыцыйнымі драўлянымі дамамі сядзібнага тыпу.

• XIX стагоддзе:
  • 1834 — 121 жыхар.
  • 1847 — 26 двароў, 156 жыхароў.
  • 1897 — 50 двароў, 408 жыхароў.
• XX стагоддзе:
  • 1926 — 66 двароў, 407 жыхароў.
  • 1990 — 73 гаспадаркі, 138 жыхароў.
• XXI стагоддзе:
  • 2007 — 32 гаспадаркі, 58 жыхароў.

• Агееўка // Гарады і вёскі Беларусі: Энцыклапедыя. Т. 6, кн. 2. Магілёўская вобласць / рэдкал.: Т. У. Бялова (дырэктар) і інш. — Мн.: Беларуская Энцыклапедыя імя Петруся Броўкі, 2009. — 592 с.: іл. — 2 000 экз. — ISBN 978-985-11-0440-2.

• На Вікісховішчы пакуль няма медыяфайлаў па тэме, але Вы можаце загрузіць іх