Касцёл Святога Іосіфа (Ляхавічы)

Каталіцкі храм
Касцёл Святога Іосіфа
53°02′59″ пн. ш. 26°16′05″ у. д.HGЯO
Краіна	Беларусь
Горад	Ляхавічы
Канфесія	Каталіцтва
Епархія	Пінская дыяцэзія
Дэканат	Ляхавіцкі
Архітэктурны стыль	неаготыка
Заснавальнік	Ю. Рэйтан
Дата пабудовы	1907 год
Стан	дзейнічае
Глобус Беларусі	globustut.by/lyahovichi/…
Медыяфайлы на Вікісховішчы

Касцёл Святога Іосіфа — дзеючы рымска-каталіцкі храм у горадзе Ляхавічы Брэсцкай вобласці.

Пабудаваны ў 1907 годзе з цэглы па фундацыі Ю. Рэйтана і намаганнямі ксяндза К. Ваньковіча. Асвячоны ў 1910 г. біскупам Янам Цепляком.

У пасляваенны час аб духоўным развіцці вернікаў клапаціўся ксёндз інфулат Вацлаў Пянткоўскі, які прыязджаў у Ляхавічы з суседняй парафіі ў Мядзведзічах. Падчас патаемнай падрыхтоўкі да святарства з 1974 па 1978 год тут працаваў качагарам ксёндз Рышард Юнік, шматгадовы пастыр парафіі ў Рубяжэвічах.

У другой палове стагоддзя будынак касцёла быў прыстасаваны і рэканструяваны пад паліклініку.

4 верасня 2019 года біскуп Пінскі Антоній Дзям’янка нанава здзейсніў асвячэнне касцёла, благаславіў абраз Святой Сям’і і крыж на фасадзе^[1].

Помнік архітэктуры неаготыкі. Манументальнае збудаванне вырашана па тыпу трохнефавай аднавежавай базілікі з паўкруглай апсідай. Гатычную вертыкальную накіраванасць архітэктурнай кампазіцыі надавалі высокая шатровая званіца (васьмярык на чацверыку) на фасадзе і перспектыўны ўваходны стральчаты партал з акном-ружай над ім. Вертыкальны рытм стваралі ступеньчатыя контрфорсы з вежачкамі-фіяламі і «крабамі» ў завяршэнні ступеньчатых контрфорсаў, высокія вузкія стральчатыя нішы і аконныя праёмы, аркатурныя паясы. Бакавыя працяглыя фасады рытмічна чляніліся высокімі стральчатымі аконнымі праёмамі і ступеньчатымі контрфорсамі ў прасценках.

Унутраная прастора храма размяжоўвалася на тры нефы гранёнымі слупамі, перакрывалася стральчатымі скляпеннямі. У інтэр’еры меўся неагатычны амбон^[2].

• Бенядзікт Навіцкі;
• 1910—32? — Леанард Кавецкі;
• 1933—35? — Мікалай Ікановіч;
• 1936—39 — Тадэвуш Драздоўскі;
• 1937—38 — Казімір Туміловіч;
• з 1939 — Станіслаў Рокаш;
• з 1956 — Вацлаў Янавіч Пянткоўскі.

Да 1940 года арганістам у касцёле быў Вітольд Віктаравіч Валынец.

• Каталіцкія храмы Беларусі: Энцыкл. даведнік / А. М. Кулагін; фатограф А. Л. Дыбоўскі. — 2-е выд. — Мн.: БелЭн, 2008. — 488 с. — ISBN 978-985-11-0395-5.

• На Вікісховішчы ёсць медыяфайлы па тэме Касцёл Святога Іосіфа (Ляхавічы)
• Касцёл Святога Іосіфа (Ляхавічы) на сайце Radzima.org
• Касцёл Святога Іосіфа (Ляхавічы) на сайце Глобус Беларусі (руск.)