Камбінаваная справаздачнасць

Бухгалтарскі ўлік
Ключавыя паняцці
Бухгалтар • Бухгалтарскі рахунак Галоўная бухгалтарская кніга Абаротна-сальдавая ведамасць Справаздачны перыяд Уліковая палітыка Падвойны запіс • Праводка Дэбет і крэдыт • Актывы і пасівы Калькуляцыя • Сабекошт МСФС • GAAP
Фінансавая справаздачнасць
Бухгалтарскі баланс Справаздача аб прыбытках і стратах Справаздача аб руху грашовых сродкаў Справаздача аб змене капіталу Кансалідаваная • Камбінаваная
Вобласці бухгалтарскага ўліку
Улік затрат • Фінансавы ўлік • Судовая бухгалтэрыя Улік фондаў • Кіраўнічы ўлік • Падатковы ўлік Бюджэтны ўлік • Банкаўскі ўлік
Аўдыт
Фінансавы кантроль
Гэта панэль: глядзець размовы правіць

Камбінаваная справаздачнасць — від кансалідаванай фінансавай справаздачнасці. Камбінаваная справаздачнасць прадугледжвае стварэнне групавой справаздачнасці любых адвольна згрупаваных кампаній^[1], часцей за ўсё згрупаваныя кампаніі належаць аднаму інвестару або групе інвестараў^[2][3].

Методыка складання камбінаванай справаздачнасці не з'яўляецца прадметам рэгулявання Міжнародных стандартаў фінансавай справаздачнасці (МСФС), бо няма стандарту, які прама рэгуляваў бы складанне такой справаздачнасці^[1]. Аднак асаблівасць міжнародных стандартаў у тым, што МСФС — гэта не набор стандартаў, а набор прынцыпаў. Прынцыпы вызначаюць агульныя правілы і не з'яўляюцца канкрэтнымі ўказаннямі^[4], а МСФС не забараняе кампаніям складаць камбінаваную справаздачнасць. Такім чынам, камбінаваная справаздачнасць можа цалкам адпавядаць патрабаванням МСФС і фінансавай справаздачнасці^[1].

На практыцы распаўсюджаная сітуацыя, калі некалькі кампаній фактычна кантралююцца адным уласнікам, але юрыдычна яны не звязаныя паміж сабой. Міжнародныя стандарты наўпрост не дазваляюць выпусціць фінансавую справаздачнасць групы, у якой няма дакладна вызначанай мацярынскай кампаніі. Якраз рашэннем такой праблемы можа стаць падрыхтоўка камбінаванай фінансавай справаздачнасці^{[2][заўв 1]}

На пачатковым этапе стварэння камбінаванай справаздачнасці фармуюцца пакеты справаздачнасці для кожнай кампаніі асобна. Далей — адпаведныя паказчыкі падраздзяленняў. Затым цалкам выключаюцца ўнутрыгрупавыя аперацыі і рэшты, нерэалізаваныя ўнутрыгрупавыя прыбыткі і страты^[5]. Асноўным адрозненнем камбінаванай справаздачнасці ад кансалідаванай з'яўляецца тое, што ў кансалідаванай паказваецца капітал толькі мацярынскай кампаніі, а ў камбінаванай капіталы кампаній складваюцца, бо паміж імі няма адносін «маці — дачка», і яны проста належаць адной асобе альбо групе асоб^[1].

Пры складанні такой справаздачнасці важным з'яўляецца выкананне наступных умоў:

• аднолькавая уліковая палітыка аб'яднаных прадпрыемстваў;
• фінансавая справаздачнасць аб'яднаных прадпрыемстваў павінна быць сфармавана на адну справаздачную дату;
• раскрыццё прычын складання камбінаванай справаздачнасці, асноў вызначэння перыметра кансалідацыі. Гэтая інфармацыя неабходная для карыстальнікаў у мэтах разумення таго, чаму менавіта тыя ці іншыя кампаніі ўвайшлі ў групу^[2][6].

Вызначыць перыметр кансалідацыі — значыць акрэсліць кола кампаній, інфармацыя пра якія будзе выкарыстана ў мэтах фармавання фінансавай справаздачнасці групы^[7].

Ключавое адрозненне камбінаванай справаздачнасці ад кансалідаванай — магчымасць сфармаваць камбінаваную справаздачнасць для групы, у якой адсутнічае выразная юрыдычная структура. Гэта дае магчымасць маніпуляваць дадзенымі ў фінансавай справаздачнасці, і, такім чынам, дазваляе «палепшыць» справаздачнасць. Гэта можна зрабіць, напрыклад, такімі спосабамі:

• уключэннем «лішняй» кампаніі ў перыметр камбінацыі:

Група кампаній А, В, С, D мае патрэбу ў знешнім фінансаванні. Для гэтага яна збіраецца выпусціць камбінаваную справаздачнасць у адпаведнасці з МСФС. Падрыхтаваўшы праект справаздачнасці, кампанія застаецца незадаволеная атрыманымі фінансавымі вынікамі і ідзе на маніпуляцыю са справаздачнасцю. Для гэтага ствараюцца афшорныя фірмы E і F. Кампанія E набывае частку прадукцыі групы па рынкавых цэнах і перапрадае яе кампаніі F з нацэнкай 25 %. Канчатковыя спажыўцы закупляюць прадукцыю групы ў кампаніі F па рынкавых цэнах.

У такім «палепшаным» варыянце камбінаванай справаздачнасці групы кампанію E ўключаюць у перыметр камбінацыі, а кампанія F застаецца па-за перыметрам. Такім чынам, група павялічвае выручку і атрымлівае «папяровы» прыбытак на продажах, якія ажыццяўляюцца кампаніяй Е.

• выключэннем» лішняй «кампаніі» з перыметра камбінацыі:

Існуе група кампаній А, В, С, D. На кампанію D пераводзяць некаторыя выдаткі іншых кампаній гэтай групы. Пасля гэтага кампанію D выключаюць з перыметра камбінацыі. У выніку фінансавы вынік дзейнасці групы А, В, С паляпшаецца^[2].

Трэба таксама адзначыць, што атрымаць аўдытарскае заключэнне ад сур'ёзнай аўдытарскай кампаніі на такую справаздачнасць вельмі цяжка^{[2][заўв 2]}