குட்டிப்புரம்

குட்டிப்புரம்
ஊர்
குட்டிப்புரத்தில் உள்ள எம். இ. எஸ். பொறியியல் கல்லூரி
குட்டிப்புரம் கேரளத்தில் அமைவிடம் Show map of கேரளம் குட்டிப்புரம் குட்டிப்புரம் (இந்தியா) Show map of இந்தியா
ஆள்கூறுகள்: 10°50′38″N 76°01′58″E / 10.84389°N 76.03278°E / 10.84389; 76.03278
நாடு	இந்தியா
மாநிலம்	கேரளம்
மாவட்டம்	மலப்புறம்
மொழிகள்
• அதிகாரப்பூர்வமாக	மலையாளம், ஆங்கிலம்
நேர வலயம்	ஒசநே+5:30 (இ.சீ.நே)

குட்டிப்புரம் (Kuttippuram) என்பது இந்தியாவின் கேரள மாநிலத்தின் மலப்புரம் மாவட்டத்தில் உள்ள திரூர் வட்டத்தில் அமைந்துள்ள ஒரு நகரம் மற்றும் வட்டார வளர்ச்சி அலுவலகத் தலைமையகம் ஆகும். இந்த நகரம் மலப்புரத்திலிருந்து தெற்கே 32 கிலோமீட்டர் தொலைவில் அமைந்துள்ளது. குட்டிப்புரம் வழியாக பாரதப்புழா ஆறு ஓடுகிறது.

பாரதப்புழா ஆற்றின் வடகரையில் உள்ள குட்டிப்புரம், இடைக்காலத்தில் கோழிக்கோடு சாமுத்திரி மன்னரின் ஆட்சியின் கீழ் இருந்தது. ^[1] குட்டிப்புரம் தொடருந்து நிலையம் கேரளத்தின் பழமையான தொடருந்து நிலையங்களில் ஒன்றாகும். கேரளத்தில் இரண்டாவது தொடருந்து பாதை 1861 ஆம் ஆண்டில் திரூரில் இருந்து குட்டிப்புரம் வரை அமைக்கப்பட்டது, அதே ஆண்டில் திரூரிலிருந்து பேப்பூர் வரை தொடருந்து பாதை நீட்டிக்கப்பட்டது. ^[2] 1940களில் சி. இராஜகோபாலாச்சாரி, எம். பக்தவத்சலம், யாக்கோப் ஹாசன் உள்ளிட்ட பல தேசியத் தலைவர்கள் குட்டிப்புரத்திற்கு வந்துள்ளனர். ^[1] இந்தியாவின் முன்னாள் ஜனாதிபதி பக்ருதின் அலி அகமதுவும் இங்கு வந்துள்ளார். ^[1] மகாத்மா காந்தி, ஜவகர்லால் நேரு, லால் பகதூர் சாஸ்திரி ஆகியோரின் அஸ்தி கேரளத்தில் திருநாவாய், குட்டிப்புரம், தவனூர் இடையே பாரதப்புழா ஆற்றங்கரையில் வைக்கப்பட்டது. ^{[3] [4]}

1953 ஆம் ஆண்டு கட்டப்பட்ட குட்டிப்புரம் பாலம், கேரளத்தின் புகழ்பெற்ற பாலங்களில் ஒன்றாகும். குட்டிப்புரத்தின் மணற்பாங்கான ஆற்றங்கரையில் பாரதப்புழா ஆற்றின் அழகை விவரிக்கும் குட்டிப்புரம் பாலம் என்ற கவிதை கவிஞர் இடச்சேரி கோவிந்தன் நாயரால் எழுதப்பட்டது. குட்டிப்புரம் 1957 முதல் 2011 வரை கேரள சட்டமன்றத்தின் ஒரு தொகுதியாகவும் இருந்தது, பின்னர் அது கோட்டக்கல் சட்டமன்றத் தொகுதியாக மாற்றப்பட்டது.

இடைக்கால மாமாங்கத் திருவிழாவின் மையமான திருநாவாயும், ஆழ்வாஞ்சேரி தம்பிரக்கலின் மையமாக இருந்த ஆதவநாடும் குட்டிப்புரத்தை ஒட்டி அமைந்துள்ளன. ^[3]

குட்டிப்புரத்தின் அமைவிடம் 10°50′N 76°04′E / 10.83°N 76.07°E / 10.83; 76.07.^[5] ஆகும். இது கடல் மட்டத்தில் இருந்து சுமார் சராசரியாக 15 மீ (49 அடி) உயரத்தில் உள்ளது.

மாநிலத்தின் சில முக்கிய பொதுத்துறை நிறுவனங்கள் குட்டிப்புரத்தில் உள்ளன. ^[6] வாலாஞ்சேரி நகரம் குட்டிப்புரம் ஊராட்சியை ஒட்டி அமைந்துள்ளது. குட்டிப்புரம் ஊராட்சியை நகராட்சியாக தரம் உயர்த்த கோரிக்கை எழுந்துள்ளது.

• கேரள மாநில சவர்க்காரம் மற்றும் வேதிதிப்பொருள்கள் லிமிடெட் அதன் தலைமையகம் குட்டிப்புரத்தில் உள்ளது. ^[7]
• கே.இஎல்.டி.ஆர்.ஓ.என் (கேரள அரசு மின்னணுவியல் மேம்பாட்டுக் கழகம்) எலக்ட்ரோ செராமிக்ஸ் (KELCERA) இங்கு அமைந்துள்ளது. ^[8]

• எம். இ. எஸ். பொறியியல் கல்லூரி, 1994 இல் திறக்கப்பட்டது, இது கேரளத்தின் முதல் மற்றும் பழமையான சுயநிதி பொறியியல் கல்லூரி ஆகும். ^[9]
• கே.எம்.சி.டி கல்லூரி குட்டிப்புரம் ^[9]

• அரசு மேல்நிலைப் பள்ளி, குட்டிப்புரம் ^[9]
• இளையோர் தொழில்நுட்ப உயர்நிலைப்பள்ளி, குட்டிப்புரம் ^[9]

• தொடருந்து நிலையம்: குட்டிப்புரத்தில் இரண்டு தொடருந்து நிலையங்கள் உள்ளன, குட்டிப்புரம் தொடருந்து நிலையம் 1861 இல் திறக்கப்பட்டது, ^[2] இது மாநிலத்தின் பழமையான நிலையங்களில் ஒன்றாகும். மேலும் ஒரு சிறிய தொடருந்து நிலையமான - பெரசன்னூர் தொடருந்து நிலையமும் உள்ளது. திரூரில் முக்கிய தொடருந்து நிலையம் உள்ளது. அது இங்கிருந்து 18 கிலோமீட்டர்கள் (11 mi) தொலைவில் உள்ளது. இங்கு கிட்டத்தட்ட அனைத்து தொடருந்துகளும் நிற்கும்.

• சாலை: குட்டிப்புரம் மற்ற நகரங்களுடன் சாலை வழியாக நன்றாக இணைக்கப்பட்டுள்ளது, தேசிய நெடுஞ்சாலை-66 இந்த ஊர் வழியாக செல்கிறது. தே.நெ-66 குட்டிப்புரத்தை கோழிக்கோடு மற்றும் கொச்சி நகரங்களுடன் இணைக்கிறது. மா.நெ69 (திருச்சூர்-குட்டிப்புரம் மாநில நெடுஞ்சாலை) குட்டிப்புரத்தை திருச்சூர் நகரத்துடன் இணைக்கிறது. குட்டிப்புரம் பாலம் கேரளத்தின் புகழ்பெற்ற பாலங்களில் ஒன்றாகும், இது 1953 இல் கட்டப்பட்டது, இது தேசிய நெடுஞ்சாலை-66 வழியாக கோழிக்கோடு கொச்சியை இணைக்கிறது. ^[10] மலப்புரம், கோழிக்கோடு, கொச்சி, திருச்சூர் மற்றும் கோயம்புத்தூர் உள்ளிட்ட பிற நகரங்களுக்கு வழக்கமான பேருந்துகள் இயக்கப்படுகின்றன. பெங்களூர், திருவனந்தபுரம், கோயம்புத்தூர் ஆகிய இடங்களுக்கு இரவு நேர பயணத்திற்கு சில தனியார் பேருந்துகள் உள்ளன.
• அருகிலுள்ள வானூர்தி நிலையம்: கரிப்பூர் பன்னாட்டு வானூர்தி நிலையம் தோராயமாக 50 கிலோமீட்டர்கள் (31 mi) தொலைவில் உள்ளது.

நிலையோரம் பூங்காவில் இருந்து காணும்போது குட்டிப்புரம் பாலம்

குட்டிப்புரம் ஊராட்சி ஒன்றியம் என்பது பின் வரும் கிராம ஊராட்சிகளின் நிர்வாகத்திற்கான நிர்வாக அமைப்பாகும்.

1. எடையூர்
2. இரிம்பிளியம்
3. மரக்கரை
4. ஆதவநாடு
5. கல்பக்கஞ்சேரி

• இடச்சேரி கோவிந்தன் நாயர் - கவிஞர்
• இக்பால் குட்டிப்புரம் - திரைக்கதை எழுத்தாளர்
• குட்டிப்புரம் கேசவன் நாயர் - கவிஞர்
• எம். டி. வாசுதேவன் நாயர் - மலையாள எழுத்தாளர் (குட்டிப்புரத்திற்கு எதிரே, பாரதப்புழா ஆற்றின் எதிர் கரையில் உள்ள கூடல்லூரில் பிறந்தார்)

• குட்டிப்புரம் பாலம்
• குட்டிப்புரம் தொடருந்து நிலையம்
• குட்டிப்புரம் ஊராட்சி ஒன்றியம்
• வளஞ்சேரி
• திருநாவாய்
• ஆதவநாடு
• தவனூர்
• கூடலூர்
• மரக்கரா
• திரிபிரங்கோடு
• எடையூர்
• இரிம்பிளியம்
• கும்பிடி
• அனக்கார
• வைரம்கோடு