Сулавеси

Сулавеси (индонезиски: Sulawesi), порано Целебес (португалски: Celebes) — остров во Индонезија, еден од четирите Големи Сундски Острови и 11-ти по големина во светот. Сместен е помеѓу Борнео и Молучките Острови. Во Индонезија поголеми острови се само Суматра, Борнео и Папуа, а понаселени е само Јава и Суматра. Населението брои 17.359.416 жители (2010). Најголем град е Макасар.

На островот има четири краци (полуострови): Минахаса (север), Источен, Јужен и Југоисточен. Тие се одделени со три заливи: Томини (помеѓу Минахаса и Источниот Полуостров), Толо (помеѓу Источниот и Југоисточниот Полуостров) и Бони помеѓу Јужниот и Југоисточниот Полуостров. По западната страна се протега Макасарскиот Проток, кој го дели островот од Борнео.

Името „Сулавеси“ доаѓа од зборовите sula („остров“) и besi („железо“), што веројатно се однесува на богатите наоѓалишта на железо крај езерото Матано, чија руда се извезувала во минатото.^[1]

Сулавеси е 11. остров по големина во светот, со површина од 174.600 км². Соседни подрачја се островот Борнео на запад и Филипините на север, Малуку на исток и Флорес и Тимор на југ. Има карактеристичен облик со четири големи краци: Минахаса, Источен Полуостров, Југоисточен Полуостров. Средишниот дел на островот има стрмни планини што во минатото ги изолирале полуостровите еден од друг. Помеѓу краците има три заливи: Томини, Толо и Бони.

Селајарските Острови сочинуваат своевиден полуостров што се протега на југ од Југозападен Сулавеси во Флореското Море. Групите Сангихе и Талауд се протегаат на север од североисточниот крај, додека пак островот Бутон се издава на североисток. Тогијанските Острови се наоѓаат во заливот Томини, а островот Пеленг и групата Бангај образуваат погуста островска целина помеѓу Сулавеси и Малуку. Сите овие острови административно му припаѓаат на Сулавеси.

Островот е административно поделен на шест покраини: Горонтало, Западен Сулавеси, Јужен Сулавеси, Централен Сулавеси, Југоисточен Сулавеси и Северен Сулавеси. Најнова покрана е Западен Сулавеси (2004), создадена со одвојување на дел од Јужен Сулавеси. Најголеми градови на островот се Макасар, Мандо, Палу, Кендари и Горонтало.

Автохтони народи на Сулавеси се Макасарците, Бугиси, Мандари, Минахаси, Горонталци, Тораџи, Бутонци, Баџо и Монгондо.

На островот има осум национални паркa, повеќе природни резервати и 4 заштитени морски подрачја. Многу од парковите се во опасност поради бесправна сеча, рударство и обесшумување за обработливо земјиште.^[2]

Најголема копнена површина имаат националните паркови Богани Нани Вартабоне (2.871 км²) и Лоре Линду (2.290 км²). Националниот парк Бунакен има богат корален екосистем и е предложен за светско наследство на УНЕСКО.

• Список на острови во Индонезија
• Целебеско Море

„Сулавеси“ на Ризницата ?

п р у Покраини во Индонезија Суматра Ачех Бангка Белитунг Бенгкулу Западна Суматра Јужна Суматра Лампунг Острови Ријау Ријау Северна Суматра Џамби Јава Бантен Западна Јава Источна Јава Јогјакарта Централна Јава Џакарта Калимантан Западен Калимантан Источен Калимантан Јужен Калимантан Нусантара Северен Калимантан Централен Калимантан Мали Сундски Острови Бали Западни Мали Сундски Острови Источни Мали Сундски Острови Сулавеси Горонтало Западен Сулавеси Југоисточен Сулавеси Јужен Сулавеси Северен Сулавеси Централен Сулавеси Молучки Острови Малуку Северно Малуку Западна Нова Гвинеја Западна Папуа Југозападна Папуа Јужна Папуа Папуа Планинска Папуа Централна Папуа