Глеб Юр’евіч (князь дубровіцкі)

Глеб Юр’евіч (1150-я — 1195) — князь дубровіцкі (зг. 1183), тураўскі (1190—1195).

Сын тураўскага князя Юрыя Яраславіча і гарадзенскай княжны Ганны Усеваладкаўны.

Паводле Іпацьеўскага летапісу, у 1183 годзе як князь дубровіцкі ўдзельнічаў у паходзе за Дняпро супраць полаўцаў^[1]. Аб’яднаныя дружыны разбілі войскі хана Канчака  (руск.) (бел. і ўзялі вялікі палон.

Напэўна, стаў тураўскім князем пасля смерці брата Святаполка ў 1190 годзе^[2]. Іпацьеўскі летапіс пад 1195 года паведамляе пра смерць Глеба, называе яго князем тураўскім і адзначае, што князь быў пахаваны ў Міхайлаўскай Златаверхай царкве ў Кіеве^[1].

Васіль Тацішчаў у апісанні паходу князёў супраць полаўцаў назваў Глеба князем дабранскім, а на палях зрабіў заўвагу «Дабранскае княжанне», хоць дзясяткам радкоў вышэй называў Глеба князем дубровіцкім, следам за Іпацьеўскім летапісам. На думку Алега Рапава, Тацішчаў проста памыліўся.^[1]

Да звестак Іпацьеўскага летапісу пра смерць Глеба Тацішчаў дадаў дзве акалічнасці невядомыя з іншых крыніцы. Першая — дакладная дата смерці Глеба, 7 сакавіка, што агулам адпавядае храналогіі Іпацьеўскага летапісу^[1]. Другая — пасля «Глеб Юр’евіч» Тацішчаў дадаў «праўнук Яраполкаў»^[1]. З другой акалічнасцю, на думку Рапава, нельга пагадзіцца, бо праўнука Яраполкава мусілі б пахаваць у Пятроўскай царкве, дзе пахаваны сам Яраполк. Міхайлаўская ж царква была родавай магільняй Святаполчычаў, з якіх і паходзіў Глеб як то вынікае з іншых крыніцы^[2]. Такім чынам, праз блытаніну дапушчаную Тацішчавым у дэталях, немагчыма лічыць пэўнай і пададзеную ім дату смерці Глеба.

• Іоў А. Глеб Юр'евіч // Энцыклапедыя гісторыі Беларусі. У 6 т. Т. 3: Гімназіі — Кадэнцыя / Рэдкал.: Г. П. Пашкоў (гал. рэд.) і інш.; Маст. Э. Э. Жакевіч. — Мн. : БелЭн, 1996. — С. 43. — 10 000 экз. — ISBN 985-11-0041-2.
• Рапов О. М. Княжеские владения на Руси в X — первой половине XIII в. — М.: Изд-во МГУ, 1977. — 268 с.