Віктар Ігнатавіч Клімчук

Віктар Ігнатавіч Клімчук
Дата нараджэння	28 кастрычніка 1946(1946-10-28) (78 гадоў)
Месца нараджэння	Сіманавічы, Вулькаўскі сельсавет, Драгічынскі раён, Пінская вобласць, БССР, СССР
Адукацыя	Самарскі дзяржаўны інстытут культуры (1982)
Прафесія	лялечнік, тэатральны рэжысёр
Тэатр	Нацыянальны акадэмічны драматычны тэатр імя Якуба Коласа Беларускі тэатр «Лялька»
Узнагароды

Віктар Ігнатавіч Клімчук (нар. 28 кастрычніка 1946, Сіманавічы, Драгічынскі раён, Брэсцкая вобласць) — беларускі тэатральны рэжысёр. Заслужаны дзеяч мастацтваў Рэспублікі Беларусь (1999).

Пасля смерці бацькі сям’я перехала ў Расію. Вышэйшую рэжысёрскую адукацыю атрымаў у Куйбышаўскім дзяржаўным інстытуце культуры. З 1985 г. з’яўляўся рэжысёрам Віцебскай лялечнай трупы пры Беларускім тэатры імя Якуба Коласа. З 1990 года — мастацкі кіраўнік створанага на аснове лялечнай трупы Беларускага тэатра «Лялька».

У 1996 годзе стаў лаўрэатам прэміі «Сузор’е муз» і атрымаў званне «Чалавек года» ў намінацыі «Тэатральная творчасць» за вялікі ўклад у развіццё Беларускага лялечнага мастацтва. У рэпертуары В. І. Клімчука ёсць замежныя, айчынныя, сучасныя, класічныя, фальклорныя і аўтарскія творы. Спектаклі ў пастаноўцы В. І. Клімчука неаднаразова ўдзельнічалі ў фестывалях. Найбольш значныя сярод іх: «Дзед і Жораў» В. Вольскага (1987, г. Гродна), «Сказ пра Гаўрылу з-пад Полацка» П. Сіняўскага (1990), «Папялушка» Я. Шварца (1993), «Хлопчык-Зорка» О. Уайльда (1995). Спектаклі Віктара Ігнатавіча Клімчука вылучаюцца высокай эстэтыкай, мастацкім густам, разнапланавасцю. Спектакль «Чароўная зброя Кэндзо» адзначаны Гран-пры на міжнародным фестывалі «Белая Вежа» (1998, г. Брэст) і прызам за высокія творчыя дасягненні на міжнародным фестывалі ў Субоціцы (2000, Югаславія).

У красавіку 2024 года Віктар Ігнатавіч быў звольнены з тэатра «Лялька» нібыта за невыкананне планаў, за якія звычайна адказвае дырэктар, а не мастацкі кіраўнік.

• Віктар Ігнатавіч Клімчук // Культура беларусі: энцыклапедыя. Т. 4 / рэдкал.: У. Ю. Аляксандраў (гал. рэд.) [ і інш.]. — Мінск: Беларус. Энцыкл. імя П. Броўкі, 2013.— С. 495.
• Клімчук Віктар Ігнатавіч // Тэатральная Беларусь: у 2 т. Мн.: Беларуская энцыклапедыя, 2003 . — Т. 1 . — С. 526.