Дзмітрый Уладзіміравіч Балаба

Дзмітрый Уладзіміравіч Балаба
Дата нараджэння	1 чэрвеня 1972(1972-06-01) (52 гады)
Месца нараджэння	Гарадзілава, Гарадзілаўскі сельсавет, Маладзечанскі раён, Мінская вобласць, БССР, СССР
Месца працы	АМАП
Грамадзянства	Беларусь
Прыналежнасць	рэжым Лукашэнкі
Званне	Палкоўнік міліцыі
Бітвы/войны	Пратэсты ў Мінску 19—25 сакавіка 2006 года Плошча 2010 Рэвалюцыя праз сацыяльную сетку Пратэсты ў Беларусі, 2017 пратэсты ў Беларусі (2020—2021)
Узнагароды і званні

Дзмітрый Уладзіміравіч Балаба (нар. 1 чэрвеня 1972, Гарадзілава, Маладзечанскі раён, Мінская вобласць, БССР, СССР) — беларускі службовец-міліцыянер. Камандзір АМАП Галоўнага ўпраўлення ўнутраных спраў Мінгарвыканкама. Палкоўнік міліцыі.

Нарадзіўся 1 чэрвеня 1972 года ў вёсцы Гарадзілава Маладзечанскага раёна Мінскай вобласці. Навучаўся ў Гарадзілаўскай сярэдняй школе^[1].

Да паступлення на службу ў органы ўнутраных спраў скончыў ПТВ і адслужыў у войску, звольніўся ў запас гвардыі старшыной. У маладзечанскай патрульна-паставой службе міліцыі быў ротным і ўзводным; у яго ў падначаленні былі байцы вільнюскага АМАП, які быў расфармаваны з-за актыўнага ўдзелу ў жнівеньскім путчы 1991 года^[2].

З 1993 года ў АМАП^[3]. У 1995 годзе пераведзены на працу ў Мінск.

У 1999—2000 гадах быў камандзірам 4-га аператыўнага ўзвода АМАП ГУУС Мінгарвыканкама. З 2002 па 2016 гады быў камандзірам 2-й роты АМАП ГУУС Мінгарвыканкама^[4].

У маі 2016 года прызначаны камандзірам АМАП Галоўнага ўпраўлення ўнутраных спраў Мінгарвыканкама. Кіраваў разгонамі акцый апазіцыі.

Са студзеня 2025 года старшыня Беларускага фізкультурна-спартыўнага таварыства «Дынама».

• юбілейны медаль «80 год беларускай міліцыі» (1997),
• медаль «За бездакорную службу» ІІІ ступені,
• медаль «За бездакорную службу» ІІ ступені,
• медаль «За бездакорную службу» І ступені (2015)^[5],
• медаль «За адзнаку ў ахове грамадскага парадку» (2017)^[6].

2 кастрычніка 2020 года Балаба быў уключаны ў Чорны спіс Еўрасаюза. Савет Еўрапейскага саюза прызнаў Балабу адказным як камандуючага сіламі АМАП у Мінску за кампанію рэпрэсій і запалохвання, якую праводзілі сілы АМАП у Мінску пасля прэзідэнцкіх выбараў 2020 года, у прыватнасці адвольныя арышты і жорсткае абыходжанне з мірнымі дэманстрантамі, у тым ліку катаванні, а таксама запалохванне і гвалт у дачыненні да журналістаў^[7]. 20 лістапада да кастрычніцкага пакета санкцый ЕС далучыліся Албанія, Ісландыя, Ліхтэнштэйн, Нарвегія, Паўночная Македонія, Чарнагорыя і Украіна^[8]. Таксама восенню 2020 года Балабу ўключылі ў свае санкцыйныя спісы Канада^[9][10], Вялікабрытанія^[11], Швейцарыя^[12][13].

З 2 кастрычніка 2020 года Балаба таксама знаходзіцца ў санкцыйным спісе спецыяльна прызначаных грамадзян і заблакіраваных асоб ЗША за ўдзел у дзеяннях або палітыцы, якія падрываюць дэмакратычныя працэсы або інстытуты, як камандзір мінскага АМАП, арганізацыі, супрацоўнікі якой збівалі і затрымлівалі мірных дэманстрантаў, журналістаў і іншых асоб у сталіцы, а таксама нясуць адказнасць за бесчалавечнае абыходжанне з затрыманымі^[14][15][16].

• Жонка Таццяна Балаба, спецыяліст па працы з кліентамі ААТ «Беларусбанк».
• Сын Арцём Балаба, 31.03.1994 г.р., камандзір групы 2-га ўзвода АМАП ГУУС Мінгарвыканкама^[17].
• Сын Максім Балаба, вучыўся ў Мінскім гарадскім кадэцкім вучылішчы № 1 імя М. В. Фрунзэ.

У сакавіку 2021 года Арцём Балаба быў занесены ў санкцыйныя спісы балтыйскіх краін^[18]. У студзені 2025 года Канада ўвяла санкцыі супраць Арцёма і Максіма Балаб, а таксама супраць Вольгі Маршаловіч, жонкі Дзмітрыя Балабы^[19].