တပ်မတော်စိန်ရတုနှစ်တံဆိပ်

တပ်မတော်စိန်ရတုနှစ်တံဆိပ်
စိန်ရတုနှစ်တံဆိပ်ပုံ[၁]
နိုင်ငံတော်သမ္မတ မှ ချီးမြှင့်ခြင်း
အမျိုးအစား	စစ်ဘက်ဆိုင်ရာ ဂုဏ်ပြုတံဆိပ်
တည်ထောင်ခဲ့	၅ မတ် ၂၀၂၀ (၅ နှစ် အကြာက) (၂၀၂၀-၀၃-05)
နိုင်ငံ	မြန်မာ
အရည်အချင်းပြည့်မီ	စာတွင်ရှု့
အချက်အလက်များ
ရရှိသူ စုစုပေါင်း	၄၃၄၁၆[၂]
တာဝန်ချိန်တပ်ဆင်ရသော ဖဲကြိုးဘားတန်းပုံ[၁]

စိန်ရတုနှစ်တံဆိပ် သည် ၂၀၂၀ ပြည့်နှစ်၊ မတ်လ ၂၇ ရက်နေ့တွင်ကျရောက်သော (၇၅)နှစ်မြောက် စိန်ရတုတပ်မတော်နေ့ကို ဂုဏ်ပြုသောအားဖြင့် တပ်မတော်တွင် စစ်မှုထမ်းသက်(၂၅)နှစ်နှင့်အထက် ထမ်းဆောင်ခဲ့သော စစ်မှုထမ်းများအား ချီးမြှင့်သည့် တံဆိပ် ဖြစ်သည်။ “နိုင်ငံတော်သမ္မတရုံး၏ ၂၀၂၀ ပြည့်နှစ် မတ်လ ၅ ရက်နေ့စွဲပါ အမိန့်ကြော်ငြာစာအမှတ်၊ ၄၂/၂၀၂၀” ဖြင့် ထုတ်ပြန်ခဲ့သည့် “တပ်မတော်စိန်ရတုနှစ်တံဆိပ် ချီးမြှင့်အပ်နှင်းခြင်းဆိုင်ရာ ပြဋ္ဌာန်းချက်”ပါ အရည်အချင်းသတ်မှတ်ချက်များနှင့်ကိုက်ညီသူ အရာရှိ (၁၂၄၉)ဦး၊ စစ်သည် (၄၂၁၆၇)ဦး၊ စုစုပေါင်း (၄၃၄၁၆) ဦးအား တပ်မတော်စိန်ရတုနှစ်တံဆိပ်ကို ချီးမြှင့်ခဲ့သည်။^[၁][၂]

အောက်ပါအရည်အချင်းများနှင့် ပြည့်စုံသူ တပ်မတော် (ကြည်း၊ ရေ၊ လေ) စစ်မှုထမ်းများကို ချီးမြှင့်ခြင်းဖြစ်သည်^[၁] -

1. ၂၀၂၀ ပြည့်နှစ်၊ မတ်လ ၂၇ ရက်နေ့တွင် ပြစ်မှုကင်းရှင်းစွာဖြင့် တာဝန်ထမ်းဆောင်လျက်ရှိသော စစ်မှုထမ်းဆဲများဖြစ်ခြင်း။
2. ၂၀၂၀ ပြည့်နှစ်၊ မတ်လ ၂၇ ရက်နေ့တွင် စစ်မှုထမ်းသက် (၂၅) နှစ်အပြည့်ရှိခြင်း။
3. တာဝန်ထမ်းဆောင်ခဲ့သည့်ကာလအတွင်း နိုင်ငံတော်၏ ကျေးဇူးသစ္စာကို စောင့်သိ၍ တာဝန်ကို ကျေပွန်စွာထမ်းဆောင်ခဲ့သူဖြစ်ခြင်း။
4. အမှုထမ်းခဲ့သည့် ကာလအတွင်း ပြစ်မှုကင်းရှင်းသူများဖြစ်ခြင်း။

တံဆိပ်ပါ အမှတ်အသား တစ်ခုချင်းစီအတွက် အဓိပ္ပါယ်ဖော်ဆောင်ချက်များမှာ^[၁] -

1. အနား ၅ ဘက်ညီ ပဉ္စဂံပုံသည် တပ်မတော်၏ အခြေခံအရည်အချင်း ၅ ပါးကို ရည်ညွှန်းခြင်းဖြစ်သည်။
2. သပြေခက်သည် အောင်မြင်ခြင်းအထိမ်းအမှတ်ကို ဖော်ညွှန်းခြင်းဖြစ်သည်။
3. ကြယ်ငယ် ၇၅ လုံးသည် (၇၅) နှစ်မြောက် တပ်မတော်နေ့၊ စိန်ရတုနှစ်ကို ဖော်ညွှန်းခြင်းဖြစ်သည်။

တပ်မတော်စိန်ရတုနှစ်တံဆိပ် ချီးမြှင့်အပ်နှင်းခြင်းခံရသည့် စစ်မှုထမ်းများသည် တစ်လုံးတစ်ခဲတည်း ချီးမြှင့်ငွေ ကျပ် ၂၅၀၀၀၀/- (ကျပ်နှစ်သိန်းငါးသောင်းတိတိ) ကိုပါ ရရှိသည်။^[၁]