அசோக் குமார் சென்

அசோக் குமார் சென்
ஐக்கிய நாடுகள் மாநாட்டில் அசோக்குமார் சென்
இந்திய நாடளுமன்ற உறுப்பினர் (மாநிலங்களவை) மேற்கு வங்காளம்
பதவியில் 3 ஏப்ரல் 1990 – 2 ஏப்ரல் 1996
சட்ட அமைச்சர்
பதவியில் 1957 - 1966
பிரதமர்	ஜவகர்லால் நேரு
முன்னையவர்	சாரு சந்திர பிஸ்வாஸ்
பின்னவர்	கோபால் சுவரூப் பதக்
பதவியில் 1984 - 1987
பிரதமர்	ராஜீவ் காந்தி
முன்னையவர்	ஜகந்நாத் கௌசல்
பின்னவர்	பி. சிவ சங்கர்
மின்னணு மற்றும் தகவல் தொடர்பு தொழில்நுட்பத் துறை
பதவியில் 1 செப்டம்பர் 1963 – 13 ஜூன் 1964
முன்னையவர்	ஜெகசீவன்ராம்
பின்னவர்	சத்ய நாராயண சின்கா
எஃகு மற்றும் சுரங்கங்கள் துறை
இந்திய உச்சநீதிமன்ற வழக்கறிஞர்கள் சங்கத்தின் தலைவர்
இந்திய கால் பந்து சங்கத்தின் தலைவர்
மக்களவை உறுப்பினர்
பதவியில் 1957 - 1977
முன்னையவர்	மேகநாத சாஃகா
பின்னவர்	விஜய் சிங் நாகர்
தொகுதி	கொல்கத்தா வடமேற்கு மக்களவைத் தொகுதி
பதவியில் 1980 - 1989
முன்னையவர்	விஜய் சிங் நாகர்
பின்னவர்	தேவி பிரசாத் பால்
தொகுதி	கொல்கத்தா வடமேற்கு மக்களவைத் தொகுதி
தனிப்பட்ட விவரங்கள்
பிறப்பு	(1913-10-10)10 அக்டோபர் 1913 பரிதாபூர், வங்காளம், பிரித்தானிய இந்தியா
இறப்பு	21 செப்டம்பர் 1996(1996-09-21) (அகவை 82) புது தில்லி, இந்தியா
அரசியல் கட்சி	இந்திய தேசிய காங்கிரசு ஜனதா தளம், சுயேச்சை
துணைவர்	அஞ்சனா சென்
பிள்ளைகள்	2 மகள்கள் 2 மகன்கள்
உறவினர்	சுகுமார் சென் (சகோதரர்) அமர்த்தியா சென் (மருமகன்)
முன்னாள் மாணவர்	மாநிலப் பல்கலைக்கழகம், கொல்கத்தா இலண்டன் பொருளியல் பள்ளி
தொழில்	வழக்கறிஞர்

அசோக் குமார் சென் (Ashoke Kumar Sen)(10 அக்டோபர் 1913 - 21 செப்டம்பர் 1996) ஓர் இந்திய வழக்கறிஞர் ஆவார். இவர் இந்தியாவின் முன்னாள் அமைச்சராகவும், இந்திய நாடாளுமன்ற உறுப்பினராகவும் இருந்துள்ளார். இவர் அதிக முறை நாடாளுமன்ற உறுப்பினராக இருந்தது மட்டுமல்லாமல், ஏழுக்கும் மேற்பட்ட பிரதமர்களிடம் அமைச்சராகவும் இருந்தார். பல தசாப்தங்களாக, இவர் தவிர்க்க முடியாத மத்திய சட்ட அமைச்சராக இருந்தார்.

அசோக் குமார் சென், 1913இல் ஒரு பிரபலமான பைத்யா பிராமணக் குடும்பத்தில் பிறந்தார். இவரது தந்தை மாவட்ட ஆட்சியராக இருந்தார். இவரும் அண்ணன் சுகுமார் சென்னும் ஒடிசாவின் சம்பல்பூர் உயர்நிலைப் பள்ளியில் மாணவர்களாக இருந்தனர். சுகுமார் சென் இந்திய அரசு ஊழியரும், இந்தியாவின் முதல் இந்தியத் தலைமைத் தேர்தல் ஆணையர் என்ற பெருமையைப் பெற்றவர். இந்தியா, சூடான் , நேபாளத்தின் முதல் தலைமை தேர்தல் ஆணையராக இருந்துள்ளார்.^[1] சுகுமார் சென், இங்கிலாந்தின் இலண்டன் பொருளியல் பள்ளியில் படிக்கும்போது இவரது கல்விக்கு நிதியளித்தார்.

இலண்டனிலிருந்து திரும்பியதும், கொல்கத்தா பல்கலைக்கழகத்தின் நகரக் கல்லூரியில் சட்டம் கற்பிக்கத் தொடங்கினார்.^[2] பின்னர் தனது 26வது வயதில் கல்கத்தா உயர்நீதிமன்றத்தில் சட்டப் பய்ற்சியினைத் தொடங்கினார். இவர் ஏற்கனவே வணிகச் சட்டம் பற்றி ஒரு புத்தகத்தை எழுதியிருந்தார். அதற்கு இந்தியாவின் எதிர்கால தலைமை நீதிபதியான சுதி ரஞ்சன் தாஸ் அணிந்துரை வழங்கினார்.

சில வருடங்களுக்குப் பிறகு, பிப்ரவரி 1943 இல், அசோக் குமார் சென் தனது மூத்த வழக்கறிஞர் சுதி ரஞ்சன் தாஸின் ஒரே மகள் அஞ்சனா தாஸ் என்பவரை மணந்தார். இவர்களுக்கு இரண்டு மகன்களும் இரண்டு மகள்களும் இருந்தனர்.^[3] இவர், உச்ச நீதிமன்றத்தின் மூத்த வழக்கறிஞராகவும், உச்ச நீதிமன்ற வழக்கறிஞர்கள் சங்கத்தின் தலைவராகவும் பல முறை இருந்தார்.^[2]

இவரது சட்ட அறிவின் காரணமாக, மேற்கு வங்க முதலமைச்சர் பிதான் சந்திர ராய், இவரை பிரதமர் ஜவகர்லால் நேருவுக்கு பரிந்துரை செய்தார். தனது அமைச்சரவையில் இவரைச் சேர்த்துக் கொள்ள நேரு விரும்பினார். எனவே இவரை மக்களவைத் தேர்தலில் போட்டியிடச் சொன்னார்.

1957ஆம் ஆண்டில், கொல்கத்தா வடமேற்கு மக்களவைத் தொகுதி பொதுவுடைமைக் கட்சியின் கோட்டையாக இருந்தது. தேர்தலில் வெற்றிபெற சென் 1956இல் முயற்சித்தார். ஆனால் ஒரு சில வாக்குகள் வித்தியாசத்தில் தோல்வியடைந்தார். இருப்பினும், அடுத்த ஆண்டில், இவர் 100,000 வாக்குகளுக்கு மேல் பெற்று வெற்றி பெற்றார். இவர் 1957 முதல் 1977 வரை அந்த இடத்தை தக்கவைத்துக்கொண்டார். மேலும் 1980 முதல் 1989 வரை மீண்டும் கல்கத்தா வடமேற்கு தொகுதியை பிரதிநிதுத்துவப்படுத்தினார். 1989இல் தேவி பிரசாத் பால் என்பவரால் தோற்கடிக்கப்பட்டார்.^[4]

சென், இரண்டாவது, மூன்றாவது, நான்காவது, ஐந்தாவது , எட்டாவது மக்களவையில் உறுப்பினராக இருந்தார்.^[5]

பின்னர் இவர் மாநிலங்களவை உறுப்பினராக நியமிக்கப்பட்டார். தான் இறப்பதற்கு சில மாதங்களுக்கு முன்பு ஏப்ரல் 1996 வரை மேல் சபையில் உறுப்பினராக இருந்தார்.

அசோக் சென் நேருவின் கீழ் மத்திய சட்ட அமைச்சராக இருந்தார். மேலும், இவர் தகவல் தொடர்பு, எஃகு, சுரங்கங்கள் போன்ற பிற துறைகளுக்கும் பொறுப்பு வகித்தார்.^[5]

இவர் கடைசியாக ராஜீவ் காந்தியின் கீழ் சட்ட அமைச்சராக இருந்தார். 1989இல் தனது சொந்த மாநிலமான மேற்கு வங்காளத்தில் மாநிலத் தேர்தலில் இவரது கட்சி தோல்வியடைந்த பின்னர் பதவி விலகினார்.^[6]

தனது வாழ்நாளில், சென், பசிம் பங்கா சேவா சமிதி என்ற ஒரு தொண்டு நிறுவனத்தைத் தொடங்கினார். இவர் இந்திய கால்பந்து சங்கத்தின் தலைவராகவும் பணியாற்றினார். இவரது வாழ்நாளில், பல அரிய தொகுப்புகளுடன் கூடிய ஒரு பெரிய சட்ட நூலகத்தையும் உருவாக்கினார். இந்த நூலகம் உலகின் மிகப்பெரிய தனியார் சட்ட நூலகங்களில் ஒன்றாக கருதப்படுகிறது.

இவர் பெயரில் இந்திய உச்சநீதிமன்றத்தில் ஒரு கட்டிடம் உள்ளது. இவரது உருவப்படமும் அங்கு தொங்குகிறது. சென் மீது பல ஆவணப்படங்களும் தயாரிக்கப்பட்டுள்ளன.

இவரது அண்ணன் சுகுமார் சென் தவிர, இவருக்கு மற்றொரு சகோதரர் அமியா குமார் சென், இரவீந்திரநாத் தாகூரின் கூட்டாளியாக இருந்தார். தாகூர் குடும்ப செய்தித்தாள் பற்றிய புத்தகத்தை எழுதிய அமியா, முன்பு கொல்கத்தா பல்கலைக்கழகத்தில் விரிவுரையாளராகவும், கொல்கத்தா நகரக் கல்லூரியின் முதல்வராகவும் இருந்தார். இவர், நோபல் பரிசு பெற்ற பொருளாதார நிபுணர் அமர்த்தியா சென் என்பவரின் மாமாவும் ஆவார்.

• Profile from India's Rajya Sabha (Upper House) website
• " The biggest gamble in history" பரணிடப்பட்டது 2020-12-20 at the வந்தவழி இயந்திரம் The Hindu 27 January 2002, magazine section. Later reprinted as "Democracys biggest gamble: Indias first free elections in 1952. (Reconsiderations)." (partly available online) World Policy Journal 22 March 2002.