Крушэўскі спуск (Гомель)

Крушэўскі спуск — спуск да набярэжнай ракі Сож у Гомелі, пралягае па канцавой частцы вуліцы Арцёма, мінае стык з вуліцай Сожскай, дзе робіць рэзкі паварот да набярэжнай, ідучы пад нахілам уніз прыблізна да будынка Гомельскай гарадской ратавальнай станцыі, каля якой рэльеф стабілізуецца. Мае два ўпарадкаваныя адгалінаванні — сходы (лесвіцу) ад вуліцы Сожскай да набярэжнай у раёне пляцоўкі для катання на скейтбордах і прыступкавую плітачную дарожку накшталт пандуса (за 45 м ад сходаў).

Крушэўскі спуск з’яўляецца асвоенай людзьмі рэшткай колішняга яра (фрагмент старажытнай рэчкі), злучанага з берагавымі схіламі ракі Сож. Гістарычныя назвы мясцовасці да канца ХІХ — пачатку ХХ ст. невядомыя. Эпітэт «Крушэўскі» пашырыўся на спуск ад наймення вуліцы Крушэўскай (з 1923 г. — вуліца Арцёма), якая ў другой палове ХІХ ст. сваю назву атрымала ў гонар аднаго з прадстаўнікоў роду Крушэўскіх (верагодна, Вінцэнта Крушэўскага), што мелі ўладанні ў гэтай частцы Гомеля^[1]. Як «Спускъ Крушевскій» аб’ект фігуруе на плане Гомеля 1913 г.^[2]

Нягледзячы на ажыццёўленыя цягам 1920-х гг. масавыя савецкія перайменаванні вуліц і іншых аб'ектаў Гомеля, назва Крушэўскага спуску станам на 1927 г. афіцыйна захоўвалася^[3].

• 
  Крушэўскі спуск на плане горада Гомеля, 1913 г.
• 
  Рэклама тартака, які размяшчаўся на Крушэўскім спуску, да 1914 г.
• 
  Умацаванні схілаў, 2015 г.
• 
  Сходы з Крушэўскага спуску да набярэжнай, 2021 г.
• 
  Спуск і сходы, выгляд з боку Сожа, 2021 г.
• 
  Сходы, 2022 г.
• 
  Забудова над спускам, 2022 г.

• На Вікісховішчы ёсць медыяфайлы па тэме Крушэўскі спуск (Гомель)