குசராத்து சட்டமன்றத் தேர்தல், 2022

குசராத்து சட்டமன்றத் தேர்தல், 2022

← 2017 1 & 5 திசம்பர் 2022

தலைவர் புபேந்திர படேல் ஜகதீசு தாக்கோர் இசுதன் காத்வி கட்சி பா.ஜ.க காங்கிரசு ஆம் ஆத்மி கட்சி கூட்டணி தேஜகூ ஐமுகூ - தலைவரான ஆண்டு 2021 2018 2021

Assembly Constituencies of Gujarat Legislative Assembly

நடப்பு முதலமைச்சர் புபேந்திர படேல் பாரதிய ஜனதா கட்சி

குசராத்து சட்டமன்றத் தேர்தல், 2022 (2022 Gujarat Legislative Assembly election) என்பது குசராத்து சட்டப் பேரவைக்கு 182 உறுப்பினர்களைத் தேர்ந்தெடுப்பதற்காக 2022 திசம்பரில் குஜராத்தில் நடைபெறும் தேர்தலைக் குறிக்கின்றது. குஜராத்தில் 4.9 கோடி வாக்காளர்கள் இருக்கிறார்கள். இவர்களில் ஆண் வாக்காளர்கள் 2.53 கோடி. பெண் வாக்காளர்கள் 2.37 கோடி பேர். கடந்த தேர்தலைவிட இந்தத் தேர்தலில் புதிய வாக்காளர்களின் எண்ணிக்கை 4.6 லட்சம் அதிகரித்துள்ளது. இத்தேர்தல் முடிவில் பாஜக 156 தொகுதிகளைக் கைப்பற்றி^[1] 7வது முறையாக ஆட்சி அமைத்தது.

தேர்தல் அட்டவணை இந்தியத் தேர்தல் ஆணையம் நவம்பர் 3, 2022 அன்று அறிவித்தது. இதன்படி இத்தேர்தல் இரண்டு கட்டங்களாக திசம்பர் 1 மற்றும் 5ஆம் தேதிகளில் நடைபெற்றது. மேலும் தேர்தல் வாக்கு எண்ணிக்கை திசம்பர் 8ஆம் தேதி தொடங்கி முடிவுகள் வாக்கு எண்ணிக்கை நிறைவு பெற்றதும் அறிவிக்கப்படும்.^[2][3]

குசராத்தின் 14வது சட்டப் பேரவையின் பதவிக்காலம் 18 பிப்ரவரி 2023^[4] முடிவடைகிறது. இதற்கு முன் 2017 திசம்பரில் சட்டசபைத் தேர்தல் நடந்தது. தேர்தலுக்குப் பிறகு, பாரதிய ஜனதா கட்சி மாநில அரசாங்கத்தை அமைத்தது. விஜய் ரூபானி முதல்வராகப் பதவியேற்றார்.^[5]

விஜய் ரூபானி 11 செப்டம்பர் 2021 அன்று முதல்வர் பதவியிலிருந்து விலகினார்.^[6] இவருக்குப் பிறகு பூபேந்திர படேல் புதிய முதலமைச்சராகப் பதவியேற்றார்.^[7]

கடந்த சட்டமன்றத் தேர்தலுக்குப் பிறகு, பல இடைத்தேர்தல்கள் நடத்தப்பட்டன. இவற்றில் பெரும்பாலான தொகுதிகளில் பாஜக வென்றது. இவர்களின் பலம் 99-லிருந்து 112 இடங்களாக உயர்ந்தது.^[8]

2021 குஜராத் உள்ளாட்சித் தேர்தலில் அனைத்து மாநகராட்சி மற்றும் மாவட்ட பஞ்சாயத்துகளையும் பாஜக வென்றது. இந்தியத் தேசிய காங்கிரசு ஒரு நகராட்சி மற்றும் 18 வட்ட பஞ்சாயத்துகளில் பெரும்பான்மை பெற்றது.^[9] பாஜகவின் பலம் இத்தேர்தல்கள் மூலம் அதிகரித்தது. ஆனால் மறுபுறம் ஆம் ஆத்மி கட்சி மாநிலத்தில் போட்டியாளராகக் கருதப்படுவதற்கு வகையில் குறிப்பிடத்தக்க வகையில் முன்னேறியது.

2017 குஜராத் சட்டப் பேரவைத் தேர்தலில் விவசாயிகள் மற்றும் படிதார் போராட்டத்தால் சௌராட்டிராவின் சில மாவட்டங்களில் பாஜக தோல்வியடைந்தது. குறிப்பாக அம்ரேலி மற்றும் கிர் சோம்நாத் ஆகிய இடங்களில் காங்கிரசிடம் அனைத்து இடங்களையும் இழந்தது.^[10] இருப்பினும், மற்ற மாவட்டங்களுடன் அம்ரேலியில் பஞ்சாயத்துத் தேர்தல்கள் நடைபெற்றபோது, பாஜக மூன்றில் இரண்டு பங்கு எனப் பெரும்பான்மையைப் பெற்றது. இது அம்ரேலியின் ஐந்து சட்டமன்றப் பகுதிகளிலும் முன்னிலை பெற்றது. ஆனால் குஜராத் கிராமப்புறங்களில் ஆம் ஆத்மி கட்சி வெற்றி பெற்றது. இது குஜராத் மும்முனைப் போட்டியை நோக்கிச் செல்கிறது என்பதைக் குறிக்கிறது.^[11][12]

காந்திநகர் மாநகராட்சித் தேர்தலில் மொத்தமுள்ள 44 வார்டுகளில் பாஜக 41 வார்டுகளிலும், காங்கிரசு 2 இடங்களிலும் வெற்றி பெற்றன. ஆம் ஆத்மி கட்சி ஒரு இடத்தை வென்றது. ஆனால் வாக்குப் பங்கின் அடிப்படையில் மூன்றாவது பெரிய கட்சியாக ஆம் ஆத்மி கட்சி இருந்தது. இது மூன்றாவது மாற்றாக ஆம் ஆத்மியை ஏற்றுக்கொள்வதைக் குறிக்கிறது. பாஜகவுக்குச் சாதகமாக இருந்த பாஜக எதிர்ப்பு வாக்குகளைப் பிரிப்பதன் மூலம் ஆம் ஆத்மியை பாஜகவின் 'பி அணி' என்று காங்கிரசு அழைத்தது.^[13]

இந்தியத் தேர்தல் ஆணையத்தின் அதிகாரிகள் குழு தேர்தலுக்கு முன்னதாக தேர்தல் தயார்நிலையை மதிப்பிடுவதற்காக 16 முதல் 18 செப்டம்பர் 2022 வரை அகமதாபாத்திற்குச் சென்றது. குசராத்து தலைமைத் தேர்தல் அதிகாரி பி. பாரதியுடன் குழு, மாவட்ட தேர்தல் அதிகாரிகள், காவல் கண்காணிப்பாளர்கள், துணை கண்காணிப்பாளர்கள், காவல் துறை ஆணையர்களுடன் தேர்தல் தயார்நிலை குறித்து ஆய்வுக் கூட்டம் நடத்தியது.^[14]

தலைமைத் தேர்தல் ஆணையர் இராஜீவ் குமார், தேர்தல் ஆணையத்தின் மூத்த அதிகாரிகளுடன் 2022 செப்டம்பர் 26 மற்றும் 27 ஆகிய தேதிகளில் குசராத்தில் தேர்தல் முன்னேற்பாடுகளைப் பற்றி ஆய்வு செய்ய குசராத்திற்கு வருகை புரிந்தார். ஆணையம் அனைத்து மாவட்ட தேர்தல் அதிகாரிகள் மற்றும் சட்ட அமலாக்க அதிகாரிகளுடன் கூட்டத்தை நடத்தியது. தேர்தல் நடத்துவது தொடர்பாகக் காங்கிரசு மற்றும் பாஜக பிரதிநிதிகளிடமிருந்தும் ஆணையம் ஆலோசனைகளைப் பெற்றது.^[15]

ஆதாரம்:^[16]

எண்	கட்சி	கொடி	சின்னம்	தலைவர்	புகைப்படம்	இடங்கள் போட்டியிட்டன
1	பாரதிய ஜனதா கட்சி			பூபேந்திரபாய் படேல்		182[17][18]

11 நவம்பர் 2022 அன்று காங்கிரசு மற்றும் தேசியவாத காங்கிரசு இணைந்து தேர்தலில் போட்டியிட கூட்டணியை அறிவித்தன.^[19]

எண்	கட்சி	கொடி	சின்னம்	தலைவர்	புகைப்படம்	போட்டியிட்ட இடங்கள்
1	இந்திய தேசிய காங்கிரசு			ஜெகதீஷ் தாக்கூர்		179[17][18][20]
2.	தேசியவாத காங்கிரசு கட்சி			ஜெயந்பாய் பட்டேல் போஸ்கி		2[17]
மொத்தம்						181

மே 2022-ல், ஆம் ஆத்மி கட்சி, பாரதிய பழங்குடியினர் கட்சி உடன் தேர்தலுக்கு கூட்டணியை அறிவித்தது.^[21] இருப்பினும், செப்டம்பர் 2022-ல் அந்தக் கூட்டணி கைவிடப்பட்டது.

எண்	கட்சி	கொடி	சின்னம்	தலைவர்	புகைப்படம்	போட்டியிட்ட இடங்கள்
1	ஆம் ஆத்மி கட்சி				இசுதன் காத்வி	180[17][22]

எண்	கட்சி	கொடி	சின்னம்	தலைவர்	புகைப்படம்	போட்டியிட்ட இடங்கள்
1.	பாரதிய பழங்குடியினர் கட்சி			சோட்டுபாய் வாசவா		26[23]
2.	அனைத்திந்திய மஜ்லிசே இத்திகாதுல் முசுலிமீன்			சபீர் கப்லிவாலா		13[23]
3	இந்திய கம்யூனிஸ்ட் கட்சி			விஜய் சென்மரே		13[23]
4.	பகுஜன் சமாஜ் கட்சி			அசோக் சவ்தா[24]		101[23]
5.	சமாஜ்வாதி கட்சி			தேவேந்திர உபாத்யா[25]		17[23]

2022-ல் குஜராத்தில் 50 பேர் இறந்ததைத் தொடர்ந்து, குஜராத்தில் விச சாராய மரணங்கள், மது மற்றும் போதைப்பொருள் பாவனை தேர்தலில் ஒரு பிரச்சினையாக மாறியது. குசராத்தில் நடந்த சட்டவிரோத மதுபான வியாபாரம் தொடர்பாக உயர்நீதிமன்ற நீதிபதி மூலம் விசாரணை நடத்தப்பட வேண்டும் என்று இந்தியத் தேசிய காங்கிரசு கோரியது. இந்த மாஃபியாக்களுக்கு எந்த "ஆளும் சக்திகள்" பாதுகாப்பு அளிக்கின்றன என்று காங்கிரசு முன்னாள் தலைவர் இராகுல் காந்தி பகிரங்கமாகக் குற்றம் சாட்டினார். ஆம் ஆத்மி கட்சியின் மாநிலத் தலைவர் கோபால் இத்தாலியா, இந்தச் சம்பவம் தொடர்பாக மத்திய புலனாய்வுப் பிரிவு விசாரணை நடத்த வேண்டும் என்று கோரினார்.

செப்டம்பர் 2021-ல், 2,988.22 கிலோகிராம் (6,587.9 lb) போதை மருந்து, ஹெராயின் ஈரானின் பந்தர் அப்பாசிலிருந்து முந்திரா துறைமுகத்திற்கு வந்த இரண்டு கொள்கலன்களிலிருந்து கைப்பற்றப்பட்டது. ஆப்கானித்தானிலிருந்து வந்த அரை-பதப்படுத்தப்பட்ட சோப்புக்கல் தொகுப்பு என பொதியிடப்பட்டு இருந்தது.^[26] இந்த சம்பவம் மீண்டும் மே^[27] மற்றும் சூலை 2022-ல் நிகழ்ந்தது.^[28] இச்சூழலில் 52 கிலோ மற்றும் 75 கிலோ போதைப்பொருள் கைப்பற்றப்பட்டது. இந்த முந்திரா துறைமுகம் நரேந்திர மோதியின் கூட்டாளியான^[29] அதானி குழுமத்தின் நிறுவனர் கௌதம் அதானிக்கு சொந்தமானது.^[30]

செப்டம்பர் 2021 போதைப்பொருள் கைப்பற்றிய பிறகு பாஜக தலைமையிலான அரசாங்கத்தின் மௌனம் குறித்து காங்கிரசு விமர்சித்தது. இந்த போதைப்பொருட்கள் ஆப்கானித்தானிலிருந்துபெறப்பட்டவை என்றும், இந்த போதைப்பொருள்களின் சட்டவிரோத விற்பனையானது பயங்கரவாதிகளால் இந்தியாவுக்கு எதிராகப் பயன்படுத்தப்படலாம் என்றும் கவலை தெரிவிக்கப்பட்டது.^[31] மே மாதம், முந்திரா துறைமுகத்தில் மீண்டும் போதைப்பொருள் கைப்பற்றப்பட்டபோது,^[32] குசராத்தின் கடற்கரையோரத்தில் ஏன் மீண்டும் மீண்டும் போதைப்பொருட்கள் கண்டுபிடிக்கப்பட்டன என்று காங்கிரசு மீண்டும் அரசாங்கத்தை விமர்சித்தது.^[27]

போதைப்பொருள் கைப்பற்றப்பட்ட விவகாரத்தில் ஆம் ஆத்மியும் தங்கள் எதிர்ப்பை பதிவு செய்தது.^[33]

தலைமை எழுத்தர் பணிக்கான எழுத்துத் தேர்வு திசம்பர் 12, 2021 அன்று நடைபெற்றது. இதில் 186 காலியிடங்களுக்கு 88,000 விண்ணப்பதாரர்கள் விண்ணப்பம் செய்து இருந்தனர். இந்தத் தேர்வை குசராத்து துணைபணியிட தேர்வு வாரியம் நடத்தியது. ஜிஎஸ்எஸ்எஸ்பி தலைவராக பணியாற்றிய பாஜக தலைவர் அசித் வோரா இதற்கு மூளையாகச் செயல்பட்டதாக ஐஎன்சி குற்றம் சாட்டியது.^[34] இந்த வழக்கில் மூளையாகச் செயல்பட்டதாகக் கூறப்படும் துஷார் மெர் உட்பட காந்திநகர், அகமதாபாத், சபர்கந்தாவைச் சேர்ந்த 36 பேர் கைது செய்யப்பட்டனர்.^[35]

தேர்வுக்கு முன், வினாத்தாள் கசிந்து, 8 முதல் 12 லட்சம் ரூபாய்க்கு விற்கப்பட்டதாக ஆம் ஆத்மி குற்றம் சாட்டியது. பின்னர் குஜராத் அரசு தேர்வை ரத்து செய்து, மார்ச் 2022-ல் மறுதேர்வு நடத்தப்படும் என அறிவித்தது.^[36] ஆம் ஆத்மி கட்சியின் 500 ஆதரவாளர்கள் பாஜக தலைவர் அசித் வோராவை தேர்வாணைய தலைவர் பதவியில் இருந்து நீக்கக் கோரி பாஜக, காந்திநகர் அலுவலகத்திற்கு வெளியே போராட்டம் நடத்தினர். பாஜக தொண்டர்கள் ஆம் ஆத்மி போராட்டக்காரர்களுடன் மோதலில் ஈடுபட்டதால், காவல்துறையினர் தடியடி நடத்தினர். ஆம் ஆத்மிக்கு எதிராக காவல்துறை வழக்குப் பதிவு செய்தார். 28 பெண்கள் உட்பட தொண்ணூற்று மூன்று ஆம் ஆத்மி உறுப்பினர்கள் கைது செய்யப்பட்டனர். கைது செய்யப்பட்டவர்களில் ஆம் ஆத்மி தலைவர் இத்தாலியா, ஆம் ஆத்மி பெண்கள் பிரிவு மற்றும் இளைஞர் பிரிவு தலைவர்கள் அடங்குவர். பிணை பெறுவதற்கு முன்பு இத்தாலியா மற்றும் பிற ஆம் ஆத்மி தலைவர்கள் 10 நாட்கள் சிறையிலிருந்தனர்.^[36]

2015 முதல் மாநில அரசு நடத்தும் தேர்வுகளுக்கான வினாத்தாள் கசிவுக்கு வழிவகுத்த பரவலான ஊழலை ஆம் ஆத்மி எடுத்துக்காட்டுகிறது. தில்லி முதல்வர் அரவிந்த் கெஜ்ரிவால் மத்தியப் பிரதேசத்தில் நடந்த வியாபம் ஊழலுடன் ஒப்பிட்டு, குசராத்தில் ஆட்சேர்ப்புத் தேர்வுகளை மகா வியாபம் ஊழல் (பெரிய வியாபம் ஊழல்) என்று அழைத்தார். வினாத்தாள் கசிவு குற்றத்திற்கு பத்து ஆண்டுகள் தண்டனை விதிக்கும் சட்டத்தை உருவாக்குவதாக ஆம் ஆத்மி உறுதியளித்தது.^[37]

ஆட்சேர்ப்பு தேர்வுகளுக்கான வினாத்தாள் கசிவு குறித்து காங்கிரசு அரசாங்கத்தைக் குற்றம் சாட்டியது. தற்போது ரத்து செய்யப்பட்டுள்ள தலைமை எழுத்தர் ஆட்சேர்ப்பு தேர்வில் பங்கேற்ற ஆயிரக்கணக்கான வேலை தேடுபவர்களின் அவல நிலையை எடுத்துரைத்து, காந்திநகரில் ஒரு போலி சட்டசபையையும் அவர்கள் நடத்தினர். அனைத்து காங்கிரசு சட்டமன்ற உறுப்பினர்கள் மற்றும் கட்சி தலைவர்கள் போலி சட்டசபையில் பங்கேற்றனர். எதிர்க்கட்சித் தலைவரும், மூத்த காங்கிரசு தலைவருமான சுக்ராம் ரத்வா, குசராத் மாநில இளைஞர்களை ஏமாற்றும் வகையில், தேர்வுத் தாள் கசிவு தொடர்பாக, உயர்நீதிமன்ற நீதிபதி மூலம் நீதி விசாரணை நடத்த வேண்டும் என்று குசராத்து அரசை வலியுறுத்தியுள்ளார். வினாத்தாள் கசிவுக்குப் பின்னால் ஆர்எஸ்எஸ் மற்றும் பாஜக இருப்பதாகவும் குற்றம் சாட்டினர்.^[38] காங்கிரசு சட்டமன்ற உறுப்பினர்கள் சட்டசபையில் வினாத்தாள் கசிந்ததற்கு எதிர்ப்பு தெரிவித்து, தங்கள் இருக்கைகளிலிருந்து நின்று, கசிவு தொடர்பாகச் சுவரொட்டிகளைக் காட்டினர். பேரவை 15 நிமிடங்களுக்கு ஒத்திவைக்கப்பட்டது.^[39] அசித் வோராவை பதவி விலகக் கோரி காந்திநகரில் உள்ள கோபாவிலும் காங்கிரசு போராட்டம் நடத்தியது.^[40]

மார்ச் மாதத்தில், குசராத் முழுவதும் ஆயிரக்கணக்கான விவசாயிகள் தங்கள் வட்டம் மற்றும் மாவட்டத் தலைமையகங்களில் விளைந்த பயிர்களைக் காப்பாற்ற போதுமான மின்சாரம் வழங்கக் கோரி ஆர்ப்பாட்டத்தில் ஈடுபட்டுள்ளனர்.^[41]

காலமுறை தொழிலாளர் படை கணக்கெடுப்பு கணக்கெடுப்பின்படி - ஏப்ரல்-சூன் 2022^[42] அறிக்கையின்படி, குசராத்தின் வேலையின்மை விகிதம் தேசிய சராசரியை விடக் குறைவாக இருந்தது. ஏபிபி நியூஸ் நடத்திய ஆய்வின்படி, குசராத்தில் வேலையில்லாத் திண்டாட்டம்தான் மக்களுக்குப் பெரும் பிரச்சினையாக இருக்கிறது.^[43] மாநிலத்தில் வேலையில்லா திண்டாட்டம் படிப்படியாக அதிகரித்து வருகிறது.

மார்ச் 2021-ல் மாநில வேலைவாய்ப்பு அலுவலகத்தில் நான்கு லட்சம் பேர் வேலை வாய்ப்பிற்காகப் பதிவு செய்துள்ளனர். இவர்களில் 3,85,506 பேர் கல்வியறிவு பெற்றவர்கள் மற்றும் ஐந்து சதவீதம் பேர் மட்டுமே பகுதி திறன் பெற்றவர்கள்.^[44] மார்ச் 2022-ல் வெளியிடப்பட்ட மாநில நிதிநிலை அறிக்கையின் புள்ளிவிவரங்களின்படி, குசராத்தில் 3,46,436 படித்த மற்றும் 17,816 பகுதி எழுத்தறிவு பெற்ற வேலையற்ற இளைஞர்கள் பல்வேறு வேலைவாய்ப்பு பரிமாற்றங்களில் பதிவு செய்துள்ளனர். கடந்த 2 ஆண்டுகளாகக் குஜராத் பாஜக அரசாங்கத்தால் 0.35% வேலையில்லாத இளைஞர்களுக்கு மட்டுமே வேலை கொடுக்க முடிந்தது.^[45][46]

குசராத்தில் உள்ள 700 அரசுப் பள்ளிகள் தலா ஒரு ஆசிரியரைக் கொண்டு இயங்கினாலும், சமீப ஆண்டுகளில் குசராத்தில் கல்வி மேம்பட்டு வருகிறது. 8,500 தொடக்கப் பள்ளிகளில் தலா இரண்டு ஆசிரியர்கள் மட்டுமே உள்ளனர்.^[47]

ஏப்ரலில், பெட்ரோல் விலை உயர்வு மற்றும் பணவீக்கத்திற்கு எதிராக குசராத்து முழுவதும் பல நகரங்களில் காங்கிரசு போராட்டம் நடத்தியது. அமரைவாடியில், எரிபொருள் மற்றும் சமையல் எரிவாயு விலைக்கு எதிரான போராட்டத்தின் போது, காங்கிரசார் காலி எரிவாயு உருளிகளைக் கொண்டுவந்தனர். இவர்கள் பல நகரங்களிலும் போராட்டங்களை நடத்தினர். அங்கு இவர்கள் உருவ பொம்மைகளை எரித்தனர். தர்ணா போராட்டத்தில் ஈடுபட்டனர். காவல்துறையினருடன் கூட மோதினர். அப்போது, அனுமதியின்றி ஆர்ப்பாட்டம் செய்ததற்காகவும், உருவபொம்மையை எரித்ததற்காகவும் சுமார் 12 காங்கிரசு தொண்டர்கள் காவல்துறையினரால் கைது செய்யப்பட்டனர்.^[48] மே 16 அன்று, ராஜ்கோட் நகரத் தலைவர் அர்ஜுன் கட்டாரியா தலைமையில் ராஜ்கோட்டில்^[49] விலைவாசி உயர்வுக்கு எதிராகக் காங்கிரசு தொழிலாளர்கள் மீண்டும் போராட்டம் நடத்தினர். இதில் அர்ஜீன் கட்டாரியா உட்பட 30 காங்கிரசு தொண்டர்கள் காவல்துறையினரால் தடுத்து நிறுத்தப்பட்டனர்.^[50]

ஆம் ஆத்மி கட்சி, குசராத்தில் தனது தேர்தல் பிரச்சாரத்தை ஏப்ரல் 2 ஆம் தேதியன்று பாதயாத்திரையுடன் தொடங்கியது. 2022ஆம் ஆண்டு மே மாதம், ஆம் ஆத்மி கட்சி பாரதிய பழங்குடியினருடன் தனது கூட்டணியைச் சட்டமன்றத் தேர்தலுக்கு அறிவித்தது.^[21] இருப்பினும், செப்டம்பர் 2022-ல் கூட்டணி கைவிடப்பட்டது.^[17]

2 ஆகத்து 2022 அன்று, கெஜ்ரிவால் சௌராட்டிராவின் வெராவல் என்ற இடத்தில் ஒரு பொது பேரணியில் உரையாற்றி "உத்தரவாதங்களை" அறிவித்தார்.^[51][52] வடக்கு குசராத்தின் மூன்று மாவட்டங்களான படன், சபர்கந்தா மற்றும் பனஸ்கந்தா ஆகிய பகுதிகளில் வேலைவாய்ப்பு உத்தரவாத பயணத்தினை ஆம் ஆத்மி அறிவித்துள்ளது. இந்த பிரச்சாரம் வேலையற்ற இளைஞர்களை ஈர்த்தது.^[53] செப்டம்பர் 2 அன்று தேவபூமி துவாரகா மாவட்டத்தில் விவசாயிகளுக்கு ஐந்து உத்தரவாதங்களை கெஜ்ரிவால் அறிவித்தார்.^[37][54]

தேர்தலுக்கு முந்தைய மாதங்களில், எதிர்ப்பாளர்களுக்கு ஆம் ஆத்மி ஆதரவு அளித்த மாநிலத்தில் பல போராட்டங்கள் நடத்தப்பட்டன.^[55]

செப்டம்பர் 20 அன்று, குஜராத்தில் நமோ கிசான் பஞ்சாயத்துத் திட்டத்திற்கான இ-இருசக்கர வாகனங்களைக் கொடியசைத்துத் துவக்கிவைத்து, பாஜக தேசியத் தலைவர் ஜே.பி.நட்டா, மத்திய அரசின் திட்டங்களால் விவசாயிகளுக்கான நலத்திட்டங்களைப் பட்டியலிட்டார்.^[56]

சுமிருதி இரானி, கிரண் ரிஜிஜு, கிரிராஜ் சிங் உள்ளிட்ட 12 மத்திய அமைச்சர்கள் குசராத்தில் தேர்தல் பிரச்சாரத்தைத் தொடங்க உள்ளனர்.^[57]

பிரதமர் நரேந்திர மோதி 29 செப்டம்பர் 2022 அன்று சூரத் மற்றும் பாவ்நகரில் சாலைக் காட்சிகளை நடத்தினார்.^[58]

குசராத்து முதல்வர் பூபேந்திர படேல் மோடியுடன் இணைந்து 19 அக்டோபர் 2022 ^[59] ராஜ்கோட்டில் பேரணியை நடத்தினார்.

காங்கிரசு கட்சியின் முன்னாள் தலைவர் இராகுல் காந்தி 5 செப்டம்பர் 2022^[60] குசராத்தில் கட்சியின் பிரச்சாரத்தைத் தொடங்கினார். அதே நாளில், இவர் அகமதாபாத்திற்குச் சென்று "பரிவர்தன் சங்கல்ப் சம்மேளனத்தில்" கலந்து கொண்டார். அங்கு இவர் பாஜக அரசாங்கத்தை விமர்சித்தார்.^[61] இலவச மின்சாரம், ₹3 லட்சம் வரை விவசாயக் கடன் தள்ளுபடி, 10 லட்சம் வேலைகள், கோவிட் நோயால் பாதிக்கப்பட்ட குடும்பங்களுக்கு இழப்பீடு ஆகியவற்றைச் செயல்படுத்த உறுதியளித்தார். 19 தொற்றுநோய், ₹500க்கு எல்பிஜி உருளை, பெண்களுக்கு இலவசக் கல்வி, 3,000 புதிய ஆங்கில வழிப் பள்ளிகள் மற்றும் பால் பண்ணையாளர்களுக்கு மானியம் அளிப்பதாகவும் தெரிவித்தார்.^[60]

விலைவாசி உயர்வு மற்றும் வேலையில்லாத் திண்டாட்டத்திற்கு எதிராக குசராத்தில் செப்டம்பர் 10ஆம் தேதி மாநிலம் தழுவிய "முழு அடைப்பிற்கு"க்கு காங்கிரசு தலைமை தாங்கியது.^[62] இவர்கள் பருச் மற்றும் குசராத்தின் பிற பகுதிகளிலும் விலைவாசி உயர்வு மற்றும் வேலையில்லா திண்டாட்டம் தொடர்பாக ஆர்ப்பாட்டங்களை நடத்தினர்.^[63]

செப்டம்பர் 22 அன்று, காங்கிரஸ் அம்பாஜியிலிருந்து குசராத்தில் மாற்றத்திற்கான இளைஞர் அணிவகுப்பு எனும் "யுவ பரிவர்தன் யாத்ராவினை" தொடங்கியது. இது மாநிலத்தின் 27 மாவட்டங்களில் உள்ள பல நகரங்கள் மற்றும் நகரங்கள் வழியாக சென்றது.^[64][65] இது அம்பாஜி முதல் உமர்கம் வரையிலும், சோமந்த் முதல் சுகம் வரையிலும் இரண்டு கட்டங்களாக நடைபெற்றது. இந்த யாத்திரை மாநிலம் முழுவதும் 2100 கிலோமீட்டர்களுக்கு மேல் பயணித்தது.^[65] காங்கிரசின் 8 வாக்குறுதிகள் மற்றும் பிஜேபி அரசாங்கத்தின் 4 அம்ச தோல்விகள் அடங்கிய "வச்சன் பத்திரங்கள்" அல்லது வாக்குறுதி கடிதங்களைக் காங்கிரசு வீடு வீடாக விநியோகித்தது. தேர்தலுக்கு முன் சுமார் 1.55 கோடி (15.5 மில்லியன்) வாக்குறுதி கடிதங்களை வழங்குவதை இலக்காகக் கொண்டுள்ளது.^[66] யாத்திரையின் முதல் கட்டம் பழங்குடியினர் பகுதி வழியாக நகர்ந்தது. இங்கு இது குறிப்பாகப் பழங்குடி இளைஞர்களை மையமாகக் கொண்டது. இரண்டாம் கட்ட யாத்திரை சௌராஷ்டிரா - கட்ச் பகுதி வழியாகச் சென்றது.^[67]

செப்டம்பர் 28 அன்று, காங்கிரஸ் சௌராட்டிராவில் ஒரு நாள் நீண்ட யாத்திரையை நடத்தியது. ராஜ்கோட்டில் தொடங்கி சித்சார், ஜூனாகத்தில் முடிவடைந்தது. ராஜ்கோட்டில் உள்ள கோவிலில் 500 வாகனங்களுடன் பேரணியை வரவேற்ற படிதார் தலைவர் நரேஷ் படேல் மா கோடியார் கோயிலில் யாத்திரையை வரவேற்றார்.^[68]

சமீபத்திய மாதங்களில், குசராத்தில் பல போராட்டங்கள் நடத்தப்பட்டன. இதில் போராட்டக்காரர்களுக்கு காங்கிரசு ஆதரவு அளித்தது.^[55]

பாரதிய ஜனதா கட்சி பெரும்பான்மையான தொகுதிகளில் வெற்றி பெற்று முதலிடத்திலும், இரண்டாம் இடத்தில் இந்திய தேசிய காங்கிரசும், மூன்றாம் இடத்தில் ஆம் ஆத்மி கட்சியும் வாகை சூடும் என தேர்தலுக்குப் பிந்தைய கருத்துக் கணிப்பில் கூறப்பட்டுள்ளது.^[70][71]

வாக்கு எண்ணிக்கை முடிவில், மொத்த முள்ள 182 தொகுதிகளில் பாரதிய ஜனதா கட்சி 156 தொகுதிகளையும், காங்கிரஸ் 17 மற்றும் ஆம் ஆத்மி கட்சி 5 தொகுதிகளை கைப்பற்றியது.^[72]

• குஜராத் சட்டமன்றத் தேர்தல், 2017
• 2022 இந்திய மாநிலங்களின் சட்டமன்றத் தேர்தல்கள்