Касцёл Святой Тэрэзы і кляштар піяраў (Шчучын)

Касцёл Святой Тэрэзы
	Каталіцкі храм
Касцёл Святой Тэрэзы
	53°36′22″ пн. ш. 24°44′26,50″ у. д.HGЯO
Краіна	Беларусь
Горад	Шчучын;
Канфесія	каталіцтва
Епархія	Гродзенская дыяцэзія
Архітэктурны стыль	класіцызм
Будаўніцтва	1826 — 1829
Статус	Гісторыка-культурная каштоўнасць Беларусі, шыфр 412Г000714шыфр 412Г000714
Стан	дзейнічае
Глобус Беларусі	globustut.by/schuchin/in…
	Медыяфайлы на Вікісховішчы

Касцёл святой Тэрэзы Авільскай — каталіцкая святыня ў горадзе Шчучыне, Гродзенская вобласць, Беларусь. Належыць да Шчучынскага дэканату Гродзенскай дыяцэзіі. Помнік архітэктуры ў стылі класіцызму^[2].

Гісторыя

Каталіцкая парафія была створана ў Шчучыне ў 1436 годзе^[3]. Калегіум піяраў тут існаваў з 1718 да 1832 года. У 1718 годзе ў Шчучыне быў заснаваны кляштар ордэна піяраў.

Сучасны будынак касцёла Святой Тэрэзы быў пабудаваны пры гэтым кляштары ў 1826—1829 з цэглы па фундацыі князя Францыска-Ксаверыя Друцкага-Любецкага пры кляштары^[4]. Пасля польскага паўстання 1830 года большасць каталіцкіх кляштараў на тэрыторыі сучаснай Беларусі была зачынена, у тым ліку і кляштар у Шчучыне. Касцёл св. Тэрэзы стаў выконваць ролю парафіяльнага каталіцкага храма. У 1887 і 1892 будынак касцёла рамантаваўся.

У 1927 піяры аднавілі сваю дзейнасць (працягвалася да 2-й сусветнай вайны). У 1954 касцёл закрыты. У 1988 вернуты Каталіцкаму Касцёлу, ў 1989 годзе адрэстаўраваны^[3]. Як і раней, пры храме ў цяперашні час служаць законнікі Айцы Піяры.

У касцёле знаходзіцца статуя Маці Божай Фацімскай. Па ініцыятыве пробашча парафіі ксяндза Казіміра Войцяка і арцыбіскупа Тадэвуша Кандрусевіча статую каранаваў і асвяціў Папа Ян Павел ІІ падчас Сусветных дзён моладзі ў 1991 г. ^[5].

Архітэктура

Помнік архітэктуры класіцызму. Мае выцягнутую па падоўжнай восі крыжова-купальную аб’ёмна-прасторавую кампазіцыю. Дамінуе ў ей высокі купал на васьмерыковым барабане над сяродкрыжжам^[4]. У дэкоры фасадаў выкарыстаны дарычны ордар. Галоўны фасад вырашаны 4-калонным дарычным порцікам. Вось сіметрыі галоўнага фасада падкрэсленая ўваходным праёмам з сандрыкам, акном у фігурнай ліштве і люкарнай на франтоне. Бакавыя фасады члянёны высокімі паўцыркульнымі аконнымі праёмамі, аформленымі рустоўкай і завершанымі антаблементам.