Уладзімір Лянкевіч

Уладзімір Лянкевіч
Уладзімір Лянкевіч
	; Уладзь Лянкевіч на ўручэнні Прэміі Цёткі 6 красавіка 2019 года
Асабістыя звесткі
Дата нараджэння	29 мая 1987 (37 гадоў)
Месца нараджэння	Мінск, БССР, СССР;
Грамадзянства	Беларусь;
Альма-матар	філалагічны факультэт БДУ; Беларускі Калегіюм;
Прафесійная дзейнасць
Род дзейнасці	музыкант, паэт, перакладчык
Мова твораў	беларуская
Прэміі	Дэбют

Уладзь Лянкевіч, поўнае імя Уладзімір Лянкевіч (нар. 29 мая 1987, Мінск) — беларускі паэт і перакладчык, вакаліст, аўтар тэкстаў і музыка гуртоў «TonqiXod»^[1], «luty sakavik» і «Syndrom Samazvanca»^[2].

Біяграфія

Скончыў філалагічны факультэт Беларускага дзяржаўнага ўніверсітэта па спецыяльнасці «Беларуская філалогія» (2009), магістратуру (2010) і аспірантуру пры ім (2013). У 2005—2008 гадах быў навучэнцам Беларускага калегіюма па спецыяльнасці «Філасофія. Літаратура».

Член рэдакцыі інтэрнэт-часопіса перакладной літаратуры «ПрайдзіСвет». З 2014 года — куратар «Беларускага літаратурнага радыё» (Litradio)^[3]. Былы сябра і намеснік старшыні (2017—2019) Беларускага ПЭН-цэнтра^[4]. У 2020 годзе падчас пратэстных акцый двойчы затрыманы^[5]: першы раз быў у зняволенні 6 дзён, другі — 15 дзён^[6].

У шлюбе з перакладчыцай і рэдактаркай Аленай Пятровіч^[7].

Літаратурная творчасць

Аўтар паэтычнага зборніка «70% вады»^[8], за які ўзнагароджаны прэміяй «Дэбют» імя Максіма Багдановіча ў намінацыі «Паэзія» (2014)^[9]. Публікуецца ў калектыўных зборніках і часопісах, у тым ліку ў «Дзеяслове». Вершы Уладзіміра Лянкевіча перакладзены на ўкраінскую^[10], англійскую^[11],^[12], шведскую^[13], італьянскую^[14] і рускую^[15] мовы.

Перакладае паэзію і прозу з французскай, англійскай, польскай, украінскай і рускай моў. Сярод перакладаў з англійскай мовы на беларускую — казачная аповесць «Пітэр Пэн» Джэймса Мэцью Бары і паэзія Уільяма Блэйка, з польскай (разам з Аленай Пятровіч) — раман «Зімоўка» Дамінікі Словік^[16], з рускай — паэзія Уладзіміра Маякоўскага^[17]. На беларускую і рускую мовы таксама рабіў пераклады песняў вядомых выканаўцаў для музычнага праекта «Будзьма! Тузін. Перазагрузка-2».

Прызнанне

Фіналіст конкурсаў Беларускага ПЭН-Цэнтра імя Франчэска Петраркі (2004), Карласа Шэрмана (2009), Чэслава Мілаша (2011).
Лаўрэат прэміі «Дэбют» імя Максіма Багдановіча ў намінацыі «Паэзія» (2014).

Бібліяграфія

Паэзія

Лянкевіч, У. 70 % вады: [вершы] / Уладзь Лянкевіч. Мінск: Кнігазбор, 2013. 52 с. ISBN 978-985-7089-19-2

Пераклады

Бары, Дж. М. Пітэр Пэн: [казачная аповесць] / Джэймс Мэцью Бары; перакл. з англ. У. Лянкевіч; ілюстрацыі К. Дубовік. Мінск: Кнігазбор, 2017. 188 с. ISBN 978-985-7180-55-4
Блэйк, У. Выбранае: пераклад з англійскай / Уільям Блэйк. Мінск: Зміцер Колас, 2019. 85 с. (Серыя «Паэты планеты»). ISBN 978-985-230046-9
Маякоўскі, У. Паэзія / Уладзімір Маякоўскі; перакл. з руск. Р. Лынькоў, Т. Кляшторны, М. Багун, Р. Барадулін, А. Хадановіч, У. Лянкевіч, В. Рыжкоў). Мінск: Зміцер Колас, 2019. 104 с. (Серыя «Паэты планеты»). ISBN 978-985-23-0055-1
Словік, Д. Зімоўка: [раман] / Дамініка Словік; пераклад з польскай Уладзіміра Лянкевіча, Алены Пятровіч. Мінск: А. М. Янушкевіч, 2021. 572 с. ISBN 978-985-7283-02-6

Укладанне і рэдагаванне

Ханін, C. Уключаючы рэшту: [зборнік вершаў] / Сямён Ханін; рэд. У. Лянкевіч, А. Хадановіч. Вільнюс: Логвінаў, 2020. 101 с. ISBN 978-609-8213-92-8
Казкі Рузалі Асьмак: запісаныя Адамам Багдановічам / [укладальнік А. Ф. Брыль; рэд. У. Лянкевіч]. Мінск: А. М. Янушкевіч, 2021. 70, [1] с. ISBN 978-985-7210-58-9

Музычная творчасць

Адзін з заснавальнікаў, вакаліст і музыка (гітара, бас, клавішы) гуртоў «TonqiXod», «luty sakavik» і «Syndrom Samazvanca». Уладзь Лянкевіч — аўтар усіх тэкстаў гэтых гуртоў, акрамя альбома «Radyjo Niamiha» (2023), у якім музыкі «Syndrom Samazvanca» пераспявалі класіку беларускага року 90-х гадоў^[18]. Гродзенскі гурт «Tłusta Łusta» запісаў песню «Modnaja Žančyna» на верш Лянкевіча^[19].